Malele
'EBELU
Kauta Kevatai
Puka Laloana Ilelena Luvana
Puka kanania eleleia 'eva abiveni kauta vaida kataua beduluta eta abiveni devikanita 'olana kau vaida ia devabo'ota inoku adedua laloanai demia. Kanaua 'ounai puka kanania eleleia eta abiveni bevakula'ilala. Keliso mo sibona kevanai edaia Dilava ena dala umauta bevaikata.
Puka kanania dava namata koi lovata eakuta. Lava'ana'ina 'eva Iesu 'eva Dilava nakuna umauna. Iesu kanobatai emia laloanai, ia 'eva mekau doutamo ekoata, mai anaana namavaikata eabita inoku dala kanaua'i Dilava eta'u Iesu 'eva kau boutai iduluta kauna namanai evaoa (2.10). Kanaua 'ounai Iesu 'eva enolea kauta mai anelu mai Mose ekeinita. Ivaluana 'eva Dilava sibona eta'u Iesu eabi isi kabukabu kaunai eao keinikeini. Ia 'eva kabukabu kauna namana vutuvutuai, ia 'eva kevanai edaia kau ia deabivenia dokadoka kauta bevamaulita. Mose ena koakoa mai ena talavatu lovata eaku. Kanaua 'eva Iesu dava evavaita kauna va'ava'ana vitaitana.
Puka kanania laloanai Isalaela kauta makavata kauta eta abiveni sisibata doutamo demimia (11), inoku kau eta abiveni evakulu'ilata. To'ona 'eva ia evakula'ilata adedua davadava kataua bedavalita, 'a ia 'eva eta abiveniai belava'ini beda'amo ba ai. Ia makata 'eva Iesu kevanai bemimia, ena dalai bedada'a, mekau mai anaana kataua 'eva eta abiveni sia beabia tau (12.1 - 12).
Puka Iduvuna Namata
a. Lova aku: Keliso 'eva Dilava ivala'asina. (1.1 - 3)
b. Keliso 'eva anelu ekeinita. (1.4 — 2.18)
c. Keliso 'eva Mose mai Iosua ekeinita. (3.1 — 4.13)
d. Keliso ena kabukabu vinaulana ena namana. (4.14 — 7.28)
e. Keliso ena luva'ana'i ena namana. (8.1 — 9.28)
f. Keliso ena veniveni ena namana. (10.1 - 39)
g. Abiveni 'eva dava namana. (11.1 — 12.29)
h. Vasiasi luvana mai luva to'ota. (13.1 - 25)
1
Dilava Ena Luva
Nakuna E'outa.
1 Siako vaika koanai Dilava eta'u enolea kauta nututai melala doutamo dala edeata edeatai 'ava'avata e'outa. 2 Beia vali'u melala katania to'otai 'eva Nakuna nutunai ita e'outa. Dilava eta'u Nakuna dainai vutuvutu mai kanobata evavaita, ia eta'u Nakuna edilaia avuna davata boutai evenia ia ena. 3 Nakuna kanania Dilava ena nuavi 'amale 'amalena evala'asia, ia 'eva Dilava vitaitana umauna, ia ena luva siavunai dava boutai e'imata. Ia kau eta si'avana edeinita ovo mulinai vutuvutuai siavu boutai Dilavana idibana duasi 'olana iakuna 'abunai emia divo emia.
Dilava Nakuna 'Eva
Anelu Ekeinita.
4 Ia 'eva anelu ekeinita 'olana Dilava ia vana evenia vana 'eva anelu vata ekeinita. 5 Dilava eta'u ia e'ouia ediaka,
“Oni 'eva lau Naku'u.
Vali'u melala kanania'i Lau oni
avapulumu,”
Sal 2.7
ia anelu sia ka kevanai kanaua eluva koma, mune'e ediaka,
“Lau 'eva ia Kamanai ba'ao,
ia vaka Lau Naku'u ai be'ao.”
2 Sam 7.14
6 Mai vaka Nakuna batani kauna esinia easi kanobatai koanai eluva ediaka,
“Dilava ena anelu boutai
'eva ia bekukudivo venia.”
Deu 32.43
7 Anelu lovata eaku ediaka,
“Dilava ena anelu 'eva
lani ai evaota, ena anelu vaida
da'alana deabi aneluta 'eva
'alova vulenai evaota.”
Sal 104.4
8 Ia Nakuna lovana eakuia ediaka,
“Oni 'eva Dilava, emu
lovia imia'auna bemia keinikeini,
oni 'eva komolo ai emu vanua
o'ola vaia.
9 Vinaula komolo oula venia,
si'avana 'eva ovaivivia.
Kanaua 'ounai Dilava emu Dilava
eta'u lalonama deolonai esisimu
emu lovia koana,
vamu eabiaisi banomu vailatai.”
Sal 45.6, 7
10 Mai mune'e ediaka,
“Lovia namana e,
makavana umaunai kanobata
'eva oni ovavaia, vutuvutu vaka
oni imamuai ovavaia.
11 Vutuvutu mai kanobata
'eva betaule, beia oni 'eva
bomia keinikeini,
mai dava boutai bevuluvulu
tubu'a 'ana'ina boina. 12 Vutuvutu mai kanobata bolo'uta
ikalu boina, ikata bedeana
tubu'a 'ana'ina boina.
Ia oni 'eva 'abumuai mo,
emu mauli vikauta 'eva
sia be'ole.”
Sal 102.25-27
13 Sia melala ka Dilava anelu ka kanania e'ouia koma ediaka,
“Idiba'u duasi miadivo
beda'amo oni ivaivivimu kauta
aemu palapalana ine'ena 'au
davanai bava aota.”
Sal 110.1
14 Anelu 'eva dava? Ia boutai 'eva idume, Dilava da'alana deabi kauta, esinita vamauli beabia kauta beduluta.

© 2024 GBT