1 Eta abiveni etata'u kanuabata davata evuata e'asi dava umautai de'ao, sia ka'ika davata dava umautai evaaota. 2 Kau 'ana'ita vaka abiveni kanania 'ounai Dilava eta'u evamomo'aita. 3 Abiveniai ita kaikabasi vutuvutu mai kanobata davata boutai 'eva Dilava ena luvai depulu, inoku kaikabasi ka'ika davata 'eva sia kaikata davata kevatai deasi depulu.

4 Abiveniai Abela 'eva veniveni davana nama'ina Dilava evenia Kaino ena veniveni davana ekeinia, inoku ena abiveni 'ounai Dilava eta'u Abela ena veniveni davana eabiadae maivaka vinaula komolo kaunai evaoa. Ia eba, ia ena abiveniai ia 'eva eluluva do'o.

5 Abiveniai Enoka kanobatai Dilava eta'u eabia isi eda'a kevana, ia sia eba, kanaua 'ounai sia kau ka ia edavalia. 'Olana Dilava eta'u eabia tau. Puka kabukabunai evamomo'aia ediaka ia asido'o eabia isi laloanai ia 'eva Dilava nuana evanama'inala. 6 Sia maiena abiveni kauna 'eva Dilava nuana ivanama'inana sia eikabasia. Dilava kevana beda'ala kauta 'eva beabiveni umauna Dilava 'eva emauli maivaka dekavua kauta tavata nama'ita bevenita.

7 Abiveniai Noa 'eva Dilava dava vailai bepupulu davana eabivenia laloanai ia sia eika davata Dilava lelena eabidae maimakauna aunakoi ka evavaia inoku ena luma kauta ivamaulita davana be'ao abaka laloanai. Abiveni kanaua'i ia komolo kaunai eao Dilava vailanai vakaia kanobata kauta mekau namana dekoaia.

8 Abela'amo 'eva Dilava eabivenia. Ia e'aeia koanai lelena eabiadae eda'a ovo ena kano evikania. Dilava eluva'ana'i kano ka bevenia, ia a beda'ala 'eva sia eikabasia laloanai ena kano umauna evikania. 9 Abiveniai Abela'amo eda'a luva'ana'i kanona, ua'i da'a'au kaunai eao, ia Isako mai Iakobo ita aiole laloatai demia, ia laluana vaka luva'ana'i ka'onamo deabia Dilava kevanai. 10 'Olana Abela'amo 'eva evi'ima Dilava betata'u vanua kanaua bevalava 'inia kave'i miakeinikeini vanuanai be'ao.

11 Abela'amo adana Sala ita 'ani demotu vaika sia melo ka bemavapuluia, ia abiveni ai 'eva Abela'amo kama ai eao 'olana ia Dilava evamomo'aia ena luva'ana'i bevamomo'aia. 12 Abela'amo 'eva emotu vaika vitaitana 'ani eba boina, kau motuna ka'onamo kanania iduvu namavaikana evapulua vitaitana vutuvutu visiuta boita 'o 'atu nabuana boina ekavakuta 'eva sia ekavaku paluta.

13 Kau katania boutai eta abiveni ai demia beia Dilava ena luva'ana'i davata asido'o deabi laloanai deba, beia vailai bepupulu davata deikabasita 'ounai delalonama vaita, vakaia mulinai ia sibota deluvasi ia 'eva da'a'au kauta mai 'abua ede kauta kanobata kanania akanai. 14 Kau kanaua deluva koma 'eva ita kaikabasi ia 'eva eta kano umauna dekavua. 15 Ia kano kanaua makavanai devikania kanona bemalalovaia koanai bemamue vaka bemadaia. Ia kanaua sia dekoma. 16 Vanua ia de'imala vanuana 'eva vanua nama'ina vaika vutuvutu vanuana. Inoku Dilava 'eva sia emalalai ia be'aea eta Dilava, 'olana ia vanua ka 'ani eva'olua ia eta.

17 Dilava Abela'amo ekovoia laloanai Abela'amo abiveni ai nakuna Isako veniveni davanai evaoa. Dilava Abela'amo kevanai eluva'ana'i 'ava'avana bedouta, beia Abela'amo nakuna ka'ou kukunamo veniveni davanai evaoa eveni. 18 Dilava Abela'amo e'ouia ediaka, “Isako kaunai oni 'ava'avamu aluva'ana'i vaita kauta bepupulu.” 19 Abela'amo eabiveni Dilava 'eva mai siavuna kau ba ai bevako'isia 'udai. Inoku kamadiaka Abela'amo 'eva nakuna Isako ba ai eabia 'udai boina.

20 Abiveniai Isako eta'u Iakobo mai 'Esau evanama'inata mai vailai bepupulu davata vaka e'outa.

21 Abiveniai Iakobo ena ba 'ani ekevai vaika laloanai ia Iosepa nakuna ka ka evanama'inata maivaka ena ikoko'a ai ekoma 'au Dilava ekukudivo venia.

22 Abiveniai Iosepa ena ba 'ani ekevai laloanai Isalaela iduvuna Aikupitoai bela'asi kanaua valina ekava maivaka e'outa kuliana Kanana kanonai bekoleta.

23 Abiveniai Mose kamana sinana ia epulu mulinai devunia vuia koi 'olana de'ikaia ia 'eva melo nama'ina, inoku 'Aikupito Loviana 'olana sia demakau venia ena talavatu sia deabia dae.

24 Abiveniai Mose e'aida'aida koanai ia sia eula 'eva Aikupito loviana 'olana nakuna ateatena be'aea nakunai be'ao. 25 Ia sibona eula Dilava ena kau ita beanana ka'ona, ia sia eula melala kava'ina mo si'avana vinaulata belalonama vaita. 26 Mose elalovaia ia Keliso dainai beanana 'eva enama'ina vaika vakaia Aikupito lavota be'abi, 'olana vailai tava nama'ina tavana elalovaia.

27 Abiveniai Mose 'eva Aikupito evikania, lovia 'olana ena badu makauna sia emakau. Ia evapasisi sia kaikala Dilavana 'ani eikaia boina. 28 Abiveniai Mose eta'u La'au keini naduna eva'olua, e'outa lala ai nutuala akata deukuta, akuaku aneluna Isalaela nakuta melota batanikauta asi'i emaakubata makauna.

29 Abiveniai Isalaela kauta 'eva Atu 'aolanai dekeini vitaitana kano ladanai dekeini boina, ia Aikupito kauta dekovokovo bekeini laloanai boutai 'atuai dedono ba.

30 Abiveniai Isalaela kauta Ieliko vanuana alana namana deda'aia kaiu melala kalakoi ka 'eva epalu.

31 Abiveniai La'aba mo'a ateatena 'eva Isalaela eta 'idima'idima kauta lua eduluta kave'i 'ounai Ia 'eva Dilava sia deabia dae kauta ita sia deba ka'ona.

32 Inoku lau luva dava vaka baluvala? Kidioni, Balaka, Samusoni, Idepeta, Davida, Samuela mai enoela kauta valita bakakava melalana 'eva sia edaia. 33 Ia eta abiveni ai dekuali kanobata doutamo devasi'avanata, komolo vinaulata devavai, Dilava ena luva'ana'i davata deabi, ia deta'u laioni nututa de'alavuta, 34 'alova namata devabo'ota, kuali lepota kevatai deveau ovo. Debade bade ia mune'e dekula'ila 'udai, kuali ai dekula'ila si'asia 'abu edea kauta 'itota delo'ota. 35 'A'ate vaida 'eva kadi'a'ata deba kauta deko'isi 'udai dedavalita, vaida devavabuto'ota kauta sia deula beluvuta 'olana beaku bata laloanai ko'isi 'udai nama'inanai bemauli 'ounai.

36 Vaida 'eva deikata demamai devabo'ota, de'odita, deliota vabuto'o lumanai de'alavuta. 37 Bika'a ai deaku bata, deilipapata lua, kuali lepotai dekala bata. Mamoe mai nani avata delio deda'a to'ato'a, deulalu, devaiviivita mai devasi'avanata. 38 Kanobata 'eva sia maiena nama'ina ka ia kevatai. Ia 'eva sia maieta kano kauta boitai deda'a to'ato'a, kano'akunai, lolo ai, bika'a 'iletai mai 'uliai demia.

39 Kau katania boutai 'eva maieta abiveni dainai Dilava eta'u evamomo'aita, beia Dilava ena luva'ana'i davata 'eva asido'o deabi. 40 'Olana Dilava 'eva ena lalovai nama'ina umauna eva'olua ita eta. Ena ula 'eva 'ana'inai deabiveni kauta mai ita 'eva melala ka'onama bevakomolota ka'ona.