Luva'ana'i Namana Makamakana Luka 3

Vaidi'u Kabukabu Kauna
Ioane Eilolo.

(Mt 3.1-12; Mk 1.1-8; Io 1.19-28)

1 Tibelio lovia 'olana Loma kanobatana eloviala vikau 'ouka ima laloanai Pontio Pilato 'eva Iudea eta Kavana. 'Eloda 'eva Kalilea eloviala, maivaka kadina Pilipo 'eva Itulea mai Talakonito eloviata, Lusania 'eva Abilene vanuata elovia vaita. 2 Kabukabu kauta 'olatai kauta 'Ana mai Kaiapa eta melalai, kano'akunai Dilava ena luva easi Sakalia nakuna Ioane kevana. 3 Ioane eda'a Iolidana nutu 'aba'abana kanota boutai laloatai lalo'udai mai vaidi'u kabukabu eilolo vaia eta si'avana i'ou kaota 'ounai. 4 Enolea kauna Isaia ena pukai eleleia luvana vitaitana:

“Lele ka kano'akunai e'ae'ae ediaka,

‘Lovia namana ena dala

ova'olua, ena da'a

dalana ovakomoloa.

5 Lava boutai bebubuta,

lolololo mai lolo boutai

beva'ovuta venuai bevitaita.

Dala deva'eva 'eva bekomolo,

mai 'abu si'avata 'abuta

bevavai kave'i kave'i.

6 Kau boutai Dilava ena

vamauli siavuna beikala.’ ”

Isa 40.3-5

7 Kau mato dela'asi deasi Ioane kevana bevaidi'uta kabukabu, eilolo venita ediaka, “Kau'asi nakuta e, dai e'oumui badu e'asi davana kevanai oiboveau tau? 8 Lalo'udai laloanai oibomimia vuavuamui bepupulu, ia sia oi bodiaka ‘Abela'amo 'eva ita 'ava'avata.’ Sia oibolalovaia 'ani oibonama'ina. 'Olana lau oi a'oumui, Dilava maiena siavu bika'a katania'i Abela'amo nakuna bevavaita. 9 Ila 'eva 'ani e'olu au 'olanai, au boutai vuavuata nama'ita sia devapulu auta 'eva beukuta, 'alovai bekapota dodo.”

10 Inoku do'u kauta ia delavuaia dediaka, “Inoku lai 'eva dava lai bavavaia?” 11 Ioane e'outa ediaka, “Maiena ivadodo lua kauna 'eva banona sia maiena kauna 'eva ka bevenia, maiena iani kauna vaka kanaua bevavai koma.” 12 Moni visi kauta vaka deasi bevaidi'uta kabukabu deko koanai, delavuaia dediaka, “Vaikabasi kaumu e, lai dava bavavaia?” 13 Ioane e'outa ediaka, “Moni boabia koanai vitaitana mo boabia, sia boabi keini.” 14 Kuali kauta vaida vaka delavuaia dediaka, “Lai 'eva dava lai bavavaia?” Ioane e'outa ediaka, “Aivalai 'o luva dedetai kau sia oi bolebata eta moni oi bo'abi. Nuamui mediatai tavamui umauta mo oi bo'abi.”

15 Kau 'eva devi'ima 'ounai nuatai delalovai lalovai dediaka Ioane 'eva ama'i Keliso. 16 Ioane ia boutai e'outa ediaka, “Lau 'eva veiai oi avaidi'umui kabukabu, beia muli'uai e'asi kauna ena siavu 'eva lau e'u siavu ekeinia, ena tamaka valota vaka baluluvu 'eva keva'uai sia edaia. Ia 'eva Idume Kabukabuna mai 'alova ai bevaidi'umui kabukabu. 17 Ena witi ivavai kave'ita auna 'eva imanai, witi iaku mukamukata 'abuna bevavaia kave'i, witi keata bevalalota makuai bedoubou, ia lu'ulu'uta 'eva sia ebo'o kovo 'alovanai betouta.”

18 Ioane vaidiba luvata doutamoai kau e'outa mai kevatai vali nama'ina eilolo vaia.

'Eloda Ioane Vabuto'o Lumanai E'alavua.

19 Ioane eta'u Kalileia eta lovia 'olana 'Eloda e'ovenia, 'olana ia kadina adana 'Elodia eadavala mai vinaula si'avata vaika doutamo evavai 'ounai. 20 'Eloda ena si'avana kataua boutai akatai si'avana umauna ka evavaia 'udai, Ioane vabuto'o lumanai e'alavua.

Ioane Iesu Evaidi'ua Kabukabu.

(Mt 3.13-17; Mk 1.9-11)

21 Kau boutai evaidi'uta kabukabu laloanai, Iesu vaka evaidi'ua kabukabu. Iesu ena meamea laloanai vutuvutu eluvu. 22 Idume Kabukabuna boiomalo ikaikana vitaitana e'ovu easi ia akanai. Inoku lele ka vutuvutuai easi eluva ediaka, “Oni 'eva Lau Naku'u. E'u Lalo'au, alalonama venimu.”

Iesu Ena Pulu Kubu Idolina.

(Mt 1.1-17)

23 Iesu vikauna koinavui koanai ena vinaula emakavala.

Kau delalovaia

Iesu 'eva Iosepa nakuna.

Iosepa kamana 'eva 'Eli,

24 kamana Matata, kamana Levi,

kamana Meleki, kamana Ianai,

kamana Iosepa,

25 kamana Matatia, kamana 'Amosa,

kamana Nauma, kamana 'Eseli,

kamana Nakai,

26 kamana Mata, kamana Matatia,

kamana Semeina, kamana Ioseka,

kamana Ioda,

27 kamana Ioanana, kamana Lesa,

kamana Solobabela,

kamana Salatiele, kamana Neli,

28 kamana Meleki, kamana 'Adi,

kamana Kosama, kamana

'Elamadama, kamana 'Ele,

29 kamana Iosua, kamana 'Eliesele,

kamana Iolima, kamana Matata,

kamana Levi,

30 kamana Simeona, kamana Iuda,

kamana Iosepa, kamana Ionama,

kamana 'Eliakima,

31 kamana Melea, kamana Mena,

kamana Matata, kamana Natana,

kamana Davida,

32 kamana Iese, kamana 'Obeda,

kamana Boa, kamana Salamone,

kamana Nasona,

33 kamana 'Aminadaba, kamana 'Adamina,

kamana 'Aleni, kamana 'Esalona,

kamana Pale, kamana Iuda,

34 kamana Iakobo, kamana Isako,

kamana Abela'amo, kamana Tela,

kamana Na'olo,

35 kamana Seluka, kamana Leu,

kamana Peleka, kamana 'Ebele,

kamana Sala,

36 kamana Kainana,

kamana 'Apasada,

kamana Sema, kamana Noa,

kamana Lameka,

37 kamana Metusala, kamana Enoka,

kamana Ialeta, kamana Ma'alale,

kamana Kainana,

38 kamana 'Eno, kamana Seta,

kamana 'Adamu,

kamana Dilava.

Luka
<
3
>