Paulo Ena Malele
TITO
Kevanai
Puka Laloana Ilelena Luvana
Tito 'eva sia Iuda kauna. 'A ia elalo'udai laloanai, Paulo eduluia ena veauneke vinaulana laloanai. Paulo eta'u Tito 'eva Kelete motumotunai evikania, ia betata'u abiveni kauta ika'inita vinaulana bevavaia 'abu kanaua'i.
Malele kanania laloanai, luva lava'ana'ina davana kanania. Keleta kauta eta koakoa 'eva sia denama'ina kave'i (1.10 - 13). Paulo ediaka, abiveni kauta i'ana'iavaita vinaulana iulavenina kauna ena koakoa 'eva benama'ina kave'i. Mai kau ivaikabasita dalana Tito e'ouia, vitaitana moluane mai ateate 'alu'aluta mai da'ala abi kauta. Malele to'onai 'eva Paulo eta'u Tito e'ouia moluane mai ateate bevaikabasita nuata bevaka'onamo. Ia ka ka kevatai vinaula mediata bevavai mai kau vaida kevatai. Ia 'eva badu luvata sia beluluva mai kau vaida ita sia bevina.
Puka Iduvuna Namata
a. Lova aku. (1.1 - 4)
b. Dilava ena lo'e vinaula kauta. (1.5 - 16)
c. Abiveni kauta eta mauli. (2.1 - 15)
d. Vasiasi luvata. (3.1 - 11)
e. Luva to'ota. (3.12 - 15)
1
Vanama'ina Luvana.
1 Lau Paulo, Dilava ena da'alabi mai Iesu Keliso ena veauneke kau'u. Lau 'eva desini'u kau Dilava edilata kauta kataua eta abiveni baduluta Dilava ena luva umauna beikabasia kanaua'i Dilava 'olana be'aku. 2 Abiveni mai aoneka kanaua'i mauli keinikeini benuabata vaia, Dilava 'ani siako kanobata asido'o epulu laloanai mauli kanania eluva'ana'i vaia, ia 'eva sia ededede. 3 'Ani elalo vaia makava vakaia ena melala umaunai valina nama'ina evala'asia kau boutai beikabasia, valina kanaua ailolo vaia, Dilava ivamaulita kauna evamomo'ai'u ia ena vinaula kanania ivavainai.
4 Tito, naku'u umauna eta abiveni ka'onamo laloanai, lau oni alele venimu. Dilava ita kamata mai Keliso Iesu ita ivamaulita kauna iulaveni koana mai nua'elu bevenimu.
Tito Keleteai
Kau Namata Edilata.
Kau Namata Edilata.
5 Kelete ai avikanimu 'olana 'eva vinaula boutai sia deole vinaulata bovavaita kave'i inoku vanua boutai laloatai Dilava ena lo'eai kau namata bodilata 'ana'ia vai vinaulana bevavaia, ikabasi avenimu ikabasinai bovinaula. 6 'Ana'iavai kauna 'eva va'evai vuvua sia devakoala kauna, adana ka'onamo, nakuna beabiveni maivaka lele be'ika, sia bebika'a. 7 'Olana Dilava ena vinaula eikakao kauna 'eva va'evai vuvua sia devakoala, sibona ena ulai sia bedada'a, 'o sia bebadu molaumolau, sia beinu ba, sia beaivala mai moni sia beula venia vaika. 8 Ia Da'a'au kauta beabita dae ena lumai mai dava nama'ina davana belalo'au venia, lalovai komoloai bemimia, komolo dalanai bemauli, ena mauli beveveni Dilava kevanai, mai nuana bekabukabu. 9 Dilava ena luva umauna devaikabasi vaia vaikabasina kanaua beabi 'inia. Dala kanania'i vaikabasi umauna bevaikabasita kau nuata bevakula'ilata, mai vaikabasi umauna devaivivia kauta kataua eta va'eva bevakomolota.
Vaikabasi Kauta Dedeta
Oi Bo'outa Lele Bevuvunu.
Oi Bo'outa Lele Bevuvunu.
10 'Olana vaivivi kauta doutamo ua'i eta luva 'avaea luva 'avaeai kau delebata, maivaka deivata kauta kataua doutamo vaka ua'i. 11 Kau kataua oi bo'outa lele bevuvunu nututa be'alavu, 'olana abiveni kauta eta luma kauta doutamo nuata devabavunuta, sia bemavaikabasi davata devaikabasivai moni ilalovainai malalai vinaulata kataua devavai. 12 Kelete kauta eta enolea kauna umauna eta'u ka Kelete kauta e'outa ediaka, “Kelete kauta 'eva dede kauta, boloma 'asita si'avata vaika boita, debalea sibota bo'ata anita mo delalovaita.” 13 Nia 'eva luva umauna eluvala, kanaua 'ounai bo'ovenita si'asi'a, inoku eta koakoa bekomolo Dilava beabivenia kula'ila. 14 Inoku Iuda kauta eta sisiba 'ana'ita mai kau kataua eta talavatu luvata 'uluta sia be'ika, kataua 'eva kau etai de'asi Dilava ena luva umauna devaivivia.
15 Nuata nama'ita kauta kataua 'eva kevatai dava boutai dekomolo kave'i, ia nuata si'avanai devonu kauta kataua mai sia deabiveni kauta 'eva kevatai sia dava ka ekomolo. Eta lalovai mai nuata umauta 'eva desi'avana. 16 Ia dediaka Dilava deikabasia kave'i, beia eta koakoa ai 'eva Dilava sia deabia dae. Ia 'eva kau kataua ulata sia e'ula, lele sia de'ika kauta mai dava nama'ina ka sibota kevatai bevavaia 'eva sia bedaia.