1 Pe hu ndramat masih mepo hu pwotisingi lohongahu hu tehe Yesu ara Kristus, ara yihu noru Ngindrai. Pe yihu masih mepo ndriyahu imbuluhi taman, ara ndriyahu kimbuluhi norun i. 2 Pwen worou andre kapahasaniy tehe tunamili hu noru Ngindrai, ara tehen toro: Worou kanamili Ngindrai, pe tukoho ndruwa hu nongan para pwahanou tan. 3 Pe namiliwa Ngindrai, ara tehen toro: Tukoho ndruwa hu nongan para pwahanou tan. Pe hu nongan para pwahanou tan ara waison o para tukatokuyaniy. 4 Paratesah, hu masih mepo hu noru Ngindrai, ara hu ramwaitini hu kultuw mwomwan para kol pwan. Lohonga rou ndrisiyon aro, ara iyki pwoke namandran para karamwaitini kultuw mwomwan ta hu ndramat para kol pwan. 5 Pwen hiyeh ilahiy para kiramwaitini pwoke ta hu ndramat para kol pwan? Yihu kopu mepo hu pwotisingi lohongahu tehe Yesu, ara Noru Ngindrai Kamai.

6 Pwen yiy aro ko ara isawiri paptais iya ndran pe imat pe ndreyen imuw—yiy mepo Yesu Kristus. Yiy kinsa pe kiniwiri paptais o ara pwi, hapeko ipaptais pe ndreyen imuw. Pe Mwoiwan Haiyan ara itiyani titiye tan, paratesah, Mwoiwan Haiyan, ara yiy ndrokonan. 7 Paratesah, melit matindra ara itiyani titiye tan: 8 Mwoiwan Haiyan, ndran, pe ndrai, hu matindra kene, ara hutiyani titiye handra ko. 9 Worou tupwotisingi lohongarou iya titiye ta ndramat, hapeko titiye ta Ngindrai, ara ihohin iya, paratesah, titiye ta Ngindrai opu, ara itiyani titiye ta Norun. 10 Ndramat mepo ipwotisingi lohongan iya kili Noru Ngindrai Kamai, ara ipahasani titiye iye. Pe yiy mepo kinpwotisingi lohongan kinna kili Ngindrai pwi, ara imbusi yiy irayah ndramat hamou para pwasoyou. Paratesah, kinpwotisingi lohongan kinna titiye mepo Ngindrai kintiyaniy iyata Norun, ara pwi. 11 Pe titiye aro, ara tehen toro: Ngindrai kiniyki taleh mepo andre kinto-kinto ara kinsa kiltou, pe taleh aro, ara ita kili Norun. 12 Sehe ndramat mepo Noru Ngindrai Kamai ita kili yiy, ara taleh ita kili yiy. Pe yiy mepo Noru Ngindrai Kamai kinto kili yiy pwi, ara taleh kinto kili yiy pwi.

13 Uratuluwi hu nongan aro isa kili wawu mepo wawu pwotisingi lohonga wawu iya ngala Noru Ngindrai Kamai, pwen andre akapahasaniy tehe taleh kinto-kinto, ara ita kili wawu. 14 Pe tukanrahatinirou kinna mbulmara Ngindrai, pwen tukatohun toro: Pe kapa tukasok yiy kiya hapesah kiho ndruwa namiliwan pwokeyan, ara andre kihilingi rou. 15 Pe kapa tukapahasaniy tehe ngara kihilingi worou–pwen tesah tukasok–ara tukapahasaniy tehe tukanwiriy pwen kili yiy.

16 Pe kapa akanime nali wawu hamou kimbusi pakut mwomwan handra mepo andre kinluwani yiy kinna kimat pwi, ara akatohun pe Ngindrai andre kiyki taleh kiya kili yiy. Pe uwong ara iyata hu mepo pakut mwomwan ta hu kinho luwani hu kinna kimat pwi. Pakut mwomwan handra, ara ngara kiluwani ndramat kiya kimat. Pe kunpwai para akatohun kiya aliy, ara pwi. 17 Hu kultuw mwomwan masih, ara pakut mwomwan, pe pakut mwomwan handra, ara kinho luwani ndramat kinna kimat pwi.

18 Pe tupahasaniy tehe ndramat mepo irayah noru Ngindrai, ara andre kinho mbusi pakut mwomwan manau, ara pwi. Paratesah, Noru Ngindrai Kamai, ara ipwokerani hu huro hiyan, pe kinlahiy sinai kipokasiyani hu, ara pwi. 19 Pe tupahasaniy tehe worou, ara noru Ngindrai, pe hu masih mepo hu kanpahasani Ngindrai pwi, ara hutora pahandra pwoke ta sinai. 20 Pe tupahasaniy i tehe Noru Ngindrai Kamai ara kinsa, pe kiniyki lohongai ileu kinsa kili worou, pwen andre tukapahasani yiy mepo yiy ndrokonan. Pe iyau kili Norun Yesu Kristus, pwen worou tutora kili yiy mepo yiy ndrokonan. Pe yiy, ara Ngindrai ndrokonan, pe yiy ara taleh mepo andre kinto-kinto.

21 Pwen wawu noru, akoro mawen kili hu kerewek.