1 Yo pohon,

Urakamam pe uratuluwi nongan iye iya kili kowase Kayis mepo ndriyo imbuluhi yiy iya nongan ndrokonan ta Ngindrai.

2 Pwen kowase, yo utohun tehe nombuwem kiro hiyan, pe melit masih kiro hiyan opu kisa kili wou. Pwen tehe mwoiwam ita kili Ngindrai, ara ita hiyan. 3 Pe iyki pwesai namandran iya isa kili yo iro mwonen nali rou hayah husa pe hutiyani titiye tam para lohongai ndrisiyon tam iya nongan ndrokonan pe ngara atokuyani nongan ndrokonan ta Ngindrai tapeh. 4 Handra pwesai kintamwaitini pwesai namandran to iye, ara pwi, iro mwonen uhulong tehe hu yowe Ngindrai hutokuyani nongan ndrokonan.

5 Pwen kowase, nalim hu mepo hupotisingi lohongahu, konan hu ndramat para mawen, hapeko sehe melit ambusiy iya kili hu, ara ambusiy iyapolo lohongai ndrisiyon tam. 6 Pe hu kantiyani namiliwam iya sios. Pe upwai tisingiy isa kili wou kiro mwonen yihu nakatali wawu nakayau, ara akapo hiyan katahu kiya sehe kultuw hiyan mepo Ngindrai inamiliy. 7 Pe tunan Kristus opu, pwen huyau, pe hu kanpo handra sopwat kinyau kili hu ndramat tanahu ta Ngindrai pwi. 8 Pe hiyan para tukapwaingani pwokere hiyan kiya kili hu ndramat toro, pwen andre tukapombulen kiya harong para nongan ndrokonan ta Ngindrai.

9 Pe kuntatuluwi nongan kinna kili hu ndramira sios, pe Taiyotrepes, ara inamiliy para kiyemu kiyata hu, hapeko kinho rawulohani yowu pwi. 10 Pwen pe kapa kusa, ara andre kurehe kultuw ita mbusiy. Yiy ngara kipwahaltani yowu kiya hu nongan mwomwan ta sinai. Pe kinho tohai pwi, pe kinho rawulohani nali rou hu kaya suwen, ara pwi yi. Yiy ngara kisingori hu ndramat mepo hu ngara kanamiliy para karawulohani hu ndramat, pe kirasse hu kaya mawen sios.

11 Pwen kowase, mbuna aho ndruwa kultuw mwomwan, hapeko aho ndruwa kultuw hiyan. Ndramat mepo kimbusi tesah hiyan, ara yiy ata Ngindrai. Pe ndramat mepo kimbusi kultuw mwomwan, ara kinnime Ngindrai pwi. 12 Yihu ndramat masih ngara hu katiyani kultuw hiyan ta Temetriyus—pe nongan ndrokonan ta Ngindrai i, ara iwong iya kultuw hiyan tan. Pe yowu yi ara yowu tiyani hiyan tan, pe apahasaniy tehe titiye towu, ara ndrokonan.

13 Nongan soyon iya iripo kili yo para kuratuluwiy kisa kili wou, hapeko mbuwali para kuratuluwiy kiya pepa ndre kalkan. 14 Yo urupo lohonge tehe pakeh andre kusa nime wou, pe tukawong kiyawule.

15 Ndriya wayis kiro kili wou, pe kowase rou hu topo iye hupwanos ndrokololang isa kili wou. Pe apa ndrokololang kiyata hu hamou-hamou hutora ara i.