1 Pe akoro namili hu nali wawu hamou-hamou mepo hupwotisingi lohongahu iya kili Ngindrai. 2 Kapa ndramat hamou yowen pwi kisa kili wawu, ara akarawulohani yiy, paratesah, hu ndramat hayah humbusiy tora, pe hukowu tehe hurawulohani hu angelou. 3 Pe hu mepo hutora nondriya kou, ara koyu wawu mbuna kirut tahu, pe akahangoruwei tehe wawu tora nondriya kou tehe yihu yi. Pe hu mepo huya nondriya nopwaran, ara ngandran hu hungoruwei, ara wawu hungoruwei i.

4 Wawu masih kahaiyani kultuw para yesowai, pe akapwotisingi lohongai para yesowai kiro mwonen, paratesah, ndramat mepo ipo pilah, pe hu ndramat masih mepo ngara hu kambusi kultuw para pilah, ara Ngindrai andre kiyki korahu. 5 Pe akoro mawen namiliwai para singayai, pe tesah ita kili wawu ara ilahi wawu. Paratesah, Ngindrai kinpwai kinpa,

7 Pe koyu wawu mbuna kirut ta hu pohon tawawu mepo ngara hu kapohowe nongna Ngindrai kisa kili wawu. Akayirowe kultuwayi hu tapeh, pe akoro ndruwa lohongai ndrisiyon tahu. 8 Yesu Kristus ara ita tehen tora ko pihe, pe andre kiro tehen tora ko nepo, pe andre kinto-kinto tehen tora ko.

9 Pe hu hinonou handra-handra para mawen, ara mbuna kipakarawani lohonga wawu. Pwoke tam ara iyau pahas ta Ngindrai, pe mbuna tukahondruwa haiye para anandrinai para pwesai, mepo andre kiniyki hapesah hiyan pwi kiya kili hu mepo huiniy. 10 Pe hu pris para Yutah mepo ngara hu kapo mbulyahu tehe pris hu koro yopai, ara kinlahiy para hukayan yukyuk handra kiyau pere tuntun torou, ara pwi.

11 Pe pris ihohin tahu pris ngara kisap ndreye hu kan kiya hape mepo Kol Haiyan Masih tehe yukyuk sih para pakut mwomwan. Pe nombuwe hu kan, ara ngara katimwi hu koro ngawan para ndrohonoku ngohongoh tahu ndramat. 12 Pwen tehen tora ko Yesu yi, ara ikuni nopwaran iro ngawan para karam namandran para kol namandran, pwen andre ndreyen andre kimbusi hu ndramat karayah haiyan. 13 Pwen pe worou i, tukaya ngawan ndrohonoku ngohongoh pe kaya kili Yesu, pe tukawiri masirai tehe yiy iwiriy. 14 Paratesah, worou turopo kol namandran sih iripo kol pwan mepo andre kinto ndrangan niwen pwi, hapeko worou tora nimnim iya kol namandran hakol i mepo itapo isa.

15 Pwen iyau kili Yesu opu, tukoro waiyaniy para kambusi yukyuk sih para kihari ngala Ngindrai—tehe yukyuk iyau pohorou para tukahari ngalan. 16 Pe koyu wawu mbuna kirut para akambusi kultuw hiyan para akasopwat hu hayah, paratesah, hu yukyuk tora ara ngara kimbusi Ngindrai kipwes. 17 Pe akahilingi hu pohon tawawu mepo hutora nimnim iya mwoiwa wawu pe akaro pahandra tesah hupwai. Pe hutora mu torou tehe hu ndramat para pwokereya mwoiwa tou. Pe andre hu kaiki tiyeyahu kiro mbulmara Ngindrai. Kapa akahilingi nongnahu, pwen andre hu kambusi mbulyahu kiyapolo pwesai, pe kapa ndriyahu kimwa, pwen andre hu kansopwat wawu pwi.

18 Pwen akatohun kisa towu. Pe yowu pahasaniy ndrokonan tehe lohonga yowu, ara ileu, pe yowu namiliy para koro mwonen kiya hu meresai masih. 19 Pe urakamam isa kili wawu para akatohun, pwen andre Ngindrai kitali yo kusa kili wawu kileh.

20 Pe Ngindrai para ndriya wayis mepo iyau ndreyen para tapaniu mepo andre kinto-kinto, yiy iwiri Yapane rou Yesu mepo Ndramat namandran Para Pwokereya Sipsip isa mawen kimat. 21 Pe Ngindrai andre kimwanye wawu kiya melit masih hiyan mepo wawu namiliy para akambusiy kiyau namiliwan pwokeyan. Pwen andre akambusi namiliwan pwokeyan, pe andre kipwokeyani worou kiya hu melit masih hiyan. Pe Yesu Kristus andre kipo mbulen kiyau kili tou, pe andre kiyki pwesai kiya kili Ngindrai, pe akahari ngala Ngindrai kinto pe kinto. Ndrokonan.

22 Wawu nali mepo wawu pwotisingi lohonga wawu, akahilingi wulani nongno mepo andre kipwokeyani wawu, paratesah, nongan uratuluwiy, ara mulai opu.

23 Yo unamiliy para akapahasaniy tehe nalirou Timoti, ara kintali kou. Pe kapa kisa kileh, ara andre youlu kasa nime wawu.

24 Ndrokolang toulu kiya kili hu pohon masih tawawu pe hu ndramira Yapan masih. Pe hu para Yitaliy hupa ndrokololang tahu isa kili wawu yi.

25 Pahas ta Ngindrai kiro sura wawu masih.