1 Koluw-koluw mamu kinna, ma melit masih kintayah mapu, Nongan ara kinto, pe Nongan ara iropolo Ngindrai, pe Nongan ara Ngindrai yi. 2 Pe koluw-koluw mamu kinna, Yiy ara iropolo Ngindrai.

3 Hu melit masih kene hurayah, ara imangsaniy. Pe hurayah iyau kili yiy opu. Pe kapa yiy pwi, pwen hu melit masih kene mepo hu kantayah pwen topo, ara andre hu kantayah pwi. 4 Taleh ita kili yiy, pe taleh ara, ara iyki nganan iya kili hu ndramat. 5 Pe nganan ngara kilengani kol lokuhan, hapeko lokuhan, ara kinlahiy para kintamwaitini yiy pwi.

6 Pwen ndramat hamou ngalan ara Yohanes, yiy ara Ngindrai ipwandrisa yiy isa. 7 Pe yiy isa para kipwokeyani nongan pe kitiyani titiye para ngana Nongan ara, pwen pe iyau kili Yohanes opu, hu ndramat masih andre hu kapwotisingi lohongahu kiya kili yiy. 8 Pe Yohanes mbukenan, ara ngana Nongan ara pwi, hapeko yiy isa para kitiyani pwokeyani titiye ara. 9 Pe nganan ndrokonan mepo ngara kilengani hu ndramat masih kene, ara itapo nakisa kol pwan.

10 Pe yiy iro kol pwan, pe Ngindrai imangsani kol pwan, ara iyau kili yiy opu, hapeko hu ndramat para kol pwan kanyirowe yiy pwi. 11 Pe yiy isa kili yowen hu imwonen, hapeko yowen hu, ara hu kantawulohani yiy pwi yoh. 12 Hapeko iya kili hu mepo hurawulohani yiy, pe hu mepo hu pwotisingi lohongahu iya ngalan, ara ipa hiyan iyata hu para hu karayah noru Ngindrai. 13 Pe yihu kantayah noru Ngindrai, ara kinyau namiliwai para nombuwe ndramat pwi, ndre kinyau namiliwai pwokeyan ta kamai hamou, ara pwi, hapeko hurayah iyau namiliwai pwokeyan ta Ngindrai.

14 Pe Nongan kintayah ndramat pe kinsa pwen kinwiri ndrohonokun mwalinga worou. Pe worou kannime nonowa pwoke tan, nonowa ngana Norun Hamou opu, mepo iyau kili Taman. Pe ipep iya pahas pe nongan ndrokonan.

15 Pe Yohanes itiyani titiye tan. Pe ipwaharai ipa, “Iye, ara yiy mepo kunpwai kunpa, ‘Yiy mepo andre kiho mulan kili yo, ara ihohin sato, paratesah, yiy ara irum*irum TP: i stap pinis iro, makunsa mapu.’ ” 16 Pe iyau pahas tan mepo ipep iro kili yiy, worou masih, ara tuwiri lomwes sih iyau sih. 17 Paratesah, nongan para pwahanou, ara Ngindrai kiniykiy pwen kinyau kili Mose; pe pahas pe nongan ndrokonan, ara iyau kili Yesu Kristus. 18 Pe hamou kinho nime Ngindrai pwi, Norun Hamou opu mepo para ndrahasa Taman imwonen, ara ipwaingani Ngindrai isa kiltou. Pe Norun ara, ara yiy Ngindrai.

19 Pe iye ara titiye ta Yohanes mepo iro mwonen hu Yutah para Yerusalem hupwandrisa hu pris pe hu Lipai para kaya sok yiy, tehe yiy, ara hiyeh. 20 Yohanes kinkose para kiwong ngawan pwi, hapeko iwong ngawan iya kili hu toro, “Yo ara Kristus pwi.”†Iya nongna kol tahu Krik ara ipa, “ndramat Ngindrai irakiniman para kiwiri ndramiran hu kamui” Hu pohowe yiy, ara Kristus

21 Pe husike yiy hupa, “Kiya, wou hiyeh, wou ara Eliyah?”

Pe ipa, “Pwi yoh.”

Pe hupa, “Wou Poropet ara?”

Pe isomwi hu ipa, “Pwokone.”

22 Pwen husok i hupa, “Kiya, pe wou ndra wou hiyeh ndrokonan? Asomwi yowu pe andre yowu kaya tiyaniy kaya kili hu mepo hu pwandrisa yowu. Pe wou mbukenan andre apa wou hiyeh?”

23 Pwen Yohanes isomwi hu ipa,

24 Pe hu ndramat hayah para sapiya nongan mepo hu Parisiy hu pwandrisa hu huya ara, 25 ara husok yiy hupa, “Wou ara Kristus pwi, pe wou ara Eliyah pwi, pe wou ara Poropet ara, pwi, pe paratapeh pe ata sumuluwani hu ndramat?”

26 Pe Yohanes isomwi hu ipa, “Yo usumuluwani hu ndramat iya ndran, hapeko yiy mepo ita tine mwalinga wawu, ara wawu kowu tan. 27 Yiy mepo ita mulan nakisa, ara ndramat tehe yo, kunwenei para kutali maskeye hatna pwelekan pwi.”

28 Pe hu nongan masih aro, ara hu rayah iro kol Petaniy, iro haroh para ndran Yortan. Pe Yohanes, ara iro sumuluwani hu ndramat huro kol ara yi.

29 Pe iya lang sih i, Yohanes inime Yesu iropo isa kili yiy, pwen ipwai ipa, “Akanimei, aro ara Noru Sipsip ata Ngindrai, mepo andre kirapiyani pakut mwomwan ta hu ndramat masih kene para kol pwan!” 30 Yiy aro, ara yiy mepo kunwong pwen kinna atan mamu kunpa, “Ndramat hamou nakisa kiho mulan kili yo, ara yiy ihohin kili yo, paratesah, yiy irum iro ma kuntayah mapu. 31 Pe yo mbukeno ukowu tan, hapeko ndroyi lohongai para usa pe urupo sumuluwani hu ndramat iya ndran, ara para andre kupwaingani yiy kiya ngawan kiya kili hu ndramira Yisrayel.”

32 Pwen Yohanes itiyani titiye aro ipa, “Unime Mwoiwan Haiyan iyau kol paingan yang tehe nombuwe pai hamou isa pwan, pe ikuw iro ndritan. 33 Pe yo ara ukowu tan, hapeko yiy ipwandrisa yo para andre kusumuluwani hu ndramat kiya ndran: ‘Ndramat mepo anime Mwoiwan Haiyan kisa pwan pe kikuw kiro ndritan, ara yiy mepo andre kisumuluwani hu ndramat kiyapolo Mwoiwan Haiyan.’ 34 Yo kunnimei pwen, pe urupo tiyaniy, tehe yiy aro, ara Noru Ngindrai Kamai.”

35 Pe iya lang sih i, Yohanes iya pe iropolo ndramiran malmou paiwe yi. 36 Pwen inime Yesu nakisayau, pe Yohanes ipa, “Walu kanime, Noru Sipsip ata Ngindrai!”

37 Pe iro mwonen hilu ndramiran malmou hilu hilingi yiy ipa toro, pwen hilho ndruwa Yesu. 38 Pwen Yesu ipaiwani yiy pe inime hiluho ndruwan, pwen isok hilu ipa, “Walu namili tesah?”

Pe hilu pwai iya kili yiy hilpa, “Rappai, wou ngara aro aleheh? (mbulndroiyi nongnan aro, ara ipa Ndramat para Hinonou)”

39 Pwen Yesu ipa, “Walu kasa pe walu kanimei.”

Pwen hilya pe hilya nime hape aleheh ngara kiro aliy, pe lang ara hilro polo yiy, paratesah, kinpiyah pe paramwandrai, ara iho mahaahiu.

40 Pe Antruw, mepo nali Simon Pita mendreheh, yiy ara hamou ta hilu mepo hilu hilingi tesah Yohanes kinpwai pe iro ndruwa Yesu. 41 Pwen melit Antruw nali Simon Pita mendreheh imbusiy imu, ara iya kahi nalin Simon, pe ipwai iya atan ipa, ‘Yowu kantele Messayah’ (mepo yiy Kristus.) 42 Pwen Antruw iyaiki Simon iya kili Yesu. Pe Yesu maran iya kili Simon pe ipa, “Wou ara Simon, noru Yohanes, pe andre kapohowe ngalam, kiya Kepas” (ngalan Kepas ara iyawule ko tehe Pita.‡Kepas ara nongna kol Aram, pe Pita ara nongna kol Krik, mbulndroiyin, ara ipa, pat)

43 Pe lang sih iho mulan i, Yesu ilolohonge para kiya Kaliliyy. Pe ikahi Pilip, pe ipwai iya kili yiy ipa, “Asa aho ndruwo.”

44 Pe Pilip, kolon ara kol ngawan Petsaita, Antruw pe Pita ara hilu para kol ara yi. 45 Pwen Pilip iya kahi Nataniyel, pe ipwai iya kili yiy ipa, “Yowu kankahi yiy mepo Mose kintatuluwiy ita Nongan para Pwahanou, pe yiy mepo hu poropet hu kantatuluwi pweheriyan i, pe yiy ara Yesu para kol Nasaret — mepo noru Yosep kamai.”

46 Pwen Nataniyel isok ipa, “Sehe melit hiyan kiyau kol Nasaret eh?” Pwen Pilip ipa, “Asa pe animei.”

47 Pwen iro mwonen Yesu inime Nataniyel nakisa pohonani yiy, pe ipwai ipa, “Iye ara ndramira Yisrayel ndrokonan, pe hape pwasoyou kinto kili yiy pwi.”

48 Pe Nataniyel isok yiy ipa, “Apahasani yo tapeh?”

Pe Yesu isomwiy ipa, “Pilip kinyoh wou mapu, yo kunnime wou pwen aro pahandra kei pik.”

49 Pwen Nataniyel ipwai iya ngawan ipa, “Ndramat para Hinonou(Rappai), wou ara Noru Ngindrai Kamai, pe wou, ara King ta hu Yisrayel.”

50 Pe Yesu ipa, “Wou apwotisingi lohongam, paratesah, upwai isatam tehe unime wou aro pahandra kei pik. Pe wou andre anime hu melit namandran iya, iya ara.” 51 Pe Yesu ipo sura nongnan ipa, “Upwai ndrokonan isa kili wawu, tehe andre wawu kanime kol paingan yang kite, pe hu angelou ata Ngindrai ara andre hu koropo kaya paingan pe kasa pwan kili Noru Ndramat.”