1 Pwen Pailat ipwai pe hu wiri Yesu pe humwiri yiy. 2 Pe hu ndram, ara huwiri hu malkei maporon, pe hu rakaiyaniy tehe kasapai ata king, pe huikiy iya payan. Pe hu sohonge koyau anandritan tehe ta king iya kili yiy. 3 Pe huya kili yiy huro waiyaniy ihou pe ihou, huro pa, “O yapane yowu, wou king tahu Yutah!” Pe huhusili yiy iya mbulmaran.

4 Pwen Pailat iya ngawan porosih i, pe ipwai iya kili hu Yutah mepo huro mbultere ara ipa, “Akanimei, nakuiki yiy kisa ngawan kili wawu, para akapahasaniy tehe kunkahi handra mwomwan para karatuni yiy kiya aliy, ara pwi.” 5 Iro mwonen Yesu isa ngawan iyasura kasapai hurakayaniy iya malkei maporon iro payan, pe isohonge koyau anandritan, pwen Pailat ipwai iya kili hu Yutah ipa, “Ndramat ara iye!”

6 Pe iro mwonen hu pris huhohin ta hu pris masih iyasura hu namandran tahu makundrayin hu nime Yesu, pwen hupalngai hupa, “Karapaingi yiy kiya kei tondrih! Karapaingi yiy kiya kei tondrih!” Hapeko Pailat isomwiy ipa, “Akawiri yiy pe akarapaingi yiy kiya kei tondrih, pe yo, ara kunkahi handra mwomwan para karatuni yiy kaliy, ara pwi.”

7 Pwen hu Yutah hupa, “Yowu, ara ma nongan para pwahanou towu, pe pwayan kinpwai ita nongan para pwahanou, ara ipa katingundrun kimat, paratesah, kinpwai tehe yiy ara Noru Ngindrai Kamai.” 8 Iro mwonen Pailat ihilingi nongan aro, pwen inoh turut. 9 Pwen imui iya ndrohonoku king. Pe isok Yesu ipa “Wou ayau aleheh asa?” Hapeko Yesu kinpa handra nongan pwi. 10 Pe Pailat ipwai iya kili Yesu ipa, “Wou mbuwalim para awong kisa kili yo ndre? Anpahasaniy tehe yo ara pwoke iripo kili yo para kutali wou ndre karapaingi wou kiya kei tondrih, ndre pwi?”

11 Pwen Yesu isomwi yiy ipa, “Pwoke tam ara andre kinlahiy para kiramwaitini yo pwi, kapa Ngindrai kiniyki pwoke kinyau kol paingan kisa kili wou pwi. Pwen ndramat mepo iyki yo usa nimam, ara pakut mwomwan atan, ara namandran iya.”

12 Pwen iro ara iya, Pailat iro nohonou para pakitali yiy kiyau, hapeko hu namandran tahu Yutah, ara huro palngai hupa, “Kapa wou atali ndramat aro, wou ara kowase Sisar pwi. Yiy mepo ipa yiy king, ara imbusi mwomwan iyata Sisar.”

13 Iro mwonen Pailat ihilingiy tora, iwiri Yesu iya ngawan pe iyki yiy impwan pwapwai para tamwanye iro hape mepo hupohowei Kalsiu Pwalani Pat iro aliy(iya nongna kol Aramik, ara ipa Kapata). 14 Lang para kamwaniyani Pasopa para sandre sih, para hu Yisrayel hu lohongani lang mepo hutali Yisip pe husa mawen ara kinsa pakeh, pe paramwandrai ara iho ndrokololang. Pwen Pailat ipwai iya kili hu Yutah ipa, “King ta wawu iye!”

15 Pwen hupalngai hupa, “Kawiri yiy kiya mawen! Kawiri yiy kiya mawen! Karapaingi yiy kiya kei tondrih!” Pe Pailat isok hu ipa, “Hiyan para kurapaingi king tawawu?” Pwen pe hu pris huhohin ta hu pris masih, ara hupa, “Yowu hamou king towu pwi, king towu hamou opu ara, Sisar.”

16 Pwen Pailat itali yiy iya nimahu para hu karapaingi yiy. Pe hu ndram hu wiri yiy.

17 Pwen Yesu ikuni kei tondrih tan mbukenan pe iya ngawan pe iya kol para Ndroho Ndruwi Paya Ndramat, (mepo iya nongna kolo hu para Aram, hupohowei Kolkota). 18 Pwen hu rapaingi yiy, iya kei tondrih iro ara, pe hurapaingi ndramat malmou i hilya kei tondrih ta hilu mbukenan, hamou iya pwen te niman mot, pe hamou iya pwen te niman kamou, pe Yesu, ara iro ndrokolon.

19 Pe Pailat ipwai pe hu ratuluwi nongan sahin, pe hu rapairaniy iya kei tondrih. Nongan ara ipa, YESU PARA NASARET, KING TAHU YUTAH. 20 Pe hu Yutah soyon, ara hu nime kaipisa nongan ara, paratesah, kol mepo hu rapaingi Yesu iya kei tondrih iho aliy, ara iro pakeh kol namandran. Pe kaipisa nongan ara, ara hu ratuluwiy iya nongna Hipuruw, Latin*Latin TP: Tokples Rom pe Krik. 21 Pwen hu pris huhohin ta hu pris masih tahu Yutah ara kanpwes pwi, pe huya kili Pailat pe hupa, “Mbuna Aratuluwiy tehe ‘King tahu Yutah,’ hapeko, ndramat aro mbukenan, ara ipa yiy, ara king ta hu Yutah.”

22 Pwen Pailat ipa, “Sehe nongan kunratuluwiy, ara kiro tehe kuntatuluwiy ara.”

23 Pe hu ndram mepo hu kanrapaingi Yesu iya kei tondrih, ara huwiri koiwen pe hurahihiriy iya kili hu mahaapat, sih ata hamou-hamou tahu. Pe hu wiri koyau niwen tan i. Pe koyau iye, ara hu sorowe iya koyau hasai o, iro paingan ipoo iya toton iya pwan.

24 Pwen hamou ipwai iya kili hamou ipa, “Mbuna tukalei, kiro ko pe tukarakau pe kipwaingani hiyeh andre kiwiriy.” Pwen melit aro irayah, ara para kipwainganiy nongan haiyan ta Ngindrai isa rayah manan toro, “Hu rahihirihu koiwe iro mwalingahu pe hu nonoyou satu iya aliy.” Pe hu ndram humbusiy tehen toro.

25 Pe hu mepo huro tine pakeh kei tondrih, ara tina Yesu, pe nali tinan Mariya mepo nambuyu Klopas, pe Mariya para kol Maktala. 26 Pwen iro mwonen Yesu inime tinan iro ara iyapolo ndramiran mepo ndriyan imbuluhi yiy, ara hilro tine pakeh, pwen ipwai iya kili tinan ipa, “Nam†Nam TP: Kinhaiyani yiy pwi, animei, ara norum.” 27 Pe ipwai iya kili ndramiran ara ipa, “Animei, ara tinam.” Pwen iro lang ara iya, ndramiran ara iwiri Mariya iya suwen pe ipwokere yiy.

28 Pe Yesu ipahasaniy tehe mbulyan masih kinsa hapwen, pe Nongan Haiyan ata Ngindrai, ara kinsahamanan, pwen ipa, “Koyu isapak.” 29 Pe kulawai sih para wain tunguyan iro ariya, pwen hu wiri nalmam sih pe hutaimaniy iya wain pe huikiy iro parah hamwat para kei hisop pe husoliy iya ngusu Yesu. 30 Pe iro mwonen kinimwiy ihipwen, pwen Yesu ipa, “Kinhipwen ara.” Ipa tora ihipwen, pwen payan iwayiu, pe itali mwoiwan iyau pe imat.

31 Pe lang ara, ara lang para kamwaniyani anandrinai. Pe lang sih iho mulan, ara lang Sapat namandran, pwen hu Yutah ara mbuwalihu para nombuwehu kiho ndron kei tondrih nondriya lang Sapat. Pwen husok Pailat para katumbuwe ndrikahu, pe kawiri nombuwehu kasa pwan. 32 Pwen hu ndram husa pe hutumbuwe ndrika ndramat malmou mepo hurapaingi hilu iyapolo Yesu, pwen hutumbuwei ata hamou imu pe ata hamou, ara iho mulan. 33 Hapeko iro mwonen husa kili Yesu pe husa yirowei tehe kinmat, pwen hukantumbuwe ndrikan malkip pwi. 34 Pwen ndram hamou, ara isi mbulsukomwan iya nah sih. Pwen indrou pwi ko ndran pe ndrai isa rapan. 35 Pwen ndramat mepo inimei, ara itiyani titiye ara, pe titiye ara, ara ipahasaniy tehe ndrokonan. Pe itiyaniy tehe wawu yi, ara akapwotisingi lohonga wawu kiya kili Ngindrai. 36 Pe hu melit aro hurayah, ara para Nongan Haiyan ata Ngindrai, ara kisamanan tehe: “Ndruwin hakou andre kinput pwi.‡Rakuhuye 12:46; Ndromndrom 9:12; Waliy 34:20” 37 Pe nongan haiyan ata Ngindrai handra yi, ara ipa, “Andre hu kanime yiy mepo hu kanisi yiy.§Sekerayah 12:10”

38 Pe iyamulan, Yosep para kol Arimateya isok Pailat para kiwiri nombuwe Yesu. Pe Yosep, ara ndramira Yesu hamou, hapeko iro kohon o, paratesah, inoh tahu pohon tahu Yutah. Pwen Pailat isomwi yiy, pe isa pe iwiri nombuwe Yesu iyau. 39 Pe Nikotemus mepo mamu iya saisai iya kili Yesu ping, ara iho ndruwa Yosep hilya. Pe Nikotemus, ara iwiri hu melit ngonohohu layin hu kansulyaniy iya mir**mir: ara kei hakou mendreheh tehe kuh pe aloi††aloi: melit iye ara kinto nongna kolo rou pwi . Pe kene hu melit ngonohon layin ara, ara nopwaran paraliy ara kilo tingat pe yimah. 40 Pwen hilu wiri nombuwe Yesu pe hilsumwai iyapolo hu melit mangonohon iro ndrihiyap lahayan. Hilu mbusiy tehen tora, ara iho ndruwa kowase hu Yutah para tona ndramat. 41 Pe kol mepo rapaingi Yesu iho kei tondrih iro aliy, ara piyang para wain hambut ita aliy, pe ngat sou sih howen iro piyang ara, mepo kanton hamou kinna aliy mapu. 42 Paratesah, lang para karamwanye lang Sapat kinsa pakeh pe hu Yutah huhuleh para kamwaniyani hu. Pe ngat sou, ara iro pakeh, pwen hiluiki nombuwe Yesu iya iyen aliy.