1 Pwen yihu ndramat masih ara, ara hutine, pe huluwani Yesu iya kili Pailat. 2 Pwen hurasusut nongan iya kili yiy, huro pa, “Yowu nime ndramat iye ara kinpaiwani kultuwayi hu ndramat para kolo yowu. Yiy isingori yowu para kasou takis kiya kili Sisar. Pe ipa yiy ara Kristus, tehe yiy king hamou.”

3 Pwen pe Pailat isok Yesu, ipa, “Wou king tahu Yutah, ndre?”

Pe Yesu isomwiy, ipa, “Tehe anpwai ara.” 4 Pwen Pailat ipwai iya kili hu pris huhohin ta hu pris masih, pe hu ndramat masih huro mbultere, ara ipa, “Yo ukah ndroiyin ndrit, para kaiki koran kiya kili ndramat iye.”

5 Hapeko yihu ndramat ara huro takekei manau, hupa, “Yiy iro hinuwani hu ndramat para Yutiya masih, pe hinonou tan, ara iluwi lohongahu, pe hukuw ndrit. Yiy irandroiyi hinonou tan, iro kol namandran hape Kaliliyy, ipoo kinsa toton kinsa kol iye.”

6 Pailat ihilingi nongan masih ara, pe isok hu tehe ndramat aro, ara ndramira Kaliliyy hamou, ndre pwi? 7 Pe Pailat isayirowei tehe yiy ara para kol mepo Herot ngara kiro nimnim kiya aliy, pwen pe ipwandrisa yiy iya kili Herot. Pe iro lang ara, ara Herot iro Yerusalem i.

8 Pe iro mwonen Herot inime Yesu, yiy ara ipwes namandran iya, paratesah, yiy ara iro longe ndrangan niwen iya para kinime yiy. Yiy ara kinhilong hu titiye tan pwen, pe iro namiliy para kinime Yesu kimbusi ndraikiya pwoke handra. 9 Pwen Herot ara isok Yesu iya hu soksok soyon, hapeko Yesu ara kinsomwi nongnan handra pwi. 10 Pwen hu pris huhohin ta hu pris masih, pe hu ndramat para hinuwani nongan para pwahanou, ara huro tine pakeh ara yi, pe huro tasusut nongan pwokeyan iya, iya kili yiy. 11 Pwen Herot iyapolo hu ndram tan, ara huwong nonoyou anan, pe hupwasimiri yiy. Pe husungoiwe yiy iya koyau lahayan hamou, pe hupwandrisa yiy imui iya kili Pailat. 12 Mamu, Herot hilu Pailat ngara hilu kamwisnani hilu. Hapeko iro mwonen lang ara, ara hamou irayah kowase hamou.

13 Pwen Pailat iyoh hu pris huhohin ta hu pris masih, pe hu poh masih, pe hu ndramat i, para hu kasa wule. 14 Pe ipwai iya kili hu, ipa, “Wawu wiri ndramat iye isa kili yo, ara tehe yiy ndramat hamou mepo ngara kisuhuri hu ndramat pe kipakarawani hu. Yo kunsok yiy pwen kinna hu melit masih ara, iro mbulmara wawu. Pe yo ukah ndroiyin ndrit, para kaiki koran kiya kili ndramat aro. 15 Pe lohonga Herot ara tehen aliy yi. Pwen pe ipwandrisa yiy imui isa kili worou, tehe wawu kannimei. Akahilingiy! Yiy kinmbusi kultuw handra mwomwan para kimat kiya aliy, ara pwi. 16-17 Pwen tehen tora ko andre kupwai para hu kamwiri yiy, pe kapwandrisa yiy kiyau.”*Hu ndramat hayah hupahas iya nongna Ngindrai, hupa ndre nongan hape yi ita suran, pe ipa toro: 17 Kultuw para kowasehu ara tehe toro: hayou masih, nondriya hu lang para yon para Pasopa, ara Pailat andre kitali ndramat hamou iro nondriya kou kisa ngawan kili hu. Animei Mak 15:6. Eng: Some manuscripts add verse 17, which says: Now he was obliged to release one man to them at the Feast. TP: Sampela saveman i ting narapela hap tok i stap tu long dispela lain. Dispela tok i olsem: Ol i gat dispela pasin. Olgeta yia long dispela bikpela de bilong lotu, Pailat i mas lusim wanpela kalabusman i go long ol. Lukim Mak 15.6.

18 Pwen yihu masih hurandrokomat porosih opu, hupa toro: “Ndramat ara, kiya mawen! Pe atali Parappas kisa kili yowu!” 19 Parappas ara huiki yiy iya nondriya kou, pe tunan ara toro: irahatai iya kili hu para kapman iro kol namandran ara, pe itingundru ndramat.

20 Pailat, ara inamiliy para kitali Yesu kiyau; pwen pe iyoh pe isok lohongahu paiwe. 21 Hapeko huro palngai manau toro: “Karapaingi yiy kiya kei tondrih! Karapaingi yiy kiya kei tondrih!”

22 Pwen iwong porotoyoh i, iya kili hu, ipa, “Paratesah? Yiy imbusi sehe kultuw mwomwan? Yo kunkah ndroiyin ndrit para kuiki koran kiya ndritan, para kimat kaliy. Pwen tehen tora ko, andre kupwai para kamwiri yiy o, pe kutali yiy kiyau.”

23 Hapeko hurandrokomat namandran iya, pe hurakekei para karapaingi yiy kiya kei tondrih. Pwen waihehu, ara iramburihi nongna Pailat. 24 Pwen pe Pailat isarayah iya lohongai handra, pe isomwi hu pe iho ndruwa nongnahu. 25 Pwen itali ndramat mepo husok para kitali yiy, ndramat mepo huiki yiy iya nondriya kou, para irandroiyi tahatai pe itingundru ndramat imat. Pe Pailat iro ndruwa namiliwa hu, pe itali Yesu iya nima hu ndram.

26 Pwen hu ndram huluwani yiy iyau. Pe humbultuwe Simon ndramira Sairini, mepo iropo isa nakiya nondriya kol namandran ara. Pwen huiki kei tondrih iya kili yiy, pe hupwai iya kili yiy para kisap, pe kiho ndruwa Yesu. 27 Pe hu ndramat soyo-soyon iya huho ndruwan, pe hu pihin soyon huro sura hu, ara huro pwandreundreu, pe huro rang malihu iyatan. 28 Pwen Yesu ipaiwani yiy pe ipwai iya kili hu, ipa, “Wawu pihin para Yerusalem, wawu mbuna akarangsi yo, wawu karangsi wawu mbukena wawu, pe noru wawu hu. 29 Paratesah, lang itapo isa andre wawu kapa, ‘Pwesai andre kiya kili hu pihin mepo huhikamai pe kanlahiy para kapo mbunah pwi, iyasura hu pihin mepo hu konoho mwalahiy tahu mbunah pwi, pe hu pihin mepo konho hisuwe mbunah pwi!’ 30 Pwen

32 Pwen huluwani hilu ndramat malmou para tandroindroi hilyapolo Yesu, para hu kaya tingundru hilu yi. 33 Pwen husa kol mepo hupohowei Ndroho Ndruwi Paya Ndramat. Pe huro ara, pe hurapaingi Yesu iya kei tondrih. Pe hurapaingi hilu ndramat malmou para tandroindroi yi—hamou iya kei tondrih iyapwen te niman mot, pe hamou iya kei tondrih iyapwen te niman kamou. 34 Pwen Yesu ipa, “Tomo, atali pakut mwomwan tahu aro, paratesah, yihu kowu tesah yihu tora mbusiy.” Pwen hu ndram ara hunonoyou satu para karahihiri koiwen.

35 Pe yihu ndramat ara huro tine pe huro nimei. Pe yihu yapane kol hupwasimiri yiy, hupa, “Yiy kinsopwat hu hayah, hapeko kinlahiy para kisopwat yiy mbukenan pwi, kapa ndrokonan tehe yiy Kristus ata Ngindrai, mepo Ngindrai kintakiniman pwen.”

36 Pe hu ndram i, ara husa pe hupwasimiri yiy. Pe huhang yiy wain susuwen, pe hupa, 37 “Kapa wou king tahu Yutah, asopwat wou mbukenam.”

38 Pe yihu ratuluwi nongan sahin iho ndrita payan, ara ipa toro: ARO ARA KING TA HU YUTAH.

39 Pwen hamou ta hilu ndramat malmou para tandroindroi mepo hurapaingi hilu iyasura yiy ara, ara ipwasimiri Yesu, ipa, “Wou Kristus, ndre? Pwen asopwat wou mbukenam, pe asopwat youlu yi!”

40 Hapeko yiy hamou i ipomate yiy, ipa, “Wou annohowani Ngindrai pwi, ndre? Kora talu ara ihisoule ko tehe atan i. 41 Pe talu ropo kuni nopwaran, ara ilahiy kora sehe melit talu kanmbusiy. Hapeko ndramat aro, ara kinmbusi handra kultuw mwomwan pwi.”

42 Pwen ipa, “Yesu, kiro mwonen arayah king kiro kolom, ara alohongani yo.”

43 Pwen Yesu isomwi yiy, ipa, “Yo upwai ndrokonan isa kili wou, lang nepo ko, andre aro polo yo kiro kol nonowan pe lahayan iya.”

44 Pwen paramwandrai ara irahaihai ndrokololang, pe kol pwan masih ara ilokuh topwei, ipoo iya piyahon pe paramwandrai iya iho tehe maroyoh. 45 Paratesah, paramwandrai ara kiniyki ngannganan pwi. Pe koyau para yumwa totohun namandran, ara ilen iya maltoh. 46 Pwen Yesu iwayeh pwokeyan, ipa, “Tomo, uiki mwoiwo isa nimam ara.” Pe iwong ihipwen, pe kunuwen isapwen pe imat.

47 Pe ndram mepo ihohin tahu ndram masangat ara, ara inime sehe melit kintayah, pe ihiri ngala Ngindrai, pe ipa, “Ara ndrokonan! Ndramat aro, ara yiy ndramat imwonen.” 48 Pwen pe hu ndramat masih mepo husa wule pe huro koyum ara, ara hunime sehe melit kintayah, ara huti wiyinerehu pe huyau. 49 Pe hu masih mepo hupahasani yiy, iyapolo hu pihin mepo huho ndruwan huro Kaliliyy pe husa, ara huro tine mwanan hape pe huro nime hu melit masih ara.

50 Pe ndramat hamou iro ara, ara ngalan Yosep. Yiy ara hamou ta hu Sanhetrin.‡Yihu Sanhetrin ara yihu poh huhohin iyata hu Yutah masih. Pe yihu ara humu iya tamwanye pe nongan para pwahanou. Pe kultuwayin ara imwonen pe hiyan. 51 Pe yiy ara kinsomwi handra lohongai mepo hu pohon masih para kol hu kanmburiy, pe hu kultuw mepo hu kanmbusiy, ara pwi. Yiy para kol Arimateya nondriya kol namandran hape Yutiya. Pe yiy ara iro sohoni kultuwayi kolo King Ngindrai para kisarayah. 52 Pwen iya kili Pailat, pe isok yiy para kiwiri nombuwe Yesu. 53 Pwen itali nombuwe Yesu isa pwan, pe isumwa nombuwen iya koyau hamou, pe iyaikiy iya nondriya ngat sih, hu kansoyei pwen ita pat sou. Pe ngat ara, ara hu kanton hamou kinna aliy mapu. 54 Pe lang ara, ara Lang Para Ponokule para lang Sapat, pe lang Sapat pakeh nakisarayah.

55 Pe yihu pihin mepo huro polo Yesu huro Kaliliyy pe husa, ara huho ndruwa Yosep. Pe huya nime ngat sou ara, pe hunimei tehe Yosep kiniyki nombuwe Yesu kinyera pwan tapeh. 56 Pwen pe huyau huya wum, pe huya ponokule ndraikei pe melit hayah mangonohon layin. Hapeko yihu ngoh iro nondriya lang Sapat, tehe nongan para pwahanou kinpwai.