1 Pe iro mwonen Yesu iwong iya hu melit masih kene aro ihipwen, pwen ipwai iya kili ndramiran hu, ipa, 2 “Wawu pahasaniy, tehe lenge Pasopa, ara lang maluwoh o hira ndron—pe Noru Ndramat, ara andre hu kaiki yiy kiya nimahu ndramat para hu karapaingi yiy kiya kei tondrih.”

3 Pwen hu pris huhohin ta hu pris masih, pe hu yapane kol, ara husa rawurehu husa nondriya suwe pris ihohin ta hu pris masih kene, ngalan Kayapas. 4 Pe huro mburi nongan pe huro ten lohongai kokohe para kambultuwe tahatini Yesu pe katingundrun. 5 Pe hupa, “Hapeko mbuna tukambusiy kiro nondriya Yon, matisan hu ndramat karambumbuwat pe karahatai.”

6 Pwen Yesu iro kol Petaniy, iro nondriya seu ta ndramat hamou mepo ngara hu kapohowe yiy, Simon ndramat para Mwamwa Kawa. 7 Pe pihin hamou isa kili yiy iyapolo pwisi ndraikei sih mepo ndraikei mangonohon layin iro aliy, pe kenne ndraikei ara, ara namandran iya. Pe Yesu iyeroh ngilse keyau, pe pihin ara, ara itilingi ndraikei ara iya payan.

8 Pwen iro mwonen ndramiran hu, hunimei, ndrinahu, ara ilokuh. Pe husok, hupa, “Paratesah pe itilingi ndraikei mangonohon layin ara, ara iya mwaihei opu? 9 Ndraikei mangonohon layin aro, ara ilahiy para kapopehei kiya aliy kiya singayai namandran, pe kaiki singayai para aliy kiya kili hu ndramat mepo hundroisiy.”

10 Pe Yesu iyirowe tesah mepo huro wong iya aliy, pe ipwai iya kili hu, ipa, “Paratapeh pe wawu tora wong ana pihin aro? Yiy, ara imbusi kultuw hiyan iya isa kili yo. 11 Yihu ndramat mepo hundroisiy, ara andre hu koro polo wawu lang masih, hapeko yo, ara andre kunto polo wawu waiye pwi. 12 Pihin aro itilingi ndraikei mangonohon layin aro isa mondro, ara imbusiy para kimwaniyani yo para toniyo. 13 Yo upwai ndrokonan isa kili wawu, hape aleheh nondriya kol pwan masih mepo hu kaya, pe hu kapohowe nongan hiyan aro kiya aliy, pwen tesah pihin aro kinmbusiy, ara andre hu katiyani tiyeyan, pe kalohongani yiy.”

14 Pwen hamou tahu Songui Pe Lumou—mepo hupohowe ngalan Yutas Yiskariyot—ara iya kili hu pris huhohin ta hu pris masih, 15 pe isok, ipa, “Wou andre aiki tesah kisato kapa kuratuni Yesu, pe kuiki yiy kisa nima wawu?” Pwen pe husomwi yiy, pe husowani yiy iya sombule silwa matingui. 16 Pe iro lang ara iya, Yutas iro ten sehe sai hiyan para kiyki Yesu kiya nimahu.

17 Iro nondriya lang imu para Yon para Lang Para Ndrinanohun Mepo Yis Aliy Pwi, hu ndramira Yesu husa kili yiy pe husok, hupa, “Wou anamiliy para yowu karamwaniyani anandrinai tam para ayan kiro lenge Pasopa, kiro hape aleheh?”

18 Pe Yesu isomwi hu, ipa, “Akaya nondriya kol namandran, pe akaya kili ndramat aro, pe akapwai kiya kili yiy, akapa, ‘Ndramat para Hinonou ipa toro: Pakeh nakisa rahihini lenge ara. Pe yo nakulohongani lenge Pasopa kiyapolo ndramiro hu koro suwem.’ ” 19 Pwen pe ndramiran hu humbusiy tehe Yesu kinpomwanye kinna kili hu, pe humwaniyani hu melit para Pasopa.

20 Pwen kol ipiyah, pe Yesu iyeroh ngilse keyau, iyapolo hu Songui pe Lumou. 21 Pe huro namnam manau pe ipwai, ipa, “Upwai ndrokonan isa kili wawu, tehe hamou tawawu andre kiratuni yo.”

22 Pe ndriyahu ara ipworu namandran iya, pe hamou iro pwassohi nongna hamou iya kili Yesu, huro pa, “Yapan, andre yo, ndre?”

23 Pwen Yesu ipwai, ipa, “Yiy mepo kintaimani niman kinna nondriya pwelekei sura yo, ara andre kiratuni yo. 24 Noru Ndramat, ara andre kiyau ndruwa nongan tehe pwayan kinpwai, pe kintiyani tiyeyan. Hapeko toimwa sehe ndramat mepo andre kiratuni Noru Ndramat! Iya hiyan masih iyata ndramat ara, kapa tinan kinmwalahiy kinna tan pwi.”

25 Pwen Yutas, ndramat mepo nakiratuni Yesu ara, ara ipa, “Ndramat para Hinonou, andre yo, ndre?”

Pe Yesu isomwi yiy, ipa, “Tehe anpwai ara.”

26 Pe iro mwonen huro namnam, Yesu iwiri ndrinanohun pe itoholiy, pe iramburingiy, pe iykiy iya kili ndramiran hu, pe ipa, “Akawiriy pe akainiy; iye ara nombuwe.”

27 Pwen iwiri pweniu wain sih, pe irawuloh iya kili Ngindrai, pe iykiy iya kili hu, pe ipa, “Wawu masih kene, akayin kiyau aliy. 28 Iye ara ndreye para tapaniu,*Hu puk tiken hupa “tapaniu howen” mepo utilingiy para kisopwat hu ndramat soyon, para kitali hu pakut mwomwan tahu. 29 Yo upwai isa kili wawu, kiro mahapo kiya, andre kunyin kiyau ndrunu mbuwa wain iye paiwe pwi, kipoo kuyin kiyasura wawu kiya nimnim howen kiro nondriya kolo king ta Tomo.”

30 Pe hupowaliy sahin ihipwen, pwen huyau huya Ngondron para hu Holip.

31 Pwen Yesu ipwai iya kili hu, ipa,

33 Pe Pita isomwi yiy, ipa, “Konan kapa tunan wou, pe yihu masih kene aro hu kahandrundru, hapeko yo, andre kunhindrundru satam pwi.”

34 Pe Yesu ipwai iya kili Pita, ipa, “Yo upwai ndrokonan isa kili wou, tehe nepo kiping, pe tutut kintang mapu, andre apwai maporotisap tehe akowu to.”

35 Pe Pita ipwai, ipa, “Konan kapa kumat kiyasura wou, hapeko andre kunpwai tehe ukowu tam, ara pwi yoh.” Pe ndramiran hu masih, ara hupwai iyawule tehen aliy yi.

36 Pwen Yesu iyau iyapolo ndramiran hu huya pinge holip hape, mepo hupohowei Ketsemani. Pe ipwai iya kili hu, ipa, “Akorompwan iye, pe yo kuya yoro kuya tohun.” 37 Pe iwiri Pita iyapolo NdraSepetiy malmou huyapolo yiy. Pe iro hingorowe ngandran, pe ndriyan ara iroporu. 38 Pwen pe yiy ipwai iya kili hu, ipa, “Ndriyo, ara iporu namandran iya, pe pakeh tehe pakumat. Akoro iye kiyapolo yo, pe mara wawu kiro.”

39 Pe iya hangoh hape mendreheh, pe iyos te kombuyen iya pwan pe itohun, ipa, “O Tomo, kapa ilahiy, pwen awiri pweniu iripo kili yo aro kiya mawen. Hapeko mbuna kiho ndruwa namiliwo, konan; oho ndruwa namiliwam.”

40 Pwen imui iya kili ndramiran hu matimou, pe inime hu huro matin. Pwen pe ipwai iya kili Pita, ipa, “Wawu kanlahiy para mara wawu kiro, pe akoro memere kiyapolo yo kiho paramwandrai sih o, ndre? 41 Mara wawu kiro pe akatohun, pwen pe andre wawu kanyos kanna nondriya nohonou pwi. Weleso ita mwoiwa wawu, hapeko nombuwe wawu, ara imbuyei.”

42 Pwen iya mawen poroluwoh i, pe itohun, ipa toro: “O Tomo, kapa kinlahiy para awiri pweniu iripo kili yo aro kinna mawen pwi, andre kipoo kuimwiy, hiyan, oho ndruwa namiliwam pwokeyan.”

43 Pwen imui isa, pe inime hu kanmatin paiwe yi, paratesah, marahu inun. 44 Pwen itali hu huro, pe iyau iya mawen porosih i, pe iya tohun porotoyoh i, pe iho ndruwa totohun tan para mamu ko.

45 Pwen imui iya kili ndramiran hu, pe ipwai iya kili hu, ipa, “Wawu tora matin pe tora ngoh manau, ndre? Akanimei, lang kinsa pakeh pe Noru Ndramat, ara yihu nakaratuni yiy kiya nimahu ndramat pakut tahu mwomwan. 46 Akatine, tukayau! Akanimei! Ndramat nakiratuni yo, ara kinsa!”

47 Pwen Yesu iro wong manau, pe Yutas, hamou tahu Songui pe Lumou, ara isarayah. Yiy iyapolo hu ndramat soyon iya husa iyasura hu semela pahun niwen pe hu parakei. Hu pris huhohin ta hu pris masih, pe hu yapane hu ndramat, ara hupwandrisa hu husa. 48 Pe ndramat mepo nakiratuni yiy, ara kinpomwanye kinna kili hu kinna kaipisa melit handra, pe ipa toro: “Ndramat mepo nakurahunghung kiya kili yiy, ara yiy ara kopu; akambultuwe tahatini yiy.” 49 Pe Yutas iya mwonen iya kili Yesu pe irawulohani yiy, ipa, “Yoping, Ndramat para Hinonou!” Pwen irahunghung iya kili yiy.

50 Pe Yesu isomwi yiy, ipa, “Kowase, ambusi tesah mepo asa iya aliy.” Pwen hu ndramat ara, huhulun husa kili Yesu, pe hupwahatini yiy, pe humbultuwe tahatini yiy.

51 Pwen o, susuya Yesu hamou, ara niman iya semela pahun tan, pe iluwiy isa ngawan, pe isondriti ndrainga ndramat para pwandrendres ta pris ihohin ta hu pris masih kene, ara imut.

52 Pe Yesu ipwai iya kili yiy, ipa, “Aiki semelam kimui kiya nokun. Paratesah, hu mepo hupo pahun iya semen, ara andre hu kamat kiya semen. 53 Wou akowu tehe ulahiy para kuyoh kiya kili Tomo, pe kihilingi yo, pe porosih o, andre kipwandrisa hu angelou soyon mepo ndromwoyahu iramwaitini mapuandrtingui pe lupou (72,000),‡Eng: twelve legions ndre? 54 Hapeko kapa kumbusiy tehen tora, pwen Nongan Haiyan ta Ngindrai mepo kinpwai tehe andre kirayah tehen toro, ara andre kirayah mannan tapeh?”

55 Pwen Yesu ipwai iya kili hu ndramat soyon iya, ipa, “Yo ngara kuya mu kili hu ndramat para kangas marapahun, pwen pe wawu sa iyapolo hu semela pahun niwen, pe hu parakei para kasa mbultuwe yo, ndre? Lang masih ngara kurompwan nondriya kowa yumwa totohun namandran, pe ngara kuro hinuwani hu ndramat, pe wawu kansa mbultuwe tahatini yo pwi. 56 Hapeko hu melit masih aro, ara irayah para hu nongna hu poropet mepo kantatuluwiy, ara karayah mannan.” Pwen hu ndramira Yesu ara hutali yiy pe huwop topwei.

57 Pwen yihu mepo humbultuwe tahatini Yesu, ara huwiri yiy iya suwe Kayapas, yiy pris ihohin ta hu pris masih kene. Pe hu ndramat para hinuwani nongan para pwahanou, pe hu yapane kol, ara hu kansa rawurehu pwen huro aliy. 58 Pe Pita, ara iho ndruwa Yesu, hapeko iho ndron mwanan hape. Pe iya tusuye iya kowa yumwa pris ihohin. Pwen isong iya nondriyan, pe impwan iyapolo hu makundrayin, para kinime tesah nakirayah.

59 Pe hu pris huhohin ta hu pris masih, iyasura hu Sanhetrin masih tahu Yutah, ara huro ten lohongai pwasoyou iya tesah Yesu kinmbusiy; pwen pe tunan ara ko, andre hu kalahiy para katingundrun kimat. 60 Pe konan hu ndramat soyon para tasusut nongan pwasoyou iya kili Yesu, ara husa, hapeko yihu Sanhetrin, ara huten lohongai ndrit.

Pwen iyamulan hilu ndramat malmou hilsa, 61 pe hilpa, “Ndramat aro ipa, ‘Yo ulahiy para kuloiwani yumwa totohun namandran ta Ngindrai, pe kiho nondriya lang maroyoh o, andre kupuliy paiwe.’ ”

62 Pwen pris ihohin ta hu pris masih kene, ara itine pe ipwai iya kili Yesu, ipa, “Wou andre asomwiy, ndre pwi? Aripo sehe titiye mepo hu ndramat aro topo ratuni wou iya aliy?” 63 Hapeko Yesu ihun o iro.

Pwen pris ihohin ta hu pris masih kene, ara ipwai iya kili yiy, ipa, “Yo upwatisingiy isa kili wou, para arandrangan kiya ngala Ngindrai mwalen—kiya, apwai ndrokonan kisa kili yowu, wou ara Mesayah, Noru Ngindrai Kamai, ndre pwi?”

64 Pe Yesu isomwi yiy, ipa, “Tehe anpwai ara. Hapeko upwai isa kili wawu masih kene toro: Lang itapo isa kamulan, wawu andre kanime Noru Ndramat kirompwan kiyapwen te nima Ngindrai mot, mepo yiy Pwokeyan Masih, pe andre kisa kiho ndrita hu kokom para yang.”

65 Pwen pris ihohin ta hu pris masih kene, ara ile koiwen pe, ipa, “Yiy kinpwasisiman ana Ngindrai! Paratesah andre tukaten hu ndramat para kapwokeyani nongan i? Akanimei! Wawu kanhilingiy mahapo tehe kinpwasisiman ana Ngindrai. 66 Wawu lohonganiy tapeh?”

Pe husomwiy, hupa, “Yiy ilahiy para kimat kiya nongnan ara.”

67 Pwen husokombunuhi mbulmaran, pe hu hukuwani mbutimahu pe hurayi yiy iya aliy. Pe hayah tahu, ara huhusili yiy. 68 Pe hupa, “Mesayah, kapa wou poropet hamou, pwen apwai: hiyeh iripo rayi wou eh?”

69 Pwen Pita iyempwan ngawan, nondriya kowa suwe pris ihohin, pe pihin hamou para poya mbulen isa kili yiy, pe ipa, “Wou aro sura Yesu para Kaliliyy yi.”

70 Hapeko Pita ipwasarahaniy iro mbulmarahu masih, ipa, “Ukowu sehe nongan atapwai.”

71 Pwen pe iyau iya poho mara karam para kowa seu ara, pe pihin hamou i inime yiy pe ipwai iya kili hu ndramat huro ara, ipa, “Ndramat aro ara iro sura Yesu para Nasaret.”

72 Pe Pita irandrangan pe ipwasarahaniy paiwe, ipa, “Yo ukowu ta ndramat ara.”

73 Iyamulan hape yi, yihu mepo huro tine ara, ara huya kili Pita, pe hupa, “Pe wou ara hamou tahu yi, paratesah, mbulukoyum, ara iyingani wou.”

74 Pwen iten anan pe irandrangan iya kili hu, ipa, “Yo ukowu ta ndramat ara!” Pe hape pwi ko, tutut irang.

75 Pwen Pita ilohongani nongna Yesu mepo kinpwai, kinpa, “Tutut kintang mapu, andre apwai maporotisap tehe akowu to.” Pwen iyau iya ngawan pe iya rang turuwe yiy.