4
Ndrohonoku pwanpwan ta King Ngindrai ita kol paingan yang
1 Pe iya mulan para hu melit aro, unime papai sih isoho tine pe iro te mbulmoro nondriya kol paingan yang! Pe uhilingi mbulukoyu ndramat mepo kinwong sato iho mu tehe ndrah sih, ara ipa, “Asa paingan iye, pe andre kuyingani tesah mepo andre kirayah kamulan para melit aro.” 2 Pe indrou pwi ko, Mwoiwan Haiyan isa ndrito, pe unime ndrohonoku pwanpwan sih ta king iro tine kol paingan yang, pe hamou irompwan aliy. 3 Pe hamou mepo irompwan aliy, ara ngannganan iya pe kaipisan ara tehe pat yaspar pe pat karniliyan. Pe mwolou sih nimnim para aliy pakimbus tehe pat hemeral, ara irakaiyani ndrohonoku pwanpwan ara. 4 Pe hu ndrohonoku pwanpwan ta hu king lungui pe haahiu, ara hurakaiyani ndrohonoku pwanpwan ta king ara. Pe hu pohon lungui pe haamou, ara huro mipwan hu ndrohonoku pwanpwan ara. Pe hu kansuluye hu kinna hu koyau pallen ma hu kasapai kolt ta king, ara iye paya hu. 5 Pe kamit iro kamiriy iyau ndrohonoku pwanpwan ta king, ara iyapolo hu nguluwa hu melit, pe palan iro talon ihou pe ihou. Pe sui anandrtoyoh mepo mwan iroholulun aliy, ara huro tine mbulmara ndrohonoku pwanpwan ta king ara. Hu sui anandrtoyoh ara, ara hu mwoiwa Ngindrai anandrtimou.*Mwoiwa Ngindrai manandrtimou ara iyingani Mwoiwan Haiyan opu. 6 Pe iro pohomara ndrohonoku pwanpwan ta king ara, ara tehe ndras kamarai hakah iro aliy, lewen pe iyih iya.
Pe hu kan mwalen mahaamou, ara huro ndrokolon pe hurakaiyani ndrohonoku pwanpwan ta king ara, pe mara hu iramburuhiy mandrahu masih iya mu pe iyamulan i.
7 Kan mwalen iho mu, ara tehe layon hamou, pe iho mulan ara tehe mbulmwakau hamou, pe iho mulan hape, ara mbulmaran tehe ndramat hamou, pe iho mulan masih, ara tehe manuwai hamou iho woh. 8 Hu kan mwalen mahaamou ara, ara hamou-hamou tahu ma kapene hu mannopai, pe marahu ara iramburihi mandrakuyuhu masih, pe irakayaniy, pe pahandra kapenehu tehen aliy i. Lang pe ping ara ngara hu koropa toro:
“Haiyan, haiyan, haiyan
ara Yapan Ngindrai Pwokeyan,
mepo para koluw, para mahapo, pe andre kimui kisa.”
9 Pe kiro mwonen hu kan mwalen ara hu kahari ngala Ngindrai, pe hu kapwesani yiy, pe hu karawulohani yiy mepo itampwan ndrohonoku pwanpwan ta king mepo ita mwalen kinto pe kinto, 10 pwen hu pohon lungui pe haamou ara hutukuruhu iya mbulmara Ndramat mepo itampwan ndrohonoku pwanpwan ta king, pe hu totohun iya atan mepo ita mwalen kinto pe kinto. Pe huiki hu kasapai tahu huya pwan mbulmara ndrohonoku pwanpwan ta king, pe hupa,
11 “Yapan pe Ngindrai towu,
wou ara haiyan
para kahari ngalam,
pe kahaiyani ngalam pe pwoke ara atam,
paratesah, amangsani hu melit masih,
pe iyau namiliwam pwokeyan opu, anmangsani hu
pe hu topo mwalen.”