1 Pwen angelou yimou ira ndrah tan, pe unime piriy sih iho yang pe iyos isapwan kol pwan. Pe huiki ki iya kili piriy ara para kitipe papai para ngat mbulun pwi. 2 Pe iro mwonen itipe ngat mbulun pwi, kosumwan ara mambuniyan iro tunam aliy isa ngawan tehe kosumwono mwan namandran pe namandran masih. Mwandrai pe yang ara ilokuh iya kosumwono mwan para ngat mbulun pwi ara. 3 Pwen hu kosi huyau kosumwan husa ngawan ndrita kol pwan. Pe Ngindrai kiniyki pwoke kinna kili hu tehe pwoke ta hu supwalngai para kisikipiri hu ndramat para kol pwan. 4 Pe huiki nongan pwokeyan iya kili hu para mbuna hu kapwalngani ndromndriu para kol pwan, ndre sehe melit salau pe hu kei. Hapeko hu kosi andre hu kapwalngani hu ndramat mepo kinima Ngindrai kinto hu kombuye hu pwi. 5 Pe Ngindrai kinpa hiyan para hu katingundruhu pwi, hapeko para hu kosi kaiki nopwaran kiya kili hu ndramat kiho nondriya walah mayimah. Ngandran hu hingorowei, ara tehe supwalngai hamou isikipiri sangi ndramat hamou. 6 Kiro mwonen hu lang ara, hu ndramat andre hu katen sai para kamat, hapeko andre hu kanlahiy pwi. Ndriya hu andre kinamili kimat, hapeko kimat andre kiwop tahu.

7 Pe mwense hu kosi, ara tehe hu hos hu mwanye hu para pahun. Pe iye ndrita payahu, ara hu kasapai mbusiy iyau kolt, pe hu mbulmarahu ara tehe mbulmara hu ndramat. 8 Pe kompayahu ara tehe kompayahu pihin, pe yahahu ara tehe yaha layon. 9 Pe winerehu ara melit handra tehe hayen iro aliy, pe ngasa kapenehu ara tehe ngasa-ngasa karis iya polo hos soyo-soyon huro ngap iya harong nakaya popahun. 10 Pe yihu, ara ma ndrakuwihu pe ngara kasikipiri ndramat tehe supwalngai, pe pwoke iro kili hu para ndrakuwihu kiyki ngandran namandran iya kiya kili hu ndramat nondriya walah mayimah. 11 Pe yihu ara ma king hamou iho mu tahu; yiy ara angelou para ngat mbulun pwi, pe ngalan iya nongna kol Hipuruw ara Apatton, pe iya nongna kol Krik ara Apolliyon (ngalan ara, ara ndramat para pwalngani).

12 Nopwaran hasap kinsa hapwen. Pe nopwaran lusap i andre kisarayah kamulan.

13 Pwen angelou annomou ira ndrah tan, pe uhilingi yoholai isapwen ndrosu*ndrosu sese pere tuntun mahaasai ara, ara tehe ndrosuwa mbulmwakau mendreheh mahaapai para pere tuntun hu mbusiy iyau kolt, mepo iro mbulmara Ngindrai. 14 Pe yoholai ara ipwai iya kili angelou annomou mepo iro mbultuwe ndrah, ara ipa, “Atali hu angelou mahaamou mepo huwasi hu tora ndran namandran Yuprates.” 15 Pwen hu angelou mahaamou mepo wasi hu para kirahihini lang pe paramwandrai, pe walah, pe hayou, ara tali hu para hu katingundru hu ndramat hasap para matisap ta ndramat. 16 Pe uhilingi ndromwoyahu ndramat para pahun, ara pulungat para pwesih (200 million).

17 Pe unime hu hos pe hu ndramat para ngaplaniy iho nondriya taltan to, ara toro: Pe hayen iro winerehu, ara laman, mwaron pe nonguwan tehe sakai. Pe paya hu hos, ara mwensen tehe hu paya layon, pe iyau hu pohohu ara mwan, kosumwan pe sakai. 18 Pe hu ndramat hapat para matipat, ara humat iya nopwaran mwomwan maporotisap, nopwaran para mwan pe kosumwan pe sakai mepo iyau poho hu hos. 19 Pe pwoke tahu hos ara, ara iro hu poho hu, pe iro hu ndrakuwihu. Pe ndrakuwihu, ara tehe hu mwat mepo mapayahu, pe huroiki ngandran. 20 Pe hu ndramat masih mepo hu kanmat kinna hu ngandran mwomwan iye pwi, ara huro, hapeko hu kantapaiwani ndriya hu kinna hu melit humbusiy iyau nimahu pwi. Pe hu kaningoh totohun iya kili hu payit, pe hu nombungong humbusiy iyau kolt, pe siliwa, pe paras, pe pat, pe hu nombungong humbusiy iyau kei, mepo hukonho nimnim, ndre konho tahilong, ndre karikai pwi. 21 Pe hu kantapaiwani ndriya hu kinna hu kultuw tahu para tingundru ndramat, pe hu paira ngah tahu, pe hu kultuw para pilah, pe hu kultuw para pahana, ara pwi.