15
Hu angelou manandrtimou iyapolo hu ngandran mwomwan manandrtoyoh
1 Pwen unime ndraikiya kaipisa melit handra namandran pe mwayih iya iro kol paingan yang: Hu angelou manandrtimou hu mbultuwe hipwen para hu nopwaran mwomwan manandrtoyoh. Paratesah, hu nopwaran manandrtoyoh kisayau, pwen andre ndrinalokuh ta Ngindrai kihipwen. 2 Pe unime ndras kamarai sulyaniy iyapolo mwan, pe hu mepo pwoke tahu kintamwaitini kan namandran pe huramwaitini kerewek tan, pe huramwaitini kiniman, ara huro tine ngilse ndras pe humbultuwe kuwah mepo Ngindrai kiniykiy kinna kili hu. 3 Pe hu powaliy iya waliya Mose, ndramat para poya mbulya Ngindrai, pe waliy ata Noru Sipsip ipa:
“Namandran pe mwayih iya ara mbulyam,
Yapan Ngindrai Pwokeyan Masih.
Kultuwayim imwonen pe hu sayam ara ndrokonan,
King ta hu ndraye ndramat masih.
4 O Yapan, hiyeh andre kinnoh tam pwi,
pe andre kinhiri ngalam pwi?
Paratesah, wou opu ara haiyan.
Hu kol namandran masih andre kasa
pe katotohun kiro mbulmaram,
Paratesah, hu kultuwayim imwonen, ara anpwainganiy.”
5 Pe iya mulan para melit aro, unime yumwa totohun namandran mepo yopai para Titiye para Tapaniu, ara ite iro kol paingan yang. 6 Pe hu angelou manandrtimou ara huyau yumwa totohun namandran ara husa ngawan iyapolo hu nopwaran mwomwan manandrtoyoh. Hu kansuluye hu iya koyau howen pe pipiryan, pe huwasi hu kondrei kolt irakayani hu winerehu. 7 Pwen hamou ta hu kan mahaamou mwalen ara, ara iyki pwelekei kolt manandrtoyoh ipep iya ndrinalokuh ta Ngindrai, mepo andre kiro mwalen kinto pe kinto, iya kili hu angelou manandrtimou. 8 Pe yumwa totohun namandran ara ipep iya kosumwono nganngana Ngindrai pipiryan pe pwoke tan, pe hamou kinlahi para kiya nondriya yumwa totohun namandran ara pwi, kipoo hu nopwaran mwomwan manandrtoyoh ta hu angelou manandrtimou, ara kihipwen.