EKS
Ekson Vuak Amur
Ruk e iji buk Ruk isoinma ijar madu una buk igi isoin. Fu isoime izeg e Jesuon vuak faivo iji bu Kaven Akai ijar oibuon ijia arimga bu amur uri vuak ma iji abe Jerusarem ijia kuardiame ar iror ijia kuardiaoinva ijin isoin. Jesuon if ijia e afasor iji bu uri ire uruvana ka ma sumakin iji Kaven Akai ijefuon daro ijia reoknum anf kafokafo reoin. Bu ijegreoijga e uruvana ar kafokafo ijia karioinva iji bu uri Jesu ma vierafen. Regavo e iji amur Jesuon vuak ma iji abe kuaimoinma iji Fita. Regavo ura Fita jainma iji Firif rega ura Firif jainma iji fu For ga uviaifijaf Jesu ma vierafenva ijieb usem ar kafokafo ijia Jesuon vuak abe kuardiaoin. Regavo amur bu e Jius ijesugin nijaidiain. Regavo rad God fu kia ni uri vuak ma iji abe una e Jius bakin iji kuardiaga buk ma vierafejno kiain.
Ekson vuak kafokafo ijin
1:1-26 Godon Kaven fu ruakfuon iji samuakfuon ijin.
2:1-13 Kaven Akai iji fu ruainma ijefuon vuak ijin.
2:14–8:3 Jerusarem ijia vuak ma iji abe kuardiainva ijefuon vuak ijin.
8:4–12:25 Ar Judia ga Sameria ijia vuak ma iji abe kuaimoinva ijefuon vuak ijin.
13:1–21:16 For fu Godon vuak ma iji abe ar iror ijia e uruvana kuardiaoinma ijin.
21:17–28:31 For bu abe mai Jerusarem ga Sesaria ga Rom ijia dibur unako fu dibur fioinma ijefuon vuak ijin.
1
1-2 Tiofiras buk nun iji na amur isoinva iji na ire fok Jesu fu renma ijiga nijaidiainma iji isoin. Fu amur ikre vake uri varur gufia ajie vainma ijefuon vuak igi na iji isoin. Jesu fu Godon Kaven duadok ijia fu e afasor fuon bu vuak fuon faime una e roin kuardiavo iji bu izegrekfuon iji kuardiame fu uri varur gufia ajie vain. Fu guame una urin gavo tavan foti (40) ijeg fu vajai fuon abe e vuak fuon faivo iji nijaidiaoin. Fu uri ka samakaf nijaidiamga bu game ma vierafero fu una urinmaro bu ijeg vierafen. Regavo tavan ijia fu uri God fu una efuon ijiebuon oij iji samuagdiakfuon ijefuon vuak iji nijaidiain. Bu una besum afuivga fu uri vuak kuardiame kia, Jab ar Jerusarem arek. Regavo vuak na amur kuardiainva iji vierafene janika ijia karine ire iji Asoinun fu nijiakro kiainma iji samuaf. Ijefuon maiji Jon fu do ijesugin ja ruardiav revo iviakma igi God fu Kaven fuon uniafdiakno kiain.
Jesu fu varur ijia ajie vainma ijin
E afasor iji bu una besum karinva ijia bu uri Jesu kua, E Bomana abe iviakma no karaunuome ar nuvuon Isrer abe una muoga no koiknuvuon samuak? Rega Jesu fu kia, Ja ivez ire iji rekfuon iji jab vierafejo revo fun Asoinun e ka darokin ijar fuonkua vierafenmano kiain. Regavo Godon Kaven fu oijon ijia arikma ja ijia daro abene vuak nun iji amarigia e nijaidiak. Ja e Jerusaremko ijiga e Judiako ijiga e Sameriako ijiga e ar iror ijia karioinva iji nijaidiaok. Fu ijeg kuardia bu nikajako ijia fun ajie vako vana ijar fu abe utime vako buba una gain.
10 Fu vako bu varur gufia nikajako ijia migegare e nokarok (2) ugon abar sainva ijieb bum ijia buna iren. 11 Bu ijia ireme uri kia, E Gareriko gurie ja irerafuon ijia irem varur gufia nisaiv? Igi iviakma Jesu fu varur gufia ajie vaka ja gainva ijeg fu una roga ja gakno kiain.
Mataias fu Judason ar abenma ijin
12 Areme e afasor ijiga e roin Jesuon vuak faivo iji bu uruo Orivs iji areme una unam samaij ijefuon Jerusarem vain. 13 Bu Jerusarem useme gire be bu karijo ijia ajie vain. Regavo e iji ijia vainva iji Fita ga Jon ga Jeims ga Edru ga Firif ga Tomas ga Batoromiu ga Metiu ga Afiason farif e Jeims ga Saimon e mamkanuk ijiena musikuaimo ijiga Jeimson farif Judas ijieb ijia vain. 14 Regavo tavan bog bu una besum afuime Godon sirimamejo bara roin ga Meri Jesuon asiej ijigam Jesuon uviaifijaf iji bu buna besum afuime Godon sirimamej.
15-16 Naki sibank barekoga e fok vuan adred tuenti (120) Jesu mukoi vierafejo bu una besum afuiko Fita fu vuak kuardiakafa uri kia, Efnun Godon vuak bu usuibe isoinva fuka ma riaren. Regavo vuak iji fu usuibe Godon Kaven ijar Devidon ir ijia kuainma iji izeg Judas fu e ani ijiebuon unam amarega bu Jesu tokfuon. 17 Regavo e iji fun Jesur abenma ijefuon fu nona ik ren. 18 Regavo mon iji Judas fu unam ise ijia abenma iji fu abe moik be kimen. Regavo moik iji fu kimenma iji fu ijia ari kanamga fu detavuame guain. 19 Rega e fok ar Jerusarem ijia karinva bu vuak iji faime uri vua buonak ar iji abe ime kua Akerdamno kuain. Regavo Akerdama ijefuon maiji Ar Kavuan Arimon. 20 Regavo vuak iji bu buk Sams ijia ijeg isoi,
Ar fuon iji e be fuba ijia fikno kuain.
Regavo vuak be bu madu ijeg isoi,
E be fuka ik fuon fu reno iji abekno kuain.
21 Ijefuon e be fuka nona rene Jesuon vuak iji fu guame una urinma iji abe e roin kuardiakfuon. 22 Regavo e iji fu tavan fok nona Jesu jaoinma iji ga ik anej ijia Jon fu e nijaidiaknum do ruardiainma iji game roke Jesu fu varur gufia ajie vaka fu gainma no e ijin abekno kiain.
23 Ijefuon bu e nokarok (2) be fu if nokbek (3) Josof Basabas ga Jastas kuavo iji abega e be if fuon Mataias ijin aben. 24-25 Bu e iji kege Godon sirimamene kua, E bomana a e fok ijiebuon oij iji ar giamon ijefuon e nokarok (2) igi giame e a vierafenma iji nijaiduomne. E Judas fu vuak on abe oinon ijia fu ik fuon iji areme ar fu vakfuon ijia vainmano ni erar fu ar fuon abekfuon iji nijaiduomne kuain. 26 Rene bu if buon isoime ke kaf gufia korva Mataiason if ijar amur arimga bu fu abe una e ireven (11) Jesu jaoijo ijiena mazin.