2
Jesu Kurais fu adumaduigin kegoinma iji mimataf
Ja Jesu Kurais ma vierafejo ijefuon Kurais fu ja daro miame oijmiame ja samuagdiako ja afuime karioij. Regavo jan Godon Kaven ijiena besum rene oijmanamiknum jon ifenamikuai vierafene rej. Regavo ja unam ma iji jan rej ijefuon na ja ejafiame kia, Ire roin na oimarkfuon iji ja oi besum rene vo nigen besum vierafene besum oijmanamiv vo tavan bog ifenamikfuon. Regavo jab uri ka aroikarame jonkua vierafeogavo e roin jab giame arek. Regavo ni isuar oi mafaime buna besum ganamime ifenamiknum kariof. Regavo jab jonkua ik jon ja rejo ijesugin vierafegavo nika e roin vierafeknum vo izeg ja bu ifejdiakfuon iji vierafef. Regavo oijon iji ka izeg Jesu Kurais fu vierafene kegoinma ijeg jak vierafene keof. Regavo Jesu fu kegoinma iji fu ijeg keoin.
Fuiji fu God ga bu busik buka besum ga fuba una asoifuok ar kaf iji bu karinva ijia fikafa vierafen. Regavo fum uri ire iji fu asoifuok samuagdiamo fok fuka nuigafiain. Fuka koikfuon una am ukakbe rene una ema igeg moikigia nafen. Regavo fu ema igegrene e fok igiebuon ikreoin. God fu vierafe Jesu fu guak ijefuon Jesu fu adumaduigin Asoi fuon igame vuak fu kuardainma iji rene vake bu dab kuros ijia kanava fu guain. Fu guamga Godri kuama fu una urinma ijefuon fu dab aroime abe ka ar ma kaf ijia unain. Regavo fu madu if iji ka e fok ijiebuon if asidiainma iji abe fu main. 10 Regavo unam iji fun Godri vierafene amarenma ijefuon kaven fok kaf gufia karinva iji ga e fok moikigia ga aoime zuarunam karinva fok bu Jesuon if dab aroikafak. 11 Bu aroikafaknum sirimamene kuaiv Jesu Kurais fu ma E Bomana nuvuono kuaiv. Bu ijeg kuavo ijia buka God Asoij iji dab aroiv.
Godon e iji jaka veni igeg moik fok sanaf
12 Ijefuon efnun Jesu Kurais fu asoifuon igainma ijeg na ijia jana fiko ja God igain. Regavo iviakma igi na ja uniame ruainva ijia nika God mukorigia igaf. Nika God agoiknum giriesame unam iji God oimaikfuon ijesugin ikrene vake barga ijar ja karauniak. 13 Ijefuon maiji fun Godri koikfuon oijon ijia ikreno ijefuon ja tavan bog irerag fu vierafe ja rekfuon ja ijin reoij.
14 Regavo ik fuon fok ja rekva jab vuak kafo ijefuon kuaiknum vo ik ijefuon musikuaiknum ikrek. 15-16 Ja ijegrekva iji jaka maturaime ok ga e buba ise kafo kege una ja namdiak. Regavo madu jaka maturaime Godon afijaf ijegreoga e iji tavan uruvana oi moik igefuon ise ijesugin reokuai vierafejo iji bu ja giak. Regavo jaka ikuosaij iji no kege nakinma ijia sana vako ijeg ja e ise rejo ijiebuon kafar ijia karikva iji ja ikuosaij ijeg sanaknum Godon vuak ma iji bu karauniakfuon iji nijaidiaf. Ja ijegrekva na ma ijefuon na tavan iji Jesu Kurais fu una roko ijia na joifuon aroikarak. Ijefuon maiji daro nun fok na akozme ik iji na renva iji fuba nisen.
17-18 Regavo jon ja ma vierafejo ijiga ik iji ja Godon rejo iji ja Godon isuf baroijo ijekin. Regavo bu na kaniebatie kavuan nun usekfuon ijar isuf jon ja baroinva iji fu ijar akum ijeg misoiga God fu oimaikfuon. Regavo na joifuon guakva iji naka nun na oimarvo iji jana ivajuinamik. Regavo jak na joifuon guakva iji jaka ijefuon nana besum oimarkfuon. Ijefuon maiji isuf nuvuon no baroinva iji God fun game oimaren.
Timoti ko Ifafrodaitas ijiebuon vuak ijin
19 Regavo na vierafe naka Timoti kua fu vua ja giak revo iji fu E Bomana ijar ijeg vierafekma na kua fu vuak. Fu vuakma fur vuak jon izeg ja karijo ijin giame una ro kuardie na faikva na oimadiek. 20 E iji fu nosik oi besum rene noka bomana joifuon rej. 21 Regavo e uruvana roin bu una buon bu oimardiakfuon ijin reoijgavo Jesu Kuraison ik iji bu rega fu oimaikfuon iji bu vierafejo bakin. 22 Regavo e igi Timoti fu e ma ga fur ka am iji fu asoifuon ifejdamo ijeg fur ifejdiema na Godon vuak ma iji abe e roin nijaidiain. 23 Na vierafe fu vuakfuon revo na samuaga e bomana akai samuamo iji fu vuak nun izeg kuaiga na game son Timoti kuaga fu vuak. 24 Regavo na E Bomana ijar ijeg vierafe miekma nason rad koiknu vua giak.
25 Regavo e be Ifafrodaitas iji uviainuvuon God ma vierafeno ga fu nosik besum Godon vuak ma iji abe e roin nijaidiamon. Regavo madu fuka nosik daromene Godon vuak ma ijefuon mafaime e roina musikuaimon. Regavo madu fur afikin roin nun roko iji kafo fur dasumdiemon. E iji ja kariga kuava fu igi na fijo igia vo jon fateroin ijia ifejdiemo iji kuaga fu ja giak vuakro na iji vierafen. 26 Regavo e iji fuka ja giakafa uruvana vierafen. Regavo madu fuka uruvana oifiaim ijefuon maiji ja adam bomana iji fu abenma iji jan fain. 27 Regavo iji fuka ma Ifafrodaitas fu adam bomana abene fuka guain gavo Godri ifejdainma ijefuon fu una urin. Regavo God fu Ifafrodaitas fuonkua ifejdainma bakin gavo fu madu nak ifejdien ijefuon maiji fu guainbatie naka bomana oifiadiek.
28 Ijefuon na vierafe naka fu kuaga fu una vuaga ja una fu ga fu oimadiakega oifian nun fok fu barek. 29-30 Regavo na kua fu una ja giak vuakma ni Jesuon if ijia fu oimardaknum afef. Regavo e fu aikin ijin arordiame oimarknum aferdiaf. Ijefuon maiji fuka Kuraison ikrene fuka guainma ijia ga fu una urin. Regavo madu izeg jar na ifejdiekuai vierafejo iji fur jon fateroin ijia uri ifejdieme Kuraison ik ren.