1 Eto god sokova amita degi indari ikagora amo ungotenanena indorote mane indoro amita ke amo aisona te ungo ke erevi kivujo, eto embo ta degi kiari te osa arite iresuja amo javotoho rate osa ari irae kiari pere amo ‘Na, na,’ aisuja. 2 Eto embo amina, “Na kiari embo ra,” ainge aisuja te ari tapa amo kiaera, 3 eto God osa aisuja embo amo God na ere kogua. 4 Ke avo hotembihe indari god sokova amita degi ikagora amo indorote mane indoro avo ano ingivujo, eto embo na god ingeni na ove eto god ke eagora amo be ambura te God vahai avo mihia 5 eto enda tapa embomeni enda ta god sokova javo neite neite avo ‘Bada’ ke ijie jakeka eagora, rate god aingeko uhuta eto enda ta iraehera 6 amo God vahai donda tapa amita Mamo avo ungotenane ke be ahera, eto donda tapa amita degi puvuna amo amita degi iragora. Eto ungotenau Bada Iesu Keriso vahai avo mihia eto donda tapa amo amita degi puvuna avoeto ungotena amita degi vasiri humbagora. 7 Eto ke erena emo embo neite neite na kiaera te enana na God sokova avo mahu hamo ari avoeto ekalesia ta horari mihera amina indari god sokova amita hande ikari avo indie enana ta jo ta jopapa ue joru eagora. 8 Eto indari amina au mane God ta degi huresora, avoeto indari avo indesora eto toasora amo sapura rete javotoho amo mane puvuresuja. 9 Eto ungo God ta ke erevi humbuto sovera ari embopo indari sio indie mihirovo ungo ke be ingito kogo ae avoeto sovera irae embopo amina kito jopapa te tapa indie sapura ta veasora avo ungo be kivujo. 10 Eto ke erena emo ungo Keriso ta ke ingari embopo avoeto indari sio indagova avoeto ungota embo vahai na god sokova ta bande ta horeto namei kamei ga indari indirou embo eha jo suruha embo amo ari no avo kito “Namote tapa indesona,” ainge eto indesuja amo sapura ta veasuja amo ari no amina au veasuja avoeto be kivujo. 11 Eto Keriso na umote no namei te tapa humbau amita toho aja pehena 12 rate no kiari amina ehe no namei sapura ere ua amo no namei pere mane rate Keriso ta degi ari sapura ere oa. 13 Avoeto nau namei na kito sapura ta veaguja amina do ajirekari avo mane indesona te ajireketo mihima sari aisona.