1 Eto nau namei kamei, God na enda Macedonia ta ekalesia ta hondate ari isapamane ikehija avo ungo ano ingova uje ereona. 2 Amo enana ta degi memesi peni vahai be puvuna amita mine amo osa ari peni vahai be pajina avoeto enana amo haja vaja embo mane rate hande embopo ere ora. 3 Avoeto God ta tihi ta erena amo enana hande ikari haite donda avo pere ikae rate nei amita hamota avo jo tapa na hande ikihara 4 amo enana ta uje na God ta embomeni hondate aisi dagota degi penunu kaiketo ijiera 5 eto amita tutumota amo enana ta hamo te tapa God ta degi ikihe amita pure asi dagota degi ikihara avo dago kito kore uera.

6 Eto enana ta ari avo kito ungotetapa na hondate ari ikavote avo kesi Titus ikaro pambuto ungota degi pure jua mahu ihikihaja avo au irae aisuja. 7 Eto na kogona amo ungota degi ari tapa inono mihia, amo God humota ari, ke hande ari, ke kiari, jo tapa na hondate ari, dagota degi osa ari te tapa amo ungota degi inono bera avoeto ungona hande erevi jo te tapa na ikava uje ere ora. 8 Eto ari erevi ungona ava ke ngahia na ae rate enana enda Macedonia ta hande embomeni ta ari vahai aingeko amo ungona osa arina avote avo be kesi uje ere ona. 9 Eto Bada Iesu ta ari avo be hotembevujo, amina uhu i ta mihie hajae vajae embo be ena te ari avo toto enda ta veto ungoembo hoivo ena, amo ungona aita donda embo ava ena. 10 Eto ari ainge avo ungona ava oje kahihe erena eto jua mahu ta ungona kihi hande ikasi ijieva avo ikiheva 11 avoeto ari avo evujo inono ai, eto ungota jota heka eto hande inono ta evujo irae ai.

12 Eto ungota uje doinge ikasi hotembiheva amo aravorate ungota degi doinge mihirou kito avo kaheketo hande ikihirovo God na kito aravora aisuja. 13 Eto ungona donda ambu embopo ta degi hande pete iketo ungo be ambu ava ke ae rate ungo mine omba eto inono inono eto irova erena. 14 Amita be amo erevira, eha oroho emo ungota degi donda mihia eto enana ta degi amo donda irae avoeto osaga erekogora te ambota amo ungona osaga kogurovo enanana ungo hondate aisora, eto ari ainge aisora amina ungota irari inono inono aisuja. 15 Ke ainge amo God ta ke ta einge kajari mihia, “Eto donda be peni vahai kahumbeto umbuna embo amina donda mamo ururae eto donda be isapa kahumbena embo amina donda ambu embo ae rate inonota donda embopo ea.”

16 Eto nau hotembari peni vahai amo ungota degita mihia ainge dombo Titus ta hotembari amo ungota degi ta avo kogue God ta degi osa be ere ona. 17 Eto dagona Titus na da Corinth ta pambaja ke ijiera te amita jo tapa avo degi ungota ta avoeto jo tapa na pambasi uje ere ua. 18 Eto ungota namei vahai ikaro Titus ga pambaja ikehera amo Keriso ta duru javotoho hande ari embo avoeto ekalesia tapa na kogue jakeka eagora. 19 Eto God ta degi usasa te jakeka te pambaja donda ambu embomeni avo jo oi koro na hondate asi uje isapamane ereora, pure avo hondate ue dagoga vahaita aja ekalesia embomeni na siriketo ikea amo embo nei mane rate namei ke ehera vahai avora. 20 Eto koro peni vahai be hande ere ovora avo humbuto pambuto embota hande ikasora avo embo na simba ari sapura ke eagora. 21 Avoeto dago daingeto Bada ta tihi ta eto embota tihita ari javotoho pere aisora avoeto ke ijie nununga ere ora.

22 Eto ungo humota eaguja ungotenau namei nei amita pure amo jo tapa na tunga iketo pure uoi dago ere kogovora amite tapa ikaro pambasuja. 23 Eto ungo kogova amo Titus amo nau pure vahai embo amina ungo avoembo ungota degi pure ere ua eto ungota namei heriso ekalesia ta javo ta pure javotoho eagora amina Keriso otohu eagora. 24 Avoeto dagota humota ari te ke be ari te amo ungota degi ta avo ekalesia tapa na kito ungo ke be ara embo einge erevi ungona kito osa ue pekihe umbuvujo.