11
Paul ta ke te ahe poekari sokova embomeni amita ke te
Eto siro sapura ari embo na keko ke isapa aisona amo ungo ingovote? Eto na ere kogona amo ungo ke ano ingesova, avo ere kogona. Eto God ta hotembari vahai avo nanena hotembihe ungo amo embona pegene humbagora segigi ue mihovona. Eto ungo ekalesia amo Keriso ta kerari avoeto na kakara ta mamo aingeko eto ungo tongopa ambu teho javotoho na mihirovo nanena ungo Keriso ta degi ikasona. Eto o koso o na evohu Eve ta degi ke sokova na enu sapura ta vena ainge dombo ungo embota hotembari sasapura na aro ungota siro sapura au amo Keriso osa ari te humota ari te avo toto pambuova simba ue mihovona. Eto nanena kogona amo Iesu dagona humbuto puvua avo mane rate Iesu nei amite Ahihi dagona humbuto puvua avo mane rate ahihi nei amite eto duru javotoho hande uera avo mane rate duru nei humbuto hande eagora avo ungona ingihe aita porere mane pambuova. Eto apostle sokova ungota degi puvuto ke eagora avo embo peni, na isapa ke ainge avo nanena mane aisona eto na enana aingeko ke gamo na hande ari embo manera te nau degi ta amo God na kiari peni vahai be ikena amo ungote mihie ke hande ehene ingihava avoeto ke avo ungona ke be ari inonora.
Eto na ungota degi pambuto God ta duru javotoho hande uena amita mine na umbae ari amina ungo jigene eriheva te ainge uena amomo ari javotoho umahanete mo ari sapura umahane? Eto na ekalesia nei nei amita koro avo pegene arako eto jigama ue ungota degi pure amo uena. Eto na ungote mihie amo nau ujeje tapa do puvuna amo na ungota degi bouka nei do ikae rate ungota namei kamei enda Macedonia ta eto puvua amina na undua eto na ungota degi ombari asari ta eto bouka ikae mihovona ainge dombo bouka mane ikasona. 10 Eto Keriso ta ke be amo nau jota mihia avoeto amita hamota ke erevi erena amo enda Achaia ekalesia na ke nau erevi mane haekasora. 11 Eto na ungo osa ae avoeto koro umbae ari ke ijie hotembihevete? Na ungo osa ere ona amo God na ere kogua 12 eto ke sokova ari embopo na nau pure vahai embo ke ijie koro humbasi pure eagora avoeto na ke avo haekihe na ungota koro mane umbasona. 13 Eto embo aingeko amo apostle be mane rate pure sokova ue Keriso ta apostle ke ijie eagora 14 eto na enana ta ari avo kito jeneki honeki mane aisona te enana ta ari amo Satan na Anera usasa te ke ijie isa eaguja. 15 Avoeto amita pure ari embopo na amita ari vahai avo ue ari jajavotoho ta pure ari embopo ke ijie ke sokova na eagora. Avoeto enana ta pure eagora amita iji tutumota amo God na hana kiari ikau kesora.
Eto Paul na osaga kina ta ke
16 Eto na ke ehako erena amo na siro sapura ari ke mane aisova te siro sapura ari embo ta ke ingito ingarako uore eagora aingeko simba ururovo ke nau avo ane. 17 Eto ke nau avo “Na, na” ijirono ingesova amo Bada na mane aehija te na siro sapura ari embona keko aisona 18 amo enana apostel sokova na enda embo tapa na enana ta ari amita ke eagora aingeko nanena aisona. 19 Eto ungona dago tupo embora eagova te siro sapura ari embomeni ta ke sau be ingagova 20 amo ungo tupo embo sira ove apostel sokova na puvuto ahe poekihere ungona ke agi ue kajumba ue ke tapa avo agi ue age ungota na timbuto indarako ereova. 21 Eto dagona ungota degi kihi pambuto ke sokova na ahe poekehene ungo na na kajumba ue age ungota na timbuto indarako aheva avo nau degi ta me kiari dombo be ra. Eto na siro sapura ari embo na keko ijie ke erevi aisona amo enana na ke ijie “Na, na” eagora amo dagote tapa na ke amo “Na, na” ari inonora. 22 Eto enana amo Hebrew embopo rete? Namote tapa Hebrew embora, eto enana amo Israel embopo rete? Namote tapa Israel embora. Enana amo Abraham ta meniundi rete? Namote tapa Abraham ta menira. 23 Enana amo Keriso ta pure ari emboporete? Namote tapa Keriso ta pure ari embora te ungo ere kogova amo nau hotembari javotoho avo toto “Na, na” ijie erena te nau ari tapa amina enana dembari avoeto erena amo pure ngahia eagona eto nei amo na tipura ta ikagora eto nei amo na teore memenga kiagona eto iji nei nei amo na pehari ahumpa eagona 24 eto Judea embo na iji tapa 5 rate iji vahai vahai amita jo ta na ejembeto tea amo tapa 39 ainge toruera 25 eto iji 3 amo ituha na toruera eto iji vahai amo koro na toruera eto iji 3 amo na e nga ta pambuhone e nga teto pejeo, iji vahai amina na iji vahai mume vahai eva ta daveto pambua. 26 Eto na enda tapa ta isa eagona degi aita amo umo vuenga ta degi osaga kiagona eto degi ta embo teto pegene eagora aita osaga kiagona eto enda nau embomeni ta ingeni ta enda nei embomeni ta ingeni ta osaga kiagona eto da jota eto degita eto eva hamota pahue osaga kiagona, eto nei amo nau namei ke eagora amita degi osaga kiagona. 27 Eto nei amo na pure ngahia ue evae eagona, eto nei amo indari te umo te na beuje uoi teho mihovona eto nei amo bo ambu eto jajemote avo kiagona 28 eto ari tapa amita hamota amo iji vahai vahai ekalesia avo hotembu hotembu ue iragona, 29 eto ekalesia embo vahai na ivo ambu eaguja amo na osaga kiagona, eto embo vahai na engekari ta veaguja amo na osaga kiagona.
30 Eto na “Na, na” asona amo nau sovera ta ke avo mane aisona te ivo ambu ta ari avo ungo na kiagova ari vahai erevi aisona. 31 Eto ke erevi aisona amo ke be pere avo Bada Iesu ta Mamo God daroho jakeka aisora amina ere kogua avoeto ke emo ke be pere erena. 32 Eto na da Damascus aita pambuto mihio King Aretas ta gavana na na andito humbasi amita isoro ari embopo ikenu da tapa joeketo mihio 33 nau namei kamei na na humbuto handija peni vahai aita juruketo otoho ta ikeo da arahata veto kiae pambua.