1 Eto amita ambota iji isapa Athens ta mihimihe da Corinth ta pambuto 2 Judea embo vahai javo Aquila hambuna, embo amo enda Pontus embo rate Rome ta pambuto mihahija avo Roman ta King Claudius na Judea embo tapa uje ae eto ohimbenu pahuo Aquila te amita ae Priscilla te aingeto da Corinth ta pambuto 3 Paul amita pure vahai avo hambuto horoma ari bo avo ere kakajekihie Paul enana ga pure ue mihahera. 4 Eto Paul na giu ari iji vahai vahai Judea embomeni ta God jakeka ari bande ta horeto Judea embomeni te Greek embomeni te na Iesu avo ke be hotembara ere ijiahija. 5 Eto Silas te Timothy te Macedonia ta eto puvuo Paul na pure nei do ae iji tapa Judea embomeni ta orekari embo simba ereuahera amo embo nei mane Iesu avo Judea embomeni ta degi ke hande ereuahija 6 rate embo nei uhoho na ke be mane ke eto Paul ta degi ke sapura eo Paul na bo ta oniho teterenu venu ke einge ena. “Eto ungo God uje ae eto vaine pahurovo amo hajire ikau kesova amo ujekari nau mane avoeto na ungo da Corinth ta Judea embomeni toto enda nei embomeni da Corinth ei ta mihera amita degi ke asona.” 7 ainge eto toto da nei embo javo Titius Justus God jakeka ere ijiahija amita bande Judea embomeni ta God jakeka ari bande amita engihi ai ta mihahera. 8 Eto Judea ta jakeka bande ta tihi jigari embo javo Crispus te amita jo vahai ta veari embomeni te ainge eto Bada ke be ere ijiahera. Eto da Corinth embo isapamane na God ta ke ingito be hotembeto bapataito ere uahera. 9 Eto mume vahai Bada na puvuto ehure ta Paul ta degi ke einge ena, “Na umote iresona avo eto umo mane joru asoa eto mane pure toasoa te embomeni ta degi ke ejo ingore. 10 Eto da Corinth ei ta nau embomeni isapamane mihera avoeto embo nei na no hamo ta memenga mane ikasora.” ainge enu 11 Paul na jua vahai eto huna ainge da ai ta God ta ke embomeni ta degi ahe ere poekihahija. 12 Eto Rome gavana na embo Gallio enda Greek tihi jigoja ikeo hetenu Judea embomeni na vahaita eto Paul humbuto pambuto court ta ikeo Gallio ta tihi ta hetenu 13 ke einge ea, “Embo emina dagota ke pepeni agi ae God nei avo jakeka ara ahe ere poekihia.” ainge eo 14 Paul na ke ihiketo asi unu Gallio na Judea embomeni ta degi ke einge ena, “Embo amina Roman embo ta ke pepeni poekahija avo na ungo ta ke uje eto oje jevito ingaehena, 15 rate amo ungo Judea embo ta ke pepeni avo eto ungo ta ke sio sao ereva avo na mane ingesona te ungo oenga sirikevu,” 16 ke ainge eto court toto ohimbenu arahata puvuto 17 embo Sosthenes amo Judea ta God jakeka ari bande ta tihi jigari embo avo Greek embomeni na humbuto tea rate Gallio ta jo ta nei do ae tona.

18 Eto Paul na amita namei kamei ga da Corinth ai iji koso pure ue mihahija God ta degi ke sovera eto ajireketo siro tona. Eto amite embo Aquila te amita ae Priscilla te aingeto e nga humbuto Syria ta pambasi ue da Cenchreae hora ta Paul na amita ajirekari iji irae enu siro tiukena, 19 eto da Ephesus ta puvuto Aquila te Priscilla te toto Judea embomeni ta giu ari bande ta pambuto enana ga ke mine ara ena. 20 Eto Judea embomeni na Paul iroja ke eo Paul na iresuja avo avora ae 21 eto ke einge ena, “God na uje au kito avo egerembeto puvuresona,” ainge eto da Ephesus toto e nga humbuto 22 da Caesarea ta pambuna eto Caesarea toto da Jerusalem pambuto ekalesia peketo da Antioch ta pambuto 23 iji isapa mihimihe enda Galatia te Phrygia te ai pambuto Iesu ta ambotani ehaha ta degi ke enu sovera ari umbua.

24 Eto da Alexandria ta Judea embo vahai javo Apollos amo ke embo eto God ta ke kajari avo kiari embo be avoeto pambuto da Ephesus ta ke hande ena. 25 Eto God na embomeni ta irari do aingeko iresora amite eto God ta ke tapa te eto Iesu ta ke te amo tapa Apollos na kiari avoeto ke tapa do kiari avo tambueto embomeni ta degi sovera eto ke ena. Rate Apollos na embo John na umo na bapataito ena avo kina rate Ahihi Otohu na bapataito ari avo kiae 26 avo eto Judea embomeni ta giu ari bande ta ke avo enu ingito Aquila te amita ae Priscilla te na Apollos humbuto bande ta pambuto God ta ke nei Apollos ingae avo eo ingina. 27 Eto Apollos na enda Greece ta pambasi unu da Ephesus ta ambotani na enda Greece ta namei kamei na hondate ari pekari ara ahari enana ta degi kajea. Eto ahari humbuto Greece enda ta puvuna eto ai God na embo ta degi hande te hotembari te ikenu ambotani ea amita degi Apollos na hondate ari javotoho ena. 28 Eto Apollos na God ta ke kajari avo kito Judea embomeni ta degi Iesu amo ungota omena ari embo avo simba ere ova ainge embo tapa ta tihi ta enu Judea embomeni ta ke mine ari irae ena.