26
Paul na King Agrippa ta degi ke ena
Eto ke ainge Festus na enu Agrippa na Paul ta degi ke einge ena, “Umo no ke tapa avo ejo ingone,” ainge enu Paul na ingeni na ahe ahe eto ke einge ena, “Oio nau King Agrippa na Judea embomeni na nau degi ta pehumba ere ora amita ke be avo no degi ta aisona avoeto na tunga javotoho be ere ona amita be amo inena Judea embomeni ta ari te ke te amo mahu kiari avoeto na ke asona avo oje jevito ingijo.
Eto na singa ta eto puvuto iji eha vasiri nau tapa avo Judea embomeni tapa na kiarira. Eto na enda nau ta eto Jerusalem ta daingeto mihahena avo enana kiarira eto na Judea embo nei uhoho javo Pharisees ga kaju ue God jakeka kaikari eagona ke avo enana kiarira te ke avo ke be asi uje ue amo mahu ahera. Eto na eha ei heteto court ere ona amita be amo God na dagota ohihi ta degi ke ena avo simba mihena ke avo ungotena Judea ta ohihi javo tapa 12 ta meniundi tapa na iji te mume te God ta ke ena avo simba ue God jakeka eagora. Eto nau king, ke be erena, eto ke avo namote tapa simba mihena avo embo Judea embomeni na na pehumba ere ora. Ungo Judea embopo ta degi erena, ke God na ungotenau ohihi ta degi ikena amo pehari embo ta degi vasiri ikaguja avo do eto ungo ke be ae eagove? Eto nanena Nazareth embo Iesu ta degi sapura be uena 10 eto Jerusalem ta pambuto sapura be uena. Na priests okokose ta degi ke humbuto Iesu ta embomeni andito tipura ta gosukihena eto teo pepehekea amo nanena aravora ijiena. 11 Eto iji isapamane God ta jakeka ari bande ta horeto Iesu ta ambotani toruena amo enana na Iesu amo ke be mane ara toruena. Na enana ta degi tumo peni vahai be ue enda nei nei ta pambuto Iesu ta ambotani jombure eto humbuhe ere toruahena.
Paul ta tunga haperekena avo enu ingia
(Acts 9:1-19; 22:6-16)
12 Ajao nau okose, na pure avo pere asi priests okokose ta degi ta ahari humbuto da Damascus ta pambuhone 13 degi orohuta iji 12 oi usasa iji ta usasa ainge mane amina joeketo kajenu 14 dago tapa enda ta veto gombuto nanena Israel embo ta ke hajire avo einge ingia, ‘Saul, Saul umo do eto nau degi ta osaga ere ikihe, umo o cow ainge no mama ta ituha kojiketo memenga ere kogoa,’ ainge enu ingito, 15 ‘Bada, umo amunure?’ ainge eo, ‘Na Iesu ra, umo nau degi ta osaga ere ikihea 16 te ereto hete. Eto na puvuto nau hondate ari embo ere humbuhona eto inena eha ere kogoa eto ambota do ano kesoa amite tapa ke hande asoa 17 eto umo Israel embomeni ta eto enda nei embomeni ta degi ikano pambasoa amo enana ta ingeni ta eto oreto umbasona. 18 Eto inena enana ta tihi hirikao mume ere kogora avo ahereketo usasa kesora eto Satan ta sovera toto God ta sovera jigama ue eto enana na be hotembihiroro enana ta ari sasapura hotembeto toto ano God ta toho aisora.’ ainge Iesu na nau degi ta enu ingia.
Paul na amita pure avo ke enu ingia
19 Avoeto nau King Agrippa uhu ta do puvunu kia avo ke agi ue 20 Damascus ta eto Jerusalem ta eto Judea ta enda tapa eto enda nei embo ta enda ta ke hande ere uahena amo enana ta ari sasapura ajato eto God ta degi egerembeto jo haperekau enanata irari nei ururoro embo nei na kito ke be eto tunga haperekari ke asora. 21 Eto na temple jo ta mihie ke avo hande uena eto Judea embo na ke avo ingari uje ae ue na humbuto taro pehana uje ea 22 rate God na iji tapa na hondate eaguja avoeto iji eha emite ungo embo te eto embo pepeni ungota degi ta ke erena. Eto na ke hande eagona amo peroveta te Moses te na mahu ere ijiahera 23 avo Judea embomeni ta Hondate Ari Embo na memenga kito peheto ehako vasiri te kihi erasuja eto ainge dombo Judea embomeni te enda nei embomeni ta degi amita oreketo humbari ke au usasa kesora,” 24 ke ainge Paul na enu embo Festus na gagaha eto, “Paul, umo pipi-konene embo avo eto no kiari peni vahai be na ehei umo pipi-konene ere oa.” ainge enu 25 Paul na ke mine einge ena, “Nau embo okose, na pipi-konene ae rate ke peni be avo ehena 26 eto King Agrippa, na ke ehena amo umo kiarira avo eto na joru ae no degi ta ke erena eto ke emo ojikari ke mane avo ehene oje hiriketo ingea avo erena. 27 King Agrippa inena peroveta ke be eagoete? Avo na kogona.” ainge enu 28 King Agrippa na ke mine einge ena, “Paul, inena na iji isapa Christian aote?” ainge enu 29 Paul na, “Iji tuho retemo koso re amo na God ta degi pari eagona amo umo te ungo tapa ke nau ere ingiheva amo na iteko Iesu ta humota ari embopo asova rate chains na pundurari aingeko manera.” ainge enu 30 King Agrippa te Governor Festus te evohu Bernice te embomeni tapa na ereto pahue 31 ke einge mine ara ea, “Eto embo emita sapura nei do irae avoeto tipura ta ikari eto tari pehari avo irae ra,” ainge eo 32 King Agrippa na Festus ta degi ke einge ena, “Embo emo Rome ta embo okose ta degi pambasi ke aehija amo mahu ikaro arahata pambaehija.” ainge ena.