1 Eto Iesu na pari enu irae enu ambotani humbuto umo Kidron embuto pambuto degi dagogotambu ai ta horea. 2 Eto degi amo Iesu na ambotani ga iji nei nei ainge aroro uoi Judas, Iesu jenge indari embo, amina ere koguahija 3 avoeto pambuto priests pepeni te Pharisee embomeni te amita isoro ari embopo te eto embo okokose nenei te avo kihi humbuto kerivo ijimbeto ki emi jigito degi ai ta pahuo 4 Iesu ta degi do ere puvutuhuna amo mahu kito Iesu na pambuto isoro embo ta tihi ta heteto ke einge ena, “Ungo embo amunurami jombure ere ove?” ainge enu, 5 ke mine einge ea, “Dago Iesu, Nazareth embo avo jombure ere ora,” ainge eo, “Namora,” ainge ena. (Eto embo Judas amo Iesu harikasi embo ta orohuta heteto mihina.) 6 eto Iesu na, “Namora,” ainge ijinu, Isoro embomeni na ingito ku na ahuna pambuto enda ta vea. 7 Eto Iesu na ke ehako, “Ungo amunurami jombure ere ove?” ainge enu enana na ehako, “Dago Iesu Nazareth embo avo jombure ere ora,” ainge eo, 8 Iesu na ke einge ena, “Ke mahu ehene ingeva amo namora te embomeni namoga mihera erevi evu tapa pambare,” 9 Ke ainge ena amo Iesu na pari ta ke mahu einge ena, “Inena embo nau ika avo vahai veto mane pambasuja,” ainge pari ta ena avoeto embo tapa pambara ena. 10 Eto Simon Peter amo amita asivo mihina avo kororoeto humbuto priest peni amita pure embo javo Malchus ta oje jeto havekenu 11 Iesu na Peter ta degi ke einge ena, “No asivo goru ta juruke. Na Mama na aguhu erevi indona siriketo ikena amo mane indonote?” ke ainge Iesu na ena.

12 Eto isoro embopo te eto tihi jigari embopo te embo okokose te na Iesu jigito ingeni punduto 13 humbuto pambuto embo javo Annas ta jo ta ikeo hetena. Eto iji amikote embo Caiaphas amo priest okose ena eto embo Annas amo Caiaphas ta imi avoeto Annas ta degi kihi pambuto ikeo hetena 14 eto Caiaphas na Judea embomeni ta degi ke mahu einge ena, “Embo tapa mane pehasora te embo tapa avoeto embo vahai pehasuja,” ke ainge Caiaphas na ena.

15 Eto Simon Peter te ambotani nei vahai amite aingeto Iesu humbuto pahuo ambota pambuto ambotani vahai amo priest peni na mahu kiari avoeto Iesu ga priest peni amita bande jo ta horenu Peter avo bande bokiri pe araha ta heteto mihinu 16 ambotani nei vahai priest peni mahu kiari avoeto jo ta horena amina bokiri simba ari evohu amita degi enu puvuto Peter enu jo ta horenu 17 bokiri simba ari kakara nei amina einge ena, “Embo emita ambotani nei amo umorete?” ainge enu Peter na, “Na avo manera,” ainge ena. 18 Eto jajemo unu bande pure embopo te bande simba ari embopo te aingeto ji buju evikihina ai ta heteto erihe mihio Peter pambuto enana ga heteto ji erihinu.

19 eto priest peni na Iesu na ke do ahe poekihinu ingihe ambo ambo ea avo enu 20 Iesu na ke mine einge ena, “Eto ahe poekari nau amo ojikari na ae rate araha arahata eagone embo tapa na ingiora amo ke kasari bande ta eto temple jo ta eto Judea embomeni horukagora amita degi eagone ingiora amo ke nei do ojikae 21 avoeto umo nau degi ta eto mane ingesoa te na ke do tapa eagone ingiora amita degi eto ingijo,” ke ainge Iesu na enu, 22 isoro embo vahai Iesu ta engihi ta heteto mihina amina, “Umo do eto priest okose ta degi ke sapura ere?” ainge ijie Iesu ta tombu ta tenu 23 Iesu na ke mine einge ena, “Na ke sapura do ehene ingea avo ejo ingone. Eto na ke sapura ae rate na sio tehea,” ainge enu, 24 Annas na Iesu ta ingeni pundua amite tapa ikenu priest okose javo Caiaphas amita degi pambuna.

25 Eto Simon Peter ji erihe mihinu embomeni na, “Umo te tapa amita ambotani rete?” ainge eo, Peter na, “Na avo manera,” ainge enu, 26 Priest peni ta pure embo vahai amo Peter na embo oje jeto havekena amita javo vahai amina Peter ta degi ke einge ena, “Na umo te tapa embo amiga dagogo tambu ta kehenete?” ainge enu. 27 Peter pero ue, “Na avo manera,” ainge ijinu ohora javone ena.

28 Eto ihote Caiaphas ta bande toto Iesu humbuto Rome embo ta koto ari oro ta pambua. Eto jarukari pondo indari iji puvuna avoeto ungo hahara ue ungo Rome ta oro ta horae pambae toa 29 eto Pilate na araha ta puvuto heteto ke einge ena, “Embo emita sapura deire, avo evujo ingone,” ainge enu, 30 embomeni na, “Embo emina ari sapura ae amo mane no ingeni ta ikahera,” ainge eo 31 Pilate na ke mine einge ena, “Ungota ke pepeni na embo evi ganoka eto ingivu,” ainge enu, Judea embomeni na ke einge ea, “Embo tari pehari amo dagota degi ta haekarira,” ainge ea. 32 (eto Iesu daingeto taro pehasuja amita ke Iesu na mahu harikena. Eto embere einge emina enu Iesu ta ke ga inono ena.) 33 eto Pilate na koto oro ta horeto Iesu jage enu puvunu, “Umo Judea embo ta king rete?” ainge enu. 34 Iesu na ke mine einge ena, “Ke umo erea amomo embo nei na ehere ingito erete mo no hotembari na erete?” ainge enu, 35 Pilate na ke mine einge ena, “Na Judea embo manera te priests pepeni no eto embomeni no amina umo humbuto nau ingeni ta ikehera, amo ari sapura no mo deire?” ainge enu, 36 Iesu na ke mine einge ena, “Na embo tihi jigesona te enda ta ari avo mane aisona. Eto na enda ta ‘King’ ahena amo embomeni nau na ereto isoro eto Judea embomeni ta ari emo haekaehera te na ‘King’ ainge manera,” ainge enu, 37 Pilate na, “Aravorate umo king rete,” ainge enu, Iesu na ke einge ena, “En, ke umo erea amo ke be. Na king ra te na avo ana nau aja na ingena. Eto na enda ta puvena amo ke be ano embomeni ingora puvena amo embo ke be ingari haite amina ke nau ingesuja,” ainge enu. 38 Pilate na, “Ke be mo deire,” ainge ijie araha arahata pambuto Judea embomeni ta degi ke einge ena, “Eto na embo emita sapura hambae ehena.

39 avoeto ungo Judea embo ta jarukari pondo iji te amo tipura embo eagone arahata pambagora avoeto ungo Judea embo ta king erevi ano arahata pambaute?” ainge enu, 40 embo tapa na gagaha eto ke einge ea, “Embo avo mane arahata pambasuja te embo Barabbas avo ejo arahata pambai,” ainge ea te Barabbas amo pegene embora.