1 Eto Iesu avo Ahihi Otohu na jo eneteto kihi humbuto umo Jordan toto 2 ojagatambu ai pambuto iji 40 amita jo ta mihinu Satan na puvuto engekena. Eto indari indae mihinu iji 40 irae unu beuje puvunu 3 Satan na amita degi ke einge ena, “Umo God ta Meni be kito koro erevi e bread sarikai,” ainge enu 4 Iesu na ke mine einge ena, “Eto embo na mane bread pere indie iresuja,” ainge enu 5 Satan na Iesu humbuto degi i be i ai pambuto heteto enu enda neite neite tapa be kina. 6 Eto kogue mihinu Satan na Iesu ta degi ke einge ena, “Enda tapa ere kogoa amo nau ikari avoeto embo ta degi hande ikasona amo tehora 7 avoeto na humotepain asoa amo nane umo embo peni ikano enda erevi tapa tihijigihe hajae vajae embo aisoa,” ainge enu, 8 Iesu na ke mine einge ena, “God ta ke kajari einge mihia, ‘Umo Bada God no vahai avo humotepain ue agi asoa’,” ainge enu, 9 Satan na Iesu humbuto da Jerusalem ta pambuto enu Iesu temple ene i be i ta pambuto hetenu ke einge ena, “Umo God ta Meni be kito kekehuna eto ve. 10 God ta ke einge kajari mihia, ‘God na amita Anera ikau umo simba aisora 11 eto umo ingeni na humbuto orereto veasora avoeto umo koro ta utu mane tasoa,’ ” ainge Satan na enu, 12 Iesu na ke mine einge ena, “God ta ke nei einge mihia, ‘Umo Bada God no mane engekasoa,’ ” ainge enu, 13 Satan na engekari tapa avo enu irae enu pambuto iji nei ambota aisuja avo simba ena.

14 Eto Iesu Ahihi Otohu ta sovera na egerembeto enda Galilee ta pahunu amita duru avo embo tapa na embu eo sigeto peni vahai ena. 15 Eto amina enda Galilee ta ke kasari bande tapa ta horihe ahe poekihinu ingihe tunga javotoho ue Iesu jakeka ea.

16 Eto amo pajirari da Nazareth ai ta puvuto amita ari ainge eaguja avoeto jangu indari iji te ke kasari bande ta horeto embomeni ta degi ke ehekasi ue embo ta tombu ta hetenu 17 peroveta Isaiah na ke kajari avo ikeo humbuto hiriketo ke kajari einge avo hambuto embo ta degi ehekenu ingia, 18 “Eto Bada God ta Ahihi na sovera ikau humbuto osaga embopo ta degi duru javotoho hande aisona, eto isoro ta humbari embomeni ano arahata pambasora, tihi vavahaikari ano tihi kujasora, eto hoivo embomeni avo kitoho ta ingeni ta eto umbasona. 19 Bada na embo hondate ari iji puvija ainge hande aisona,” Ke erevi ehekenu irae enu 20 book ahureketo hondate ari embo ta degi iketo arumbenu, embo tapa jo ta mihia amina Iesu be kon eto kio 21 Iesu na ihiketo ke einge enana degi ena, “Ke mahu Isaiah na kajari ehene ingeva amita be amo puvija erevira,” ainge ijinu 22 embomeni na ingito kore eto amita ke ikari amo javotohora ainge ijie ke einge ea, “Emo embo peni ta meni manera teho Joseph ta menira,” ainge ijio 23 Iesu na enana ta hotembari avo kito einge harikena, “Ungo nau degi ta ke einge aisi hotembihevete ‘Sivo embo umo oenga hondate e,’ ainge eto nei ‘Da Capernaum ta ari ehe duru ingera avo ehako da no ei ta e kiore’ ke ainge nau degi ta asi ere hotembihevete? 24 Ungo ta degi ke be erena. ‘Peroveta na embo amita be amita degi ke hande aisuja rate mane ingesora.’ 25 rate ke be amo peroveta Elijah irari iji te evohu dodoru isapamane Israel enda ta mihahera. Rate God na enu jua tapa 3 eto hariga tapa 6 amita jo ta ga veae mihahei enda tapa avo beuje iji puvunu, 26 God na Elijah avo ikenu Israel enda ta evohu dodoru ta degi pambae rate enda Sidon jo ta da vahai javo Zarepath amita evohu doru vahai amita degi pambuna. 27 Eto peroveta Elisha ta irari iji te Israel enda ta kini humbari embopo isapamane mihahera rate enana avo God na ae kojae rate enda Syria embo vahai javo Naaman avo enu amita kini irae ena,” ke ainge enu, 28 embomeni ke kasari bande jo ta mihia amina ingito tumo pajire be eto 29 enana ta da heti bende ta kogombari avoeto Iesu humbuto da sahu ta pambuto heti ta gosukaro veaja ke ea rate 30 Iesu na embo ta ugorota hiketo pambuna.

31 Eto Iesu na Galilee da Capernaum ta pambuto jangu indari iji te embomeni ahe poekihe 32 ke ere ijina avo ingito kiari embo be na eria ainge ijie haha puha ea. 33 Eto ke kasari bande jo ai ta embo vahai ahihi sapura na horari amina gagaha eto ke einge ena, 34 “O ve. Iesu Nazareth embo umo dagota degi do asi puve? Umo ao dago irae ara puvete? Eto umo amunure na kiarira. Umo God ta Embo Otohu ra.” ainge enu, 35 Iesu na ke ngahia eto einge ena, “Ke ambu eto embo ta jo ta eto puvuto pambu.” ainge enu, ahihi sapura na embo humbuto gosukenu embo ta ugorota veto pehihenu ahihi sapura avo arahata puvuto pahunu embo javotoho ena. 36 Vasiri avo embomeni na kito vani vini eto ke mine ara eto einge ea, “Ari eha emo deire? Amina amita kiari sovera te na ke eoi ahihi sasapura na ke agi eto arahata puvuto pambuora,” ainge ea. 37 Eto Iesu na do ena amita duru avo sigeto peni enu Galilee embo tapa ingia.

38 Eto Iesu ereto ke kasari bande toto embo Simon ta bande ta pahunu Simon ta umbohi ambure hamo vevere te avo ue mihinu Iesu ta degi eo pambuto 39 engihi ta heteto hamo vevere ere una amita degi ke ngahia enu irae enu ereto embo unduna.

40 Eto mume sihukihinu embomeni ambure neite neite humbari avo humbuto Iesu ta degi puvuo amita ingeni embo tapa ta hamo ta tetembihe enu kokojekea. 41 Eto ahihi sasapura tapa amina embo ta jo ta eto puvuto pahue, “Umo God ta Meni ra,” ainge gagaha eto ijio Iesu na ke ambupu ara ke ngahia na ena amita be amo Iesu amo Judea ta hondate ari embo Keriso avo enana mahu kiari avoeto haekena.

42 eto iho vujenu Iesu ereto embomeni toto embo irae degi ta pahunu embomeni na Iesu jombure ue pambuto hambuto da nei ta pambaja uje ae eto haekeo 43 enana ta degi ke einge ena, “Eto God na amita embomeni siriketo humbuto tihi jigesuja amita duru javotoho avo da ari na ue hande ana ikehei puvena,” ainge eto, 44 da tapa ta pahue Judea ta ke kasari bande ta ke hande ena.