1 Eto iji 6 amita ambota Iesu na Peter te James ta namei John te humbuto tiri koso vahai ai vihito pambua. 2 Eto ai oenga mihie Iesu ta tombu avo enana ta tihi ta iji ta usasa na arako gain eto usasa ena eto amita bo asukari parara be enu 3 Moses te Peroveta Elijah te mahu pehari avo sariketo puvuto Iesu ga ke mine ara ijio ambotani tiri ta vihia amina kia. 4 Eto kogue Peter na Iesu ta degi ke einge ena, “Bada, dago umo te puvuto mihera avoeto tunga javotoho ere ona. Eto umo uje ere oa amo horoma einge aisona, vahai umo avoeto nei Moses ta avoeto nei Elijah avo eto ainge aisona.” 5 “Eto ke ainge ijie mihinu johi vahai usasa te amina puvuto enana tapa ahurekihinu johi jo ta eto ke einge ingia.” “Emo nau osari Meni ra amita ari tapa kogue tunga javotoho ere ona, amita ke tapa ingivujo.” 6 ke ainge ijinu ingihe Iesu ta ambotani joru ue enda ta veto gogombukihio 7 Iesu enana ta degi puvuto hame ue, “Ungo joru ere ova avo toto erevu.” ainge enu 8 ereto hangeto Iesu pere kia.

9 Eto tiri i ta eto vovue enana do kia avo mane ke hande ara einge ena, “Eto Embo ta Meni peheto vasiri te irae peko ta tapa do keheva eto ingeva avo embomeni ta degi mane hande aisova,” ainge enu 10 amita ambotani na amita degi einge eto ingia. “Umo embo ta hondate ari embo mahu puvurari rate do eto enana ke pepeni ahe poekari embopo na Elijah kihi puvuresuja ke eagore?” ainge eo 11 Iesu na “Amo ke be ra Elijah kihi puvuto degi sirikau tambu au Embo ta Meni puvuresuja. 12 Rate na ungota degi erena, Elijah mahu puvija rate enana kito kiarako ue enana ta uje sapura nei te nei te avo amita degi uera. Eto ainge dombo Embo ta Meni na enana ta ingeni ta memenga kesuja.” ainge enu 13 Elijah mahu puvija ena avo enana kia amo John bapataito ari embo avo kito ke be hotembea.

14 Eto Iesu na puvuto embomeni horuketo mihia ai puvuo embo vahai amina ereto Iesu ta degi paunge teteri eto einge ena, 15 “Embo okose, meni nau ta osaga kito jo e, hariga vihioi pipi-konene sapura be eto iji tapa ji ta veto evekaguja nei umo ta veaguja 16 avoeto no ambotani ta humbuto pambene ari kojari inono ae ehera,” ainge enu 17 Iesu na ingito tunga osaga kito “Ungo God ke be ae eto ari eha umbae uha ngahia embomeni ra, na ungo te iji doinge irono? Eto ungo ta uha ngahia avo iji doinge kiono? Aravora, meni avo nau degi ta humbuto hae.” ainge enu 18 humbuto puvuo Iesu na ahihi sapura meni ta jo ta mihina amita degi ke ngahia enu irae pahunu iji amikote meni kojena. 19 Eto amita ambota Iesu oenga mihinu ambotani na Iesu ta degi puvuto ke einge eto ingia, “Dago do eto ahihi sapura avo ohimbari inono ae ehere?” ainge eo, 20 “Ungo God humota be ae avoeto. Na ungo ta degi erena humota ari hingi jo ta ve isapa ainge ungota degi mihirou amo tiri emita degi ke avo oenga vihito degi nei ta pambaehija amo ari ainge aheva. Eto humota ari isapa amina pure tapa ungota degi ngahia mane aehija.”

22 Eto iji vahai Iesu te amita ambotani te Galilee degi ai ta vahaita horukeo Iesu enana ta degi ke einge ena, “Embo ta Meni avo embo ta ingeni ta ikaro 23 humbuto taro peheto mihima iji 3 irae au vasiri te erasuja.” ainge harikenu enana tunga osaga peni vahai kia.

24 Eto Iesu te amita ambotani da Capernaum ta puvuo temple ta tax humbari embo na Peter ta degi puvuto einge eto ingina, “No tihi jigari embo na temple ta tax ikagoite?” ainge enu 25 “Ikaguja” ainge eto bande jo ta eha horihinu Iesu na ke na sunumbeto Peter ta degi einge eto ingina “Simon Peter umo do hotembihe. Enda ta Kings na enda nei embo puvuto iragora enana ta degi tax koro peni umbagore te mo enda asa embomeni ta degi tax koro peni umbagore?” 26 “Amo enda nei embomeni puvuto iragora amina tax koro peni ikagora.” ke mine ainge Peter na enu. Iesu na, “Avo eto enda asa embomeni na mane ikagora. 27 Rate ungotena enana ta degi osaga mane ikasora avoeto no umo o timbari esi humbuto umo tiuka ta pambuto umo o timbujo. Eto o kihi timbasoa amita pe jigito handeketo pe hota koro humbasoa amina humbuto pambuto tax umote namo te tapa ikejo.” ainge Iesu na ena.