1 Eto Iesu te amita ambotani te da Jerusalem ta puvuto auviho da Bethphage tiri olives hemba ta puvuto heteto Iesu na ambotani heriso ikau kihi pambara ue 2 ke einge ena, “Ungo heriso pambuto o donkey huega meni te da pe ai handukehere mihia avo kito bujeketo humbuto have. 3 Eto embo na ke do aro ingito, ‘Bada na jigama asi uje ere ua’ ainge ao mane haekasora te toau humbuto puvuresova.” 4 ke ainge Iesu na ena amore peroveta na Iesu enda ta puvurae iji te einge kajena 5 “Jerusalem embomeni ta degi ke einge evujo, kivu ungota King peka humbari embo avo embo ta ke agi ari o donkey hamo ta arumbeto ere puvutuhua.” ainge peroveta na kajena.

6 Avoeto ambotani heriso avo Iesu ta ke agi eto pambuto 7 o donkey te amita meni te bujeketo humbuto puvuto bo houketo o hamo ta besi tirio Iesu arumbeto pahunu. 8 Embo isapamane bo houketo enda ta tirio bo hamota haito pahunu embomeni nei na ji hatu kahumbeto degi ta tiria. 9 Eto embomeni kihi pahua amite ambota ere puvutuhua amite tapa ihiketo jakeka ijie jajage eto einge ea, “David ta Meni dombo be sovera te Bada ta javo ta puvuto ere hua God hondate e. God amo peni be ra.” ainge ijie pahuo 10 Iesu da Jerusalem jo ta horena. Eto da Jerusalem embomeni tapa na o a ijie embomeni Iesu ga puvua amita degi einge eto ingia, “Embo puvija amo amunure?” ainge eo, 11 “Amo enda Galilee da Nazareth embo amo peroveta javo Iesu ra.” ainge ea.

12 Eto Iesu na temple jo ta horeto embomeni di o ai ta ombuto koro uhuo kito tumo eto ohimbenu pahuo koro ehekari embomeni ta gaga te di dirogu ombuto humbari embomeni ta gaga te tapa jigito hapereketo 13 enana ta degi ke einge ena, “God ta ke ta kajari mihia amo, ‘bande emo nau pari ari bande ra’ rate ungo na pegene embo ta bande ere ova!” ainge ena.

14 Eto Iesu temple jo ta mihinu popora embomeni te tihi kuru ari embomeni te temple jo ta mihahera avo Iesu ta degi jo enu kokojekeo 15 enana priests pepeni te ke pepeni ahe poekari embopo te na ari javotoho avo kito hini kambari uo enana meni isasaraho na jajage eto, “David ta Meni jakeka erera.” ainge ijie mihia avo ingito tumo eto 16 Iesu ta degi ke einge ea, “Enana meni isasaraho na umo jakeka erera avo umo ingae re?” ainge eo, Iesu na enana ta degi ke einge ena, “Na javotoho ere ingihena te ‘God na ehei meni isasaraho ta pe ta eto jakeka ari javotoho puvaguja’ ainge God ta ke ta kajari mihia avo ungo eheketo kiae ra?” 17 ke ainge eto toto da Bethany ta pambuto mume vahai ai evina.

18 Eto iho vujenu Iesu ereto da Jerusalem ta egerembeto pahunu beuje enu 19 ji junga degi ahone ta kito imihe be irae iki pere kito ji ta degi ke einge ena, “Umo ambota be ehako mane aisoa,” ainge enu ji jaise enu 20 amita ambotani na kito mana mana eto ke einge ea. “Umo daingeto ehe ji sau be jaise ehei?” ainge eo 21 Iesu na einge ena, “Na ungota degi ke be erena, eto ungo jo tapa na ke be hotembihe na ne ji junga ta ehena ainge dombo aisova. Eto avo pere mane rate heti emita degi umo ereto jaruketo eva ta pambuto ve.” ainge aisova amo aisuja 22 eto ke be ijie pari ta ari pepeni tapa do avo eto ingesova amo ungota degi puvuresuja.

23 Eto Iesu temple ta ehako pambuto embomeni ahe poekihinu priests pepeni te Judea ta okokose te aingeto puvuto einge eto ingia, “Embo amuna ke ei ingihe pure erevi ere oe? Enda embo ta ke retemo amuta ke re?” ainge eo Iesu na ke mine einge ena, 24 “na ungota degi eto ingari ke vahai erevi aisona, eto ungo ke mine avo ingito embo amuta ke ingihe ere ona avo ano ingesova 25 amo erevira, John na embo amuta ke ingihe embo bapataito enu? God ta ke retemo embo ta ke re?” ainge enu enana ungo oenga ihiketo ke taimbihie ke mine ara ijie einge ea, “Dago ke mine do aro? Eto dago John na God ta degi ta sovera umbuna ke aisora amo embo emina, ‘avoeto ungo do eto John ke be ae ueve?’ ke aisuja 26 rate dago embo ta degi ta sovera umbuna ke aisora amo embomeni na John amo God ta peroveta be ke eagora avoeto embomeni na dagota degi do aisora avo joru ere ora.” ainge eto 27 priests pepeni na ke be teto haito, “Dago be kiaera.” ke ainge eo, Iesu na enana ta degi, “Aravora ungo ke mine ari inono ae avoeto embo amuna ke ei ingihe pure erevi ere ona avo mane ano ingesova.” ainge ena.

28 Eto Iesu na Judea ta okokose ta degi ke einge ena, “Ungo ke nau ingito siro pure evu. Embo vahai meni heriso te amina bugo ta degi pambuto ‘Nau meni pambuto nau grape pure ejo,’ ainge enu 29 uje ae ue, ‘Na mane pambasona’ ena rate ambota jo aherekenu pambuto grape pure ena. 30 Ehako meni ambo ta degi pambuto, ‘Nau meni umo pambuto nau grape pure ejo,’ ainge enu, ‘Aravora, Mama, pambuto pure aisona.’ ainge ena te pambuto pure ae ena, 31 avoeto ungota degi erena, meni damina mamo ta ke agi enu?” ainge Iesu na enu embo okokose na, “Bugo na mamo ta ke agi ena,” ainge eo Iesu na enana ta degi ke einge ena. “Avoeto ungota degi erena, tax koro humbari embopo te tiha paiha evohu te na ungo dembeto God ta tihi jigari degi ta horasora. 32 Amita be amo John bapataito ari embo na ungo irari javotoho degi daingeto pambasova avo harikena rate ungo ingito ke be ae ueva rate tax koro humbari embopo te tiha paiha evohu te na ingito ke be ijiera. Rate ungona enana ta ari javotoho kogueva rate ambota jo ahereketo John ke be ae ueva.”

33 Eto Iesu na Judea ta okokose ta ke ijie einge ena, “Na timu hatirari ke nei aisona ingivujo. Iji vahai enda mamo vahai na pure andage eto ‘grape’ ve koveto huga tiginu irae enu ‘grape’ be haito saheto mu humbasora amita hoto kovenu irae enu pegene eagora simba ue iresora amita gaga i ta eto ‘grape’ pure ara embo humbunu pure uo toto enda nei ta pambuna. 34 Eto ‘grape’ sari ari iji puvunu amita ke agi ari embopo amita ‘grape’ be huna avo amita umbara ikenu pahuo 35 ‘grape’ pure ari embopo na ‘grape’ be ikari uje ae eto embo vahai ahapa tea, nei teo pehena nei karu na humbuto gosuketo tea 36 avo enda mamo na kito amita ke agi ari embopo isapamane ikenu pahuo ‘grape’ pure ari embopo na ehako teo, 37 kito enda mamo na amita meni be avo ikasi ue ke einge ena, ‘Embo dombo kito mane tasora te otohu aisora.’ ainge ijie ikenu pahunu 38 ‘grape’ pure embopo na meni avo kito ke einge ea, ‘Enda mamo ta meni ere puvutuhua kivu. Ungote pambuto taro pehau enda erevi umbaro ungotenau be aja na.’ 39 ainge eto meni avo andito humbuto huga ohio ta gosukeo venu enana huga jaruketo veto teo pehena.” ke ainge Iesu na embo okokose ga tirito 40 enana ta degi ke einge eto ingina. “Ungo do ere hotembiheve? Enda mamo na puvuto ‘grape’ pure ari embopo ta degi do au?” ainge enu 41 enana mine einge ea, “Amina puvuto embo sasapura avo tau peharo ‘grape’ pure embopo nei jajavotoho pere humbasuja eto enana enda mamo ta degi ‘grape’ sari ari iji te ari javotoho ue donda toho amita ikasora.” ainge eo 42 Iesu na ke einge ena, “Ungo God ta ke ta kajari einge eheketo kiaere? ‘Bande gerikari embopo na tutuvi be enu kiari javotoho be ena.’ God ta ke kajari ta ainge mihia 43-44 avoeto ungota degi erena, God na ungo tohota embomeni ke ijie simba eaguja avo haeketo ve ureto sari ikari embomeni be avo siriketo humbuto tihi jigesuja.” ainge enu, 45 enana priests pepeni te Pharisee embomeni te na Iesu ta timu hatirari ke ikena amo enana ta degi ikena 46 avo be kito Iesu humbuto koto asi uje ea rate embomeni na enana ta degi do asora avo hotembihe joru ea. Amita be amo embomeni na Iesu jakeka ijie amo peroveta be ke ea avoeto.