1 Eto Iesu na ke einge ena, “Embo ta Meni puvuresuja iji amite God na tohota embomeni siriketo humbasuja amita ari amo einge ra. Iji vahai kakara tapa ten amo jao ta jimbari pondo ta pambuto hovahu kesi usasa oenga oenga humbuto unduduketo pambua. 2-3 Eto kakara tapa 5 ainge amo kerosene irae au jojekasora avo hotembeto humbuto pambua 4 te nei 5 amo sarika ue humbuto pambae toto pambua. 5 Eto hovahu sau puvurae unu bande ahone ta simba ue iji koso kaso be mihio evora enu hereketo evia. 6 Eto humba ugorota embo na ‘Jimbari embo ere puvutuhua pambuto ope ope karihe humbuto puvujo’ jage eto ainge eo, 7 kakara 10 avo ereto usasa jigio perimbenu 8 kakara tapa 5 teho pambua amina nei kerosene humbuto pambua, amita degi einge ea, ‘Dagota usasa irae aisi ere ua rate dago kerosene isapa hondate avote?’ ainge eo, 9 ‘Aja to be erera, dago jigama aisora avo inonotara ungo pambuto nei ombuto puvuvujo.’ ainge eo 10 pahuo jimbari embo puvunu enana mahu nununga ea amina amite tapa jo ta horeo bokiri ahurekena. 11 Eto enana pambuto kerosene humbuto puvuto bokiri mahu ahurekari avo kito ke einge ea, ‘Hovahu, hovahu, dago bokiri hirikejo horare.’ ainge eo 12 jimbari embo na ke einge ena, ‘Na ungo be kiae ere ona pambuvujo.’ ainge ena. 13 Avoeto ungo mane evesova rate teho mihie simba evujo. Amita puvurari iji amo ungo kiae avoeto.” ke ainge Iesu na ena.

14 “Eto God na tohota embomeni siriketo humbasuja amita ari amo eingera. Embo peni amo degi nei ta pambasi ue amita pure embo 3 ainge avo jage enu puvuo amita koro kaheke kaheke eto enana simba ara ikena. 15 Vahai amo pure pajire ari haite kito amita 5,000 kina ikena nei amo pure isapa peni ari haite kito 2,000 kina ikena eto nei embo pure isapa be ari haite kito 1,000 kina iketo toto degi nei ta pambunu, 16 embo 5,000 kina umbuna amina pure sausau ihiketo pure ue 5,000 kina nei hambuna, 17 nei 2,000 kina umbuna amina pure ue 2,000 kina nei hambuna 18 rate 1,000 kina umbuna embo avo teho hoto koveto amita tihi jigari ta koro avo hoto jo ta iketo ahurekena. 19 Eto iji koso be amita ambota tihi jigari embo ehako egerembeto puvuto koro ikena avo do do ea avo kesi ke enu 20 5,000 kina umbuna embo amina puvuto ke einge ena. ‘Bada inena nau degi ta 5,000 kina ikiha amo pure eto 5,000 nei hambuhana erevira,’ ainge enu 21 amita tihi jigari embo na, ‘Umo pure ari embo javotohora, na no degi ta isapa ikihane javotoho na jigama ehea avoeto na umo humota ue isapamane inena simba ae ikasona. Hae! Umo namoga mihie tunga javotoho ae.’ 22 Ainge eto 2,000 kina umbuna amina puvuto ke einge ena, ‘Bada, nau degi ta 2,000 kina ikiha amina 2,000 nei humbuhana erevira.’ ainge enu 23 kito ‘Umo pure ari embo javotohora, na no degi ta isapa ikihane javotoho na jigama ehea avoeto na umo humota ue isapamane inena simba ae ikasona. Hae! Umo namoga mihie tunga javotoho ae.’ ainge enu 24 1,000 kina umbuna amina ambota puvuto ke einge ena, ‘Bada, na kogona amo umo embo ngahia ra, embo nei na pure uore donda humbagoa avoeto nau ikiha avo veto pambaguja 25 joru eto pambuto hoto koveto koro ikiha avo ahurekihane mihei umo puvea avoeto ahiketo humbuto puvuto no ikari avoeto no ere ikihena, umba.’ ainge enu 26 ingito ke einge ena, ‘Umo kupi pegogo embora. Eto na embo nei ta pure ta donda humbuto indagona avo umo kiari ke erea 27 avoeto do eto nau koro bank ta ikae re? Eto ainge aehea amo puvuto koro nau ikari amite koro nei amita hamo ta ikaro umbaehena.’ 28 ke ainge eto amita pure embomeni ta degi ke einge ena. ‘Aravora embo emita 1,000 kina avo humbuto embo 5,000 kina ikihana amita degi ikevujo. 29 Amita be amo embo donda mihia amita degi donda nei hamota ikasona, eto embo donda irae amita degi do mihia avo umbano donda ambu embo be aisuja. 30 Eto kupi pegogo embo erevi humbuto ari sasapura embomeni memenga kogue iragora degi ai gosukevu veto mume ta mihie si ijie ti kiroro kiroro ijie iroi’,” ainge Iesu na ena.

31 Eto Iesu na ke einge ena, “Eto Embo ta Meni na usasa kiari javotohote puvutuhurou Anera tapa na gara pekihita jigiriketo ope ope karihe humbuto puvuto ikaro amita avo arumba peni usasa te ai ta arumbasuja. 32 Eto enda tapa embomeni na puvuto vahaita ururoro o simba ari embo na o sheep te o goat te siriketo oenga oenga ikaguja 33 aingeko amina o sheep sirikau ingeni be ta vihesora eto o goat sirikau ingeni anga ta vihesora. 34 Eto King amina embomeni amita ingeni be ta ke einge aisuja, ‘Ungo ari jajavotoho ari embomeni ra, 35 na beuje oi ungona indari te umo te ikihave indimahana, eto degi nei ta eto puvutohone ungo na pekeheve tunga javotoho uena. Eto bo ambu one ungo na bo ikihave humbuto asukihana. 36 Eto ambure one ungo na hondate ueva eto tipura ta mihene na kesi pahava avoeto nau mama na osa ue ungo hondate aisuja. Amina enda eha ta ari iji te ungota irari degi javotoho ena ai ta horeto ungota enda hoteto humbuto mihirovo nane ungo simba aisona, have.’ ke ainge au 37 embomeni jajavotoho na ingito ke mine einge aisora. ‘Bada, dago iji deina umo kito beuje te puvutohoe indari te umo te ikehere indimaha? 38 Eto umo iji deina enda nei ta eto puve pekihare, bo ambu kito ikehere asukehe, 39 ambure oe kito hondate uere eto tipura dainge mihe pambuto umoro uere?’ ainge aro 40 King amina einge aisuja. ‘Ari emo nau namei vahai donda ambu teho mihahija amita degi ae rate nau degita ueva.’ ke ainge 41 eto amita ingeni anga ta mihera embomeni amita degi ke einge aisuja. 42 ‘Na beuje na pehihena te ungo na nau degi ta indari te umo te ikae. 43 Eto enda nei ta eto puvuhena rate ungo na pekae eto bo ambu uena te ungo na bo ikae asukae eto tipura ta mihie ambure uena rate ungo puvuto na hondate ae avoeto na toto pambuto Satan te amita Anera te datoho ta evikihie iragora Mamo God na ji nununga ari ai pambuto ungota ari sasapura ta mine umbuvujo’ ainge au 44 enana mine einge aisora, ‘Bada, inena beuje te ujeje te enda nei ta eto puvurari eto bo ambu eto tipura ta ambure te tapa dainge oe kito hondate ae uere?’ ainge aro 45 amina ke mine einge aisuja. ‘Na ungo ta degi ke be erena. Ungo namei vahai beuje te ujeje te puvuna avo kito hondate ae ueva amo namora te kito hondate ae ueva.’ ke ainge au 46 enana pambuto datoho ta osaga kogue iresora te enana jajavotoho na tunga javotoho ue irari datoho ta iresora.”