1 Eto dagota Ohihi Abraham avo ungote keisira, amita ari jajavotoho amina God ta tombu ta embo javotoho enute mo amita humota ari na embo javotoho enu? 2 Eto Abraham na amita ari jajavotoho na God ta tombuta embo javotoho aehija amo embo na kito jakeka ahera te God na Abraham ta ari jajavotoho kito embo javotoho ke mane aehija 3 te God ta ke ta einge kajari mihia amo “Abraham na God ke be ena avo God na kito embo javotoho ke ena”, ke ainge kajari mihia 4 avoeto erena amo embona pure eto mine humbaguja amo teho hande umbae rate amita pure ta mine avo humbaguja 5 rate embo na amita ari jajavotoho God ombae rate ari sasapura embomeni na Keriso humota ururoro God na hande mine vahai oreketo 6 humbau God ta tombuta embo amo ari sapura embo mane avoeto tunga javotoho be aisuja amita ke amo King David na einge kajena. 7-8 “Eto embo amuta ari sasapura amo God na hotembeto toto ahurekau irae au embo amo tunga javotoho ururou God na ehako mane hotembasuja”. 9 Eto tunga javotoho ari emo Judea embomeni avoeto hamo kakamba ari embomeni na pere kiorotemo hamo kakamba ae embomeni te tapa kioro? Eto ke mahu ehena amo Abraham na God ke be ijie humota unu God na embo javotoho ke ena 10 amo humota ari amita kihi ta hamo kakamba enute ambota enu? Eto amita ke be amo ungotena kiari amo Abraham na kihi God humota ue humota ari amita hajire avo God na enu hamo kakamba ena 11 avoeto hamo kakamba ae mihahija amikote amo God na kito embo javotoho ke ena avoeto Abraham amo ungo hamo kakamba ue humota eagova embomeni amita mamo pere mane 12 rate hamo kakamba ae embomeni God humota eagora amita mamora.

13 Eto God na Abraham ta eto meniundi ta degi enda tapa avo ikasi oje ena amo Abraham na God ta ke pepeni agi ere uahija avoeto ikasi oje ae rate Abraham na God ke be ena avoeto Abraham embo javotoho ra ijie oje ena. 14 Te ungo ereva amo God ta ke pepeni agi ari embopo na God ta hotari humbasora ainge ke be kito embo tapa na hotari mane humbasora eto God na oje ena amo be ambu aehija. 15 Eto ungotena ere kogora amo God ta ke pepeni irae amo mane poekahera te God ta ke amo mihia avoeto ungotena God ta hotari humbasi uje ue amo etokito ke pepeni avo agi eagora te ke pepeni avo kaikari poekagora avoeto God ta tumo vahai avo hambasora. 16 Avoeto hotari oje ena avo God humota ururoro Abraham ta meniundi tapa ta degi hande ikau humbasora amo ke pepeni umbae embopo te humbari embopo te tapa amuna Abraham na God humota ena ainge dombo ue Abraham ta meniundi eto humbasora. 17 Eto ungotena Abraham ta meniundi tapa amita ke amo einge kajari mihia, “Abraham, umo nanena enda tapa ta mamo ere ikihena” ke ainge God na ena avoeto Abraham na embo pehari ta vasiri ikari God avo ke be ena amo ungotenau mamahara te ari mahu puvurari te puvurae te amo God ta tohora. 18 Eto Abraham evovo ena te amita hamo visi amo hotembae ue God humota unu God na oje ena amo amita meni puvuto amita poru ta enda pajire be puvuroja oje ena 19 te Abraham ta pajirari jua 100 enu eto amita ae evovo enu hini vavekena te hotembu hotembu ae 20 rate sovera humbuto God humota ue jakeka ena. 21 Amo oje ena avo mane toasuja te sovera inono avoeto aisuja avo hotembeto ke be ena 22 eto Abraham ta hotembari avo God na kito embo javotoho ke ena 23 eto God na kito embo javotoho ke ena amo Abraham vahai mane rate 24-25 embo ta ari sasapura ombuto humbasi God na ungotenau Bada Iesu tonu pehenu ehako jiginu vasiri te erena avoeto embo amuna God ke be ijie humota aisuja embo amite tapa avo God na kito embo javotoho ke aisuja.