1 Ise ma retai piti Eiya lite yuwei olo onom puwoukutei. Le onom puwoukutei le le linauku lirpolo ku eple pele, le ku eple pele punkom. Min polpepei so mete piti tef olo pirouku onom pepe, le Ma Ili re pe pirowo onom. 2 Ise numuwi peikitei, fei ku eple pite Ma Ili pele wolo ku wala mire wouye mire menmen fei pepe, pe ma falouku fei polomen. Wolo ku mretai molpepei, wem Krais nou lau, ku ma weitei fale watafei le lotei wusoli ku ma muluwo, le ku ma ratei watafei le lotei. 3 Metine piti onom natowo Krais piti ma luluwo, le ma lailelene onom pele, ratei teingitei watafei Krais lotei.

4 Metine piti lingiepe il olpe, le metine oli piti yaruwepe il lipi pite Ma Ili, wusoli wem le lingiepe il olpe, le yaruwepe il lipi fei pepe. 5 Ise retai yolpepei Krais lau piti ma la lungwouku le teluwi pele ma kaptetei il olpe pouku, wolo le lotei olo lingiepe il olpe kolo, le metine teingi. 6 So metine piti lulsi Krais, le ma nou lingiepe il olpe kolo. Le metine piti wala lingiepe il olpe, le olo luluwo lo retawo Krais kolo olotei.

7 Eple peiki, ise yusape mete nemple pempeteise kolo olo. Metine piti lingiepe il teingipe, le metine teingi tuwopou watafei Krais, le teingi tuwopou. 8 Metine piti wala lingiepe il olpe, le ninge lite Towa lele wusoli Towa linu lingiepe il olpe. Min polpepei so ninge lite Ma Ili lele lau tef lepei piti ma weisipe singe pite Towa, le men nange pele ma oloye.

9 Metine wuso lirpolo le ninge lite Ma Ili lele le ma wem oli oli lingiepe il olpe kolo olo wusoli le lingowo tisi lite Ma Ili. Le linawo Ma Ili lirpolo le yaitei lele, so le ma nou lingiepe il olpe kolo oloye. 10 Ku miso mulwepe mariepe, mete minemple pe eple pite Ma Ili pele, le mete minemple pe eple pite Towa pele. Metine piti lingiepe il teingipe kolo, lo le onom puwol line winke nele kolo olo, metine fei lepe le ninge lite Ma Ili kolo olo.

11 Wem linu piti ise weitei yefi, ise yingitepe il wuso pirpei polpepei, “Ku ma onom puwo nemple”. 12 Ku ma mingowo tisi lite Kein kolo olo. Le ninge lite Towa lele, le le min so letesi winke nange leletei la lepe. Piti men so Kein letesi winke lele la? Kein lolpepe wusoli le lingiepe wanketei, le winke lele olo lingiepe loporo.

13 So ilim winkem peiki, ise yinlele isotei kolo wem mete piti tef lepei enke kotu pireise. 14 Ku mretai molpepei, ku musa tisi oli liti ma, le ku fei mingowo tisi yefli liti mratei moporo mingi wem wem, le ku mretawo tisi lepei wusoli ku onom puwope ilim winkem nemple pouku. Metine piti onom puwope ilim winkem nemple kolo olo, le wala lingowo tisi oli piti ma la. 15 Metine piti onom kotu lire line winke nele lele, le metine oli piti lingowo tisi lite Towa lele piti laptei mete pa. Le ise retai, metine piti letesipe mete nemple pa, nempi liti kanowo ratei lingi wem wem lepe olo ratowo metine lepe kolo olo. 16 Ku retawo tisi liti onom puwo nemple wem Krais lau la lungwouku. So ku re ma kaniepe ilim winkem nemple pouku mire moingi lelpe, moingi ili fei lolomen re wolo, ku ma kaniepe. 17 Wuso metine nele le oweli yini pele puwo, le le luluwo line winke nele wuso le oweli yini nange nalei lepe, le luluwo moingi lite line winke fei lepe wolo le kanowo kolo wusoli onom pele olo nitipiepe oweli yini pele. Le metine fei lepe, le lolomen ma lirpei lirpolo le onom puwol Ma Ili? Olo wanketei potei. 18 Eple peiki, wem ku onom puwope ilim winkem nemple pouku, ku ma mirpei il nemi yaupe kolo olo. Ku ma kaniepe mire moingi lelpe soma ku ma kosauku kutou mirpolo ku onom puwope ilim winkem nemple punkom.

19 Ku mingiepe fei pepei soma ku ma retai piti mingiepe il punkom. Le ku molpepe soma enke pouku ma pirouku flo piti meletei Ma Ili. 20 Ma Ili olo onom ulenetei, le le retape men nange yeflipiye. Le wuso enke pouku leinginim ku onposi mirpolo ku olo mingiepe il pele moporo kolo, ku ma enke olpe kolo wusoli le ma kanouku lire onom malye pele wem ku meletei. 21 So numuwi peiki, wem enke pouku leinginim ku onposi mirpolo ku olo mingiepe il pite Ma Ili moporo kolo, ku wala ma topo weli piti meletei. 22 Wem ku meletei mire menmen, le ma wauku wusoli ku mingiepe il pele le ku mailelene onom pele. 23 Le il pele pirpei polpepei, ku ma mulpowo ninge lele Jisas Krais wem ku miri nange lele piti meletei Ma Ili, le ku ma onom puwo nemple min watafei il pele pirpei pepe. 24 Metine piti lingiepe il pite Ma Ili, il pite Ma Ili olo pultei onom pele, le Ma Ili liri metine fei lepe rounge ratei. Ku min so mretai molpepei, Ma Ili olo lirouku ratei wusoli le Riri Teingi lele olo lunkuku fei wem ku weitei yefi.