1 Ise eple kumpu, ise yulpowo Apa Ili so emare yaire peise re ise ma yaptepe mingim wusoli wem ise yingiepe fei yolpepei, ise yingowo tisi teingi tuwopou. 2-3 Il lipi pinu pepe pe pirpei polpepei, ‘Ye ma rautuweme nimou re yaitei meiye,’ le pe pirpei papwonou polpepei, ‘wuso ye ingiepe il fei pepei, ye miso ratei oporo le ye miso ratei tef lepei e wem ulel.’

4 Le ise yaire, ise ma yiripe enke pite eple peise olpe kolo soma pe ma enke kotu pireise re kolo olo. Wolo ise il polwepe le ise yirpei namiepe yire tisi liti pulpowo Ma Ili.

5 Ise mete piti yesio towa lite moli lipi peise yawi, ise ma yaptepe moli lipi peise mingim le ise yingiepe il pelpe. Telpalo yasio towa lelpe le ise onposi piti ma yirkilau yailelepe wata pirpolo ise yesio towa lite Krais re lepe. 6 Ise ma onposi yirpolo wem moli lipi peise pepe, pe pile lupolise piti yesio towa lelpe le wem fei lepe so ise ma yirkilau yesio towa piti pe ma pulpoise lom? Olo, ise ma onposi yolpepe kolo olo. Wolo ise enke peise leinginim, ise ma yirkilau onposi piti yingiepe il pite Ma Ili le ise ma yirkilau yesio towa lite moli lipi peise pepe, yesio towa lelpe yawi wata pirpolo ise yesio towa lite Krais. 7 Wem ise yesio towa yawi, enke peise ma teingipe wata pirpolo ise yesio towa yawi lite Apa Ili, le ise yesio towa lite mete yaupe piti tef kolo olo. 8 Ise ma onposiepe yolpepei, wuso ye metine piti esio towa lite moli ili nele yawi lo ye metine piti esio towa leiye yotei lepe, ise niliye niliye Apa Ili ma namti laileleise lire towa men teingi wuso ise yesio fi fi lepe.

9 Ise mete lipi piti yuntoluwepe mete nemple wem pe pesio towa leise yawi, ise ma yailelepe watafei pe paileleise pepe, le ise yire il singe yirpepe piti pe ma turwepe pireise kolo olo. Ise ma retai yolpepei, ise le mete peise piti pesio towa leise yawi pepe, ise yepiye moli niliye ili leise piti luntolise pepe, le ratei yuwei, le le ma kapi il laptei lireise linge tisi niliye. Le ma kapi il laptei lire wai peise fi fi.

10 Fei il pepei piti ma kirpeise kapulu, ki kirpeise kolpepei, ise yusa Apa Ili kolo olo. Ise yirkilau yile singe yiripe singe lipi pele pepe. 11 Singe wuso Ma Ili waise pepe, ise ma yirkilau yesiepe watafei ise laufipe parku le ise yesiepe nuwi re tape piti rourei isotei. Ise yolpepei soma ise miso yile singe le ise weisipe singe pite towa. 12 Wusoli ku fei ma lolpo miripe mete walem piti tef lepei kolo olo, wolo ku ma lolpo miripe singe pite ririm olpe pite yuwei. Ku ma lolpo miripe ririm olpe wuso pirkilau pirpolo ma puntoluwepe men nange pite yuwei re tef lepei lepe, le pe ma kesi munkunum paltei. Wolo ku ma lolpo miripe piti ma weisipe singe pelpe. 13 So ise ma yirkilau yesiepe singe pite Ma Ili pele yapiri. Le wem, wem oli lepe fale, ise miso weisipe singe pite mete eringi peise, pe ririm olpe pepe, yirkilau weisipe singe pelpe le wem wem oli lepe kere, fei oloye, ise yirkilau yile singeye.

14-15 So ise ma yoporo isotei. Ise yesiepe il punkom pite Ma Ili watafei ise yeltalo morou topo lifei lari ranguwom lite pau. Le ise telpalo ratei teingipe tuwopoutei wata pirpolo ise laufipe parku pifei popopo onom popo peise piti ma rourei isotei. Le ise yoporo isotei piti ma yeptalo Il Teingipe pite Ma Ili ma nou kesipe mete pele laptei lotei. Ise yirkilau yesiepe wai fei pepei wata pirpolo ise yafo ire topungou pifei ire yepe peise piti ma yile yoporo le ise yile singe. 16 Ise yulpowo Ma Ili wem oli oli le fei pepei ma wata pirpolo ise yilape parku piti yire yaisipe nuwi re tape wuso Towa pele lepletei weli poli le le namplolo losise pepe. 17 Le ise yusa Ma Ili piti kaneise le le miso lopopoise wata pirpolo ise reltapo menele singe watafei wenteple lepe, reltapo lifei muntuwepe eri falongou peise. Le il pite Ma Ili wuso Riri Teingi waise pepe, ise ma yesiepe wata pirpolo ise yesiepe werau piti lolpo. 18 Ise yingiepe fei pepei yingowo tisi lite yeletei Ma Ili, yeletei piti kaneise. Ise ma wem oli oli yeletei Ma Ili, yiripe singe wuso Riri Teingi waise pepe. Il pal pepei so ise ma rourei isotei le ise yire wilfingou pato. Ise wem oli oli yeletei Ma Ili piti ma kaniepe mete yeflipiye pele pepe. 19 Le ki re, ise ma yeletei Ma Ili piti ma kaneiki. Yeletei Ma Ili piti ma waiki il wem ki kopori kutei piti kirpei, le ki ma kirkilau kirpei kire il pite Il Teingipe wuso nempis pinu wala kotire pato pepe. 20 Il pal pepei so ki kifei winem oli lepe, wusoli ki metine liti kirpei il pite Jisas Krais. Ise yeletei Ma Ili piti ki ma kirkilau kirpei kiripe il fei pepe le ki ma turiki kolo olo.

21 Tikikus, le line winke loukutei le le metine piti lirkilau lesio towa lite Apa Ili, le miso lirpeise il yeflipiye lireiki ki. Le lirpeise soma ise miso retai, ki kratei fei kolomen. 22 Min polpepei so ki kaisi Tikikus le ise pepe, le piti ma lirpeise lirouku ku, ku mratei fei molomen, le il pepe miso waise topo weli.

23 Ilim winkem wuso pulpowo Jisas lepe, Ma Ili lire Apa Ili Jisas Krais, te miso waise enke malye le te miso kani onom tanteise. 24 Ise yeflipiye wuso onom kerowo Apa Ili Jisas Krais wem oli oli lepe, Ma Ili miso onom maneise.