5
Ma Ili lesiepe yousi nemple ponwipe elpesipe le sipsip ninge ma kapi yousi fei pepe
1 Ki kulwepe yousi nemple ponwipe elpesipe le Ma Ili wuso lifei flenge pele pepe, le lire eti tilpi lele lesiepe yousi fei pepe. Le yousi wuso ponwipe elpesipe pepe, onom tounga re olo paptei il paitei piripe poungaiye, le pe pire sonu fai pengleipe yousi mingelem tulum pire eti plen poungo te twinges soma minemple re ma nempipe yousi fei pepe kolo olo. 2 Le ki kuluwo riri nele lite yuwei, le olo singetei le le lirpei il lipi lirpolo, “Minele teingitei miso nampopo sonu fai tani le le nempipe yousi fei pepei?” 3 Wolo minele lite yuwei, lo le lite tef lepei, lo le lite uf tef lite towa pratei lepe, minele re miso nempipe yousi lo le miso lungunape il wuso paptei paitei pepe, olotei. 4 Ki kouti olitei wusoli minele re teingi piti nempipe yousi pepe lo le miso lungunape il wuso paptei paitei pepe re kolo olotei.
5 Leye lo metine ili nele wuso liripe pifei flenge neinowo Ma Ili lepe, metine ili lepe lirpeiki lolpepei, “Ye outi kolo. Untoli, metine wuso pinawo pirpolo Laion lite alpe lite Juda lepe, le ninge palyene lite metine ili Devit, le weisipe singe pite mete eringi pele fei, le le miso nampopo sonu fai tani, le le nempipe yousi fei pepe.”
6 Leye lo ki kuluwo sipsip ninge lile nimin lite flenge pepe le menmen watafei siye pite towa yawi, pe twinges te twinges, pe pire mete lipi wuru (24) wuso pifei flenge pelpe fi fi pepe, pe pifei neinowo sipsip ninge ratei nimin. Ki kuluwo sipsip ninge lepe wata pirpolo mete palpo le pam olol lele wala luwo. Wengle pire eti plen poungo te twinges pele poli le lutepe re pire eti plen poungo te twinges poluwo. Pe pilepe ririm piti pesio towa lite Ma Ili, pe pire eti plen poungo te twinges wuso Ma Ili laisipe pe pinge tef ili yefliye. 7 Sipsip ninge lepe, le le kapi yousi wuso ponwipe elpesipe, kapi tani eti tilpi lite Ma Ili wuso lifei flenge pele pepe. 8 Wem sipsip ninge kapi yousi fei pepe, siye twinges te twinges pite towa yawi pepe le mete lipi wuru (24) wuso pifei flenge pelpe fi fi pepe, pe puwalo pratei onom pite sipsip ninge. Pe niliye niliye pesiepe hap watafei kita, le pe pesiepe waifilengi pire gol pesiepe le oweli wopu olo pafo pratei waifilengi pepe fale pire waifilengi nemi poparu. Oweli wopu pepe pe pilepe il wuso mete pite Ma Ili pele pouti peletei re pirpowo pire men nange pepe. 9 Siye twinges te twinges pite towa yawi pepe le mete lipi wuru (24) pepe, pe puro weni nemple yeflipi, puro paptowo sipsip ninge pirpolo,
“Ye olo teingi miso kapi yousi wuso ponwipe elpesipe pepe, le ye nampopo sonu fai wuso piri pengleipe yousi mingelem pepe. Wusoli mete peteteiye a fei, le ye ire teluwi peiye ire aisipe mete piti aptowo Ma Ili. Pe pite alpe nele nele, il kumpu nemple nemple, uf tef nele nele, le topungou nemple nemple, pe pite tef ili yefliye. 10 Ye kaniepe fale pire mete nempleiyeye le pe teingipe piti pesio towa lite Ma Ili louku, le pe ma puntoluwepe mete re men nange pite tef.”
11 Ki nou kuntoli le ki kingitepe ririm pite yuwei, pe wurutei olpe (tausen tausen, milion milion.) Pe pile neinepe flenge pite Ma Ili le siye twinges te twinges pite towa yawi pepe, le mete lipi wuru (24) wuso pifei flenge pelpe fi fi pepe. 12 Le pe puro pirkilautei polpepei,
“Sipsip ninge wuso petesi la lepe, le olo teingi le le miso kapi singe, oweli yini men nange teingipetei, onom nire wuru le kimplipe pite Ma Ili. Ku meila nange lele, nange ili le singe pite le pele loteteiye wem oli oli.”
13 Le ki kingitepe men nange wuso Ma Ili laptei pratei yuwei lepe, le pe piti tef, le pe piti pratei uf tef lite towa pratei lepe, le men nange wuso Ma Ili laptei pratei peryai, men nange yeflipiye pite yuwei re tef lepei, ki kingitepe puro polpepei,
“Ma Ili wuso lifei flenge pepe le sipsip ninge, nange ili, singe le kimplipe pite ise rounge wem oli oli.”
14 Le siye twinges te twinges pite towa yawi pepe, pe namti pirpei polpepei, “Punkomtei.” Le mete lipi wuso pifei flenge pelpe fi fi pepe, pe puwalo pratei rautuwo Ma Ili lire sipsip ninge.