Hebru
1
Anutu Gipoleŋo Don Miti Ra Qelaŋane Ŋedanlukwareke
1 Mokaka Anutu eŋe propet taleongi, eŋe atakine loutne don tanikine kine mane kine mane, so don numaine kine mane kine mane ŋabokopze edane sarimaŋkoi, 2 ŋo ŋado naso iwa, yemo Gipole talekaki oŋo don ŋedange, Giplole eŋe weku Anutuŋo talekaki, oŋo yeye kine kine kepe so qeli kotino ma wakon wareke, eŋe wekuŋo naso qoeki yeye kine kine ea wane welaine okaniakane Anutuŋo kutno more birakake. 3 Eŋe qelaŋanineŋo Anutu wane ewe zonom earop motki qaga gaemaike, eŋe Anutu eŋine rokop eŋine kait toqaine so kait kewatokine yaleka tokso giridiŋ, so eŋine don zonomine togole eaŋo kepe so qeli korop ea kito qesiŋ maki pa okanmaike. Eŋe ŋei borikinane zonom sauke mataliki siukwareke, so kepe ŋei ŋerep sot midaine gekenane bira ŋonge, so ea wane ŋadino weti qeliwo wake, Anutu Zonom Ware Ware Welaine wonino metmaike.
Anutu Gipoleŋo Suaineŋo Aŋelo Edo Nigatne Ketkele Okanmami
4 Anutu wane Gipole eŋe aŋelo eŋane suaine birakake, ea yemo eŋetine suaine Anutuŋo mange, aŋelo eŋane eŋet eamo nigatne ketkele ea wane kop. 5 Anutuŋo aŋelokoune eŋano ŋine mane iwa yale mi olatke, so Anutu wane papiao iwa yale mo qeqine,
“Ge naŋane Giponne, ukude na geŋane Magaŋone okanmaile.”
Me Anutuŋo aŋelo mane iwa yale mi olatke,
“Na baŋ eŋane Magaine okanikale, eso oŋo baŋ naŋane Giponne okaniake.”
6 So mane yemo Anutu eŋe alakan Gipole kepeo birakaki kesiakane okaneso, iwa yale rake,
“Anutu wane aŋelo korop eŋe wa welene qe ewine kito meŋenka more mawakaikei.”
7 Anutu eŋe aŋelo eŋane wetke more iwa yale rake,
“Anutuŋo aŋelokoune momo so gerep bolamine yale biraongi, eŋane urata maikei wane ket okanmami.”
8 Ŋo Gipolane yemo Anutu eŋe ora olale rake,
“O Anutu, geŋane ŋei waom met metŋone, yemo baŋ naso baŋem naso baŋem mere ariake! Ŋei ŋerep eŋe korop geŋane banŋonoka pa waremami, ea koboboineka ware onikene. 9 Ge masi mainane simin ganiake, so borikinane bauŋone wayake, kine ea wane Anutu eŋe geŋane Anutu, oŋo ge mawakongane more, kelok leweŋono qakgange, eaŋo oi bakom kakapa zok manerop ewe kiti kitinerop, so aŋelo magu eŋe yaline kaki mane mi okanonge.”
10 Eŋe koso ora rake,
“Ge Waom, mokaka qei kino lopeŋ seleleine more, kepe iwa ma wakongone, eŋe togogole pamaike, so ge geŋone meteŋoneŋo qeli ma wakongone, so kutno kine kine weneŋ. 11 Kepe so qeli eŋe korop baŋ siukwarekei, ŋo ge yemo baŋ ge ari gekene, kepe so qeli ere takot so laplap sogine toi toine yale leleki yeine kito qokkene. 12 Ge baŋ takot suaine mane rutupkemami yale, qeli so kepe ere rutupke more leduŋ osikene, pakimo ere baŋ qeinge takot musele yale okanikeik ŋo ge yemo naso baŋem gemaine yaleka gekene, so ge baŋ sua sele mi lelekene, so nasoŋone mane mi qoeyake.”
13 Anutu eŋe aŋelokoune eŋano ŋine mane iwa yale mane mi olatke,
“Iwa naŋane zonom wazano wonnoken metnom, na geŋane ŋabakopŋone biraonbe, eŋe kie geso gesok yale kieŋonane bano metpi gesok onikene, so aŋelokoune eŋe don ea mane edange me? Midakaka!”
14 Pakimo aŋelo eŋe onokaka? Eŋe korop asu, eŋe Anutu qelitine qe ge okanmami, so edo ŋei mena menaŋ magekei so gege togon wane raraine, eŋe mapik ongei wane biraonge.