1 Gahan noh kakdahdapat patim wandeioh enser kasipnap tit aw teidapat kakdahnong moh wanpatgop. Ohe ina bok moh rian gonwi tein taham ara kak moh atan hip porper tahat mandama wanpatgop. Rumkinhe atan has hapatgwer hatin has hat mandangop. Buhhe irat has hama ap tam hatin hat manda hangop. 2 Ohe bes tei oh brak gar tein matin bok tit dapet marin patgop. Ama han oh wandasa buh oper tan oh sor tom hru teinong tonggandeingopa; watah tan oh mong teinong tonggandeingop. 3 Tonggamar ohe ma ur oh minggihim brak dei hatin hat ungop. Meng tit rit utporhan beshei minggihim ihir gurir mar meng tit rit ungopa. 4 Meng rit utperhan noh brak matpor ihpatin aw teidapat We. Beshei minggihim ire ma riya meng oh brak mar ritipra. Gorhe damdapat ham kimirit patenmur napor hangop.

5 Ihtiporhan rih ma wandei enser orhor awam tuketinmat bes oper tan oh aw teinong mahat daptuhungop. 6 Daptuhurpat Patesuhru patru patepra Got oh aw tan mong tan tom hru darpama ama pat han erer oh darpatip hano rima orhe boknong mar awam tukermuro. Got ohe ihtipor ma dahah da oh sunhat na imtipramur. Gin orhor arpin imtiprohmur. 7 Sunhat na patema bes enser oh pong poripti han oh pong potporhan gin orhor imtiprohmur. Ma imtiproh oh Got orhe dahat patesuh da ohoh orhe damdapatwi hat pat da oh orhe meng pot pisapti han ihirnong mengwi Noh ihtipramur rim damdapat dahat patesuh da oh gin imtiprohmuro rim awam tukengop.

8 Awam tuketporhan rih aw teidapat ma napor han oh it Gin go sus enser tit buh sor tom hru teinong tonggwandei tit buh mong teinong tonggwandei ma hat pat enser orhe brak dapet marin pat tein gar oh go sus datinmuro napor hangop. 9 Napotporhan noh enser ohe pat teinong susa Gin brak gar tein bok oh nohnong napina potip. Potporhan oh Yahwa. Moh dar dina. Diporhan atem teidapat ambar dason nahatiprohmura; ake mutuhdapat ake bapak nahatiprohmur napor napingop. 10 Napriporhan noh ambura dip. Diporhan atem teidapat ambar dasan nahangop. Nahatporhan gurmitporhan ake mutuhdapat ake bapak nahangop. Ma inahatip oh atem teimdapat ritin meng yah orhor ina ruumsi hatipri meng ohoh ake bapaksi nahangop. 11 Ihtiporhan nohnong Gin go Got ohe han among among pati bapo han ambap ambap ma pati hano ameng ameng nitat natip han bapo among among duuptei hat pati hano ire mutuh Got oh ihtin han tit ha tarpatinoh dahatporhan ma tarpat sasipra ohe meng oh it pomat potinmuro napongop.