19
Pol la nêl xolac gê Epesas
Apolos dô Kolin dɨ vô buc tige Pol la tup vac vɨgwe kɨtôn dɨ mɨla Epesas. Dɨ mɨla tulec xomxo vông vinên ya dɨ kɨnêg vô he ên nêbê, “Buc wê xam vông i vin taxlee ge, Myakɨlôhô Ngɨbua lam dô hɨxôn xam, me?” Lêc he nêl ên nêbê, “Xe o ngô kɨyang ti lec Myakɨlôhô Ngɨbua lêm.” Om Pol kɨnêg vô he ên nêbê, “Om xam lipac mia tina?” Lêc he nêl ên nêbê, “Xe lipac mia tɨyi wê Jon vông ge.”
Mêd Pol nêl ên nêbê, “Ilage Jon lipac xomxo wê pɨlepac he dɨ vô nɨmi vô nipaên ge, dɨ nêl vô he ên nêbê he i vông i vin xomxo ti wê ob val tɨmuên ge. Xomxo tige Yesu.” Xomxo tigee ngô kɨyang wê Pol nêl ge om he lipac mia lec Apumtau Yesu lê. Mêd Pol vyax vɨgê lec he dɨ Myakɨlôhô Ngɨbua lam hɨvun he xôn dɨ vông he keac vac tɨbii toto vya wê he lungên ge dɨ he nêl kɨyang tɨyi xocbê plopet ge. Xomxo tigee vɨgê yuu dɨ tô mɨ la yuu.
Mêd Pol la vac xumac lɨlo wê he Yuda vông ge dɨ la nêl Anutu xolac vô xomxo hɨxôn xêkɨzêc dɨ xonaên ma. Pol nêl Anutu ben kehe kɨtong vô he. Pol vông môp tibêge tɨyi dentuc yon. Lêc xomxo ya nɨlô xêkɨzêc om he o vông i vin kɨyang wê Pol nêl ge lêm, dɨ he la nêl kɨyang nipaên lec môp wê Yesu vông ge vô xomxo tɨbeac manôn. Mêgem Pol hɨxôn xomxo vông vinên sea he dɨ la dô vac xumac wê Tilanas mi tɨxuu xomxo vac ge, dɨ Pol viac kɨyang nivɨha vô xomxo tɨyi buc vɨhati. 10 Pol vông môp tibêge tɨyi lec klismas yuu, om Apumtau xolac la vô he Yuda hɨxôn he Glik wê dô vac vɨgwe levac Esia ge vɨhati.
Kɨyang lec Siva nue vux
11 Anutu vông xêkɨzêc vô Pol om Pol vông do levac tɨbeac, 12 om xomxo kô Pol nivɨmihi wê ka bazub ya ge hɨxôn i nên ngakwi ya mɨ la vông vô xomxo wê yidac ge dɨ he vô nivɨha lec, dɨ xomxo wê vɨmwo nipaên dô vac he nɨlô ge, vɨmwo nipaên pec mɨ la vêl ên he.
13 Yuda ya mi vɨlee vac vɨgwe vɨyang vɨyang dɨ la tii vɨmwo nipaên vêl ên xomxo, dɨ he ya tɨxuu nêb ob nêl Apumtau Yesu lê dɨ tii vɨmwo nipaên vêl lec Yesu lê. Om he nêl bêga nêbê, “Yesu ti wê Pol nêl i kɨtong ge, xe nêl vô ông lec i lê bêga bê ông lop mɨ loc vêl ên xomxo tige.” 14 Xomxo levac wê mi si daa vô Anutu ge ti lê nêbê Siva, nue vux vɨgê vɨlu dɨ sec yuu vông môp tibêge, 15 lêc vɨmwo nipaên nêl vô he ên nêbê, “A xovô Yesu dɨ a xovô Pol, lêc xam ge letya?” 16 Mêd xomxo ti wê vɨmwo nipaên dô vac i nɨlô ge hôm he xôn dɨ hi he ninɨvi vô nipaên dɨ lêx he ngakwi sea, om he sea xumac tige dɨ pec mɨ la xêtuac. 17 Mêd he Yuda hɨxôn he Glik wê dô Epesas gee vɨhati ngô kɨyang tige om he xona mabu dɨ pɨmil Apumtau Yesu lê. 18 Mêgem xomxo vông vinên tɨbeac lam nêl he nên nipaên wê mi vông ge kɨtong seac, 19 dɨ he wê mi vông yevac ilage kɨtuc he kɨpihac yevac lam dɨ si lec ngwax vô xomxo vɨhati manôn. Kɨpihac tigee, he kɨsuu lec mone levac tɨyi xocbê 50,000 kina. 20 Mêgem Apumtau xolac la vô levac vac vɨgwe tɨbeac.
Tɨbii Epesas vô nidɨdun levac lec he anutu Atemis
21 Pyap dêc Myakɨlôhô Ngɨbua vông xovôên vô Pol, om Pol nêl ên nêbê, “A ob la tup vac vɨgwe Masedonia yuu Glik dɨ la Jelusalem. Pyap dɨ a ob la Lom hɨxôn.” 22 Mêd Pol vông Timoti yuu Elastas wê yuu mi ngɨdu i xôn ge yuu la Masedonia, dɨ Pol dô myabo tya gê Esia.
23 Vô buc tige xomxo ya vông vevac vô môp wê Apumtau vông ge dɨ vông nidɨdun levac. 24 Ên xomxo ti dô Epesas lê nêbê Demitlias wê mi vông yuac lec silva. Demitlias vông xumac nipwo ya silva tɨyi xocbê xumac ngɨbua wê anutu kɨtyooên Atemis vông ge. Demitlias he nue yuac kô mone mabu lec yuac tige, 25 om Demitlias kɨtuc nue yuac hɨxôn tɨbii wê mi vông yuac tibêge lam dɨ nêl vô he ên nêbê, “Xame, xam xovô wê il kô mone mabu lec yuac wê il mi vông ge. 26 Lêc xam wê dɨ ngô wê Pol val pɨlepac xomxo tɨbeac nɨlô dɨ he vông i vin kɨyang wê nêl ge. Ên Pol nêl ên nêbê anutu wê xomxo vông ya vɨgê ge, ge o Anutu nôn lêm. Pol lam nêl kɨyang tige vac il bed dɨ nêl vac vɨgwe levac Esia vɨhati hɨxôn. 27 Om kɨyang wê Pol nêl ge ob vông yuac bisnis wê il vông ge lê vô nipaên, dɨ xumac ngɨbua wê anutu Atemis vông ge, xomxo ob yê tɨyi xocbê xumac pɨleva. Atemis ge il anutu vêx wê il Esia hɨxôn xomxo vac vɨgwe vɨhati mi kɨtaa vô ge, lêc Pol kɨyang ob vông lê levac wê Atemis vông ge vô nipaên.”
28 Xomxo tigee ngô kɨyang wê Demitlias nêl ge om he xêyaa vô myavɨnê dɨ he tyuc vya levac ên nêbê, “Atemis wê il Epesas vông ge i vêx levac.” 29 Mêd tyucên tige la vac vɨgwe Epesas vɨhati om tɨbii vɨhati vông dɨdun levac dɨ tup mɨ la hôm Gaias yuu Alistakas xôn dɨ dɨdii yuu dɨ he la vac vɨgwe wê he mi kɨtucma vac ge. Yuu ge Masedonia yuu wê mi la hɨxôn Pol ge. 30 Pol nêb ob la vac tɨbii wê kɨtucma gee mahɨgun, lêc xomxo vông vinên le vac xôn nêb i locên i ma. 31 Dêc gavman Esia mangwe wê Pol nipɨpu ge he vông kɨyang la vô Pol nêbê i loc vacên kɨtucmaên i ma.
32 Mêd xomxo wê kɨtucma gee, he tɨbeac o xovô kɨtucmaên tige kehe lêm, om he pɨyôp juda dɨ he ya tyuc kɨyang bangwe dɨ ya tyuc kɨyang baba ya. 33 Om Yuda ya kô lie ti lê nêbê Aleksanda mɨ la tung vac tɨbii kɨtucmaên mahɨgun ên nêbê i nêl kɨyang vô he, om Aleksanda vông vɨgê la kɨsii ên nêb ob nêl kɨyang. 34 Lêc xomxo tigee yê Aleksanda dɨ xovô nêbê ge Yuda ti, om he vɨhati tyuc vya yêp tibed ên nêbê, “Atemis wê il Epesas vông ge i vêx levac.” Mêd he tyuc vya tibêge tɨyi hɨyôv manôn yuu.
35 Mêd xomxo levac wê mi kɨvuu kɨyang wê he Epesas vông ge ti lam keac lec he dɨ he dô kɨyang maên, dɨ i nêl vô he ên nêbê, “Xam Epesas, bêna lêc xam tyuc vya lec Atemis? Xomxo vɨhati xovô ên nêbê il Epesas viac xumac ngɨbua wê Atemis vông ge dɨ il viac ngɨdax ngɨbua wê tô gê kɨsii ganê mɨ lam ge hɨxôn. 36 Xomxo ti tɨyiên ma wê ob pwoo kɨyang tige vac, om xam dô dɨdun maên, dɨ xam o lêc vông môp nipaên decdec lêm. 37 Xam kô xomxo yuu ge mɨ lam, lêc yuu o vun susu ti vac xumac ngɨbua lêm, dɨ yuu o so vya vô anutu wê il vông ge lêm. 38 Om Demitlias he nue yuac obêc nêb vông kot vô xomxo ti ge, od buc wê xomxo ob vông kot lec ge yêp, dɨ gavman levac dô, om he i loc vông kɨyang vô gavman levac ên i tɨtô he nên kɨyang. 39 Lêc kɨyang wê xam vông ge ya obêc gên yêp ge od buc wê kɨtucmaên ge xam nêl kɨyang tige dɨ il hi i yib. 40 Ên môp wê il vông gwêbaga tɨyi wê il ob tulec myavɨwen levac, ên il lam kɨtucma mɨ vông dɨdun levac, lêc gavman obêc kɨnêg kɨtucmaên tiga kehe vô il ge, od o tɨyi wê il ob nêl kɨyang ti lax vô he ge lêm.” 41 Xomxo levac nêl bêge vô he dɨ vông he toto la.