Pol Ina Giruma Karena
Korint
Damsi Kurisi
(1 Corinthians)
Vonaviakova
Weni girumina aposol Pol igirumi vitumaghana damsi Korint kwanatuna kamonai kurisi. Kunona Pol inae ku Korint ma idima kurisi da ekalesiya nani dobunai ivi karei. Ikuyowesi murinai na Korint damsi Keresiyana yawasina ma vitumaghana kamonai nuwapoya viya ipanani na Pol igiruma kurisi da ita terevimaninisi. Nani maranai Korint na kwanatu ghamanakina ma tuna na Grik damsi i dobuwai, dobuna kana vava Akeya. Ma Rome damsi na Korint kamonai imakamakai da Akeya kudubina ivivi badei. Ma Korint kana vava irakata da kamonai na wawaya ivivi gimagimara ma waka ipeyari kirakai da tuna na mura dobuna. Ma bade i kiki yawasina ikayokayotatei, vipekana wapawapa kamosiyai irakata, ma ku tepana i vitumaghana bogii ma bogiiyai da sawara yamoyamonisi irurunomesi.
Pol ina kayowana ghamana da nuwapoya viya iti sisiyei kurisi. Nuwapoyisi na weni, Keresiyana vibogebogena, vipekana wapawapa vitumaghana damsi kamosiyai, tavine, ikikava Keresiyana inakovi da mena berona ma mena biibiina, vokavara maninina ketana, Kanuma Vovokaravina ina puyo, ma ikikava wawaya rabobowai ina vomiiri. Nuwagiura ghamana ivi debei da Keriso Varana Biibiina na weni notasi iteremaninini.
Sapta 13 na wawaya peyarisi iakova bubuni ma mara nonowa iyavi, kamonai na nuwaviina isisiyei ma ivona da God ina puyo kiimatanina na nuwaviina.
Pol ina nota weni nakanani irereghi.
Sapta 1:1-9 Giruma ivotawei.
Sapta 1:10 da ku 4:21 Vibogebogena Keresiyana kamosiyai.
Sapta 5:1 da ku 7:40 Vipekana wapawapa ma tavine.
Sapta 8:1 da ku 11:1 Keresiyana ma iyavo kava ke iti tumaghana.
Sapta 11:2 da ku 14:40 Keresiyana i vokavakavara ketana maninina.
Sapta 15:1-58 Keriso rabobowai ivomiiri ma vitumaghana damsi bade rabobowai ina vomiiri.
Sapta 16:1-4 Verena Keresiyana vivikamyuyuwisi Judiya kamonai kubiisi.
Sapta 16:5-24 Vikiikiiwa ma giruma igudui.
1
God ina kayowanai na taku, Pol ikwatuku da ati aposol Yesu Keriso* Keriso: Grik damsi gamosi evonavona bo ‘Keriso’ ma Hibru damsi gamosi evonavona bo ‘Mesaya.’ Ivi ruwa iyamna ‘God ina Vivinevine Wawayina.’ kubiine, ma varesita Sostenis yavata akii viruwa kagirugiruma.
Tami vitumaghana wawayimi kurimi Korint kwanatuna kamonai. God ivovinemi da tami ina wawaya vovokaravimi na Yesu Keriso yavata kovi nuwasago. Ma wawaya dobu nununai Yesu Keriso evovokavakavari na ti yavata kurisi kagirugiruma. Keriso na kudubita ita Bada.* Apos 18:1
Ma ainowi ita Mamai God ma Bada Yesu Keriso kurisi da agabiibai ma nuwanuba ina veremi.
Keriso ina vibiibiina.
Mara nonowa tami kubiimi aku God aikiikiiwei, iyamna ina agabiibai kurimi irakata kirakai Yesu Keriso notanai. Keriso tepanai na tami ami bera kudubina God ivi biibiini, ami sisiya ma akova yavata. Keriso varana adimei tami kurimi na kamomiyai ivi rewapana kirakai, da God ina puyo kudubina kurimi irereghi ikovi. Ma nimonimoriyai koikoyakoyagha da avi maranai ita Bada Yesu Keriso ina nekiibau. Nota rewapana ina veremi ma kona miirikikina da ku damona, nani maranai Yesu Keriso ina nekiibau na ke sago iyai ini wavumi. God kovi tumaghanei da ina vonakiiyapa bagibagina iterei da aviyavisina ita berai kubiimi na ina berai. Ikwatumi da Natuna, tuna ita Bada Yesu Keriso yavata koni nuwasago.
Keresiyana vibogebogena.
10 Ita Bada Yesu Keriso rewapana ivereku da sisiya bagibagina turaturaku kurimi ana terei. Kamomiyai ke koni kawapata bo koni bogebogemi. Ami nota kovi sagoi ma komakii bubuna. 11 Varevaresiku, wawaya viya Klowe ina rakaraka kamonai ivoneku da tami kavakava koikawapata. 12 Aviyavisina aisisiyei na weni, kamomiyai na sisiya bogii ma bogiiyai ekiikiibau. Tami viya kovonavona da taku Pol kokivikiviniku, ma viya kovonavona da Apolos kokivikivini, ma viya kovonavona da Pita kokivikivini, ma bade viya kovonavona da Keriso kokivikivini.* Apos 18:24 13 Keriso na ke rerereghina. Taku Pol kubiimi korosiyai arabobo bo? Kaku vaviiyai kobabataito bo? Kegha!
14 God aikiikiiwei da taku ke sago iyai kamomiyai ata babataitoi, da Krispas ma Gayas ivi ruwa kava ababataitosi.* Apos 18:8, 19:29; Rom 16:23 15 Tuna kubiine wawaya ke ina vona da taku Pol, kaku vaviiyai ibabataito na kaku kivikivina. 16 (O, wekarakava anotai, Sitepanas ina rakaraka yavata ababataitosi ma ke ata notanotai da imapatana wawaya sago ata babataito.)* 1Kor 16:15 17 Keriso ivonataweku da God varana biibiina ata dimei ma ke babataito kubiine. Ke ata kayokayowei da Yesu Keriso ina vikamaghi ma ina rabobo korosiyai ina rewapana ana kiigavugavui, tuna kubiine ke wawayota i nuwagiurai ata dimadima vigayagaya.
Keriso na God ina nuwagiura ma ina rewapana.
18 Iyavo kava God ibarei na ina kiipupunatawesi. Ma ti kurisi na Keriso kana korosi iyamna kegha. Ma tota iyavo kava ivivi yawasita na takovi da tuna na God ina rewapana. 19 Aisaya igiruma da God ivona bo,
“Wawaya nuwanuwagiurisi i nuwagiura ana resotawei.
Wawaya akakovisi i akova ana viitawei.”* Isa 29:14
20 Ma bade nuwagiura wawayisi, giruma kirakiisi ma iyavo kava akova ita ghegheyanei, ti na ikikava? God ivi beyeta da weni dobuna nuwagiurisi na iyamsi kegha.
21 God ina nuwagiura na irakata kirakai. Ma iberai da wawayota i nuwagiurai ke kovokovoghina da God itakovi, iyamna, aviyavisina kadimadimei na wawaya viya evonavona da tuna na neghanegha sisiyisi. Ma God inuwabiibai da iyavo kava sisiyina ini tumaghanei na ini yawasisi. 22 Jiu damsi i kayowana da matakira ghamaghamasi ita kitai na iti tumaghana ma Grik damsi ti na nuwagiura iekwekwai. 23 Ma Keriso korosiyai irabobo varana kadimei na Jiu damsi ke iti vaghinei, ibarei. Ma kupuna damsi ivona da peyarina iyamna kegha. 24 Ma iyavo kava God ikwatusi, Jiu damsi ma kupuna wawayisi, ti damsi kurisi na Keriso varana kadimadimei. Tuna na God ina rewapana ma ina nuwagiura. 25 Ma iyavo kava varana ibarei ma ivonavona da iyamna kegha na God ina nuwagiura damina eviiviini ma enotanotai da neghanegha berasi. Ma kegha da tuna ina nuwagiura na irakata kirakai ke wawayota i nuwagiura nakanani. Ma bade God ina rewapana wawaya damina eviiviini ma enotanotai da mitamitana. Ma kegha da tuna ina rewapana na wawayota i rewapana ighekuyowei.
26 Varevaresiku, konota meyemi da tami ikikava maranai God ikwatumi. Wawaya kamosiyai tami ami nuwagiura igisi, ami rewapana igisi, ma kami vava ke ita rakata. 27 Ma kegha da God wawaya neghaneghasi ivinesi da wawaya nuwanuwagiurisi itinimayamayisi ma wawaya makiiwapasi ivinesi da wawaya ghamaghamasi ma rewapanisi itinimayamayisi. 28 Ma iyavo kava dobuwai wawaya ikitakitaoruwesi ma ke ita kayokayowesi na ti damsi God ivinesi. Weni nakanani iberai da aviyavisina dobuwai wawaya inotanotai da ghamana na ina resotawei, 29 tuna kubiine God kurina ke sago wawaya tuna mani ina terepa meyei. 30 Ma God iberai da tami ma Yesu Keriso kovi nuwasago. Ma bade iberai da Keriso tepanai ita nuwagiura taviiya. Itere bubunita da God kurina tota ina wawaya maninita ma ivovineta da tota vovokaravita, iyamna Keriso ivi yawasita. 31 Tuna kubiine giruma katamana evonavona bo, “Iyai ekayokayowei da vigheghena ina berai na aviyavisina Bada iberai, tuna kava ini ghegheni.”* Jer 9:24

*1:1: Keriso: Grik damsi gamosi evonavona bo ‘Keriso’ ma Hibru damsi gamosi evonavona bo ‘Mesaya.’ Ivi ruwa iyamna ‘God ina Vivinevine Wawayina.’

*1:2: Apos 18:1

*1:12: Apos 18:24

*1:14: Apos 18:8, 19:29; Rom 16:23

*1:16: 1Kor 16:15

*1:19: Isa 29:14

*1:31: Jer 9:24