21
Aisiki itupuwa.
1 Bada ina agabiibai Sera kurina irakata da ikikava ivonakiiyapa na iberai. 2 Namanaki da Abraham imorapa kirakai na Sera iropeya ma ivi tuwa da natuna tomowa. Avi maranai tomowa kikei ita tupuwa na God namada ivi debei na vaghina, nakanani itupuwa. 3 Sera ivi tuwa ikovi na Abraham tomowa kikei ivi vavei ‘Aisiki* ‘Aisiki’ Hibru damsi gamosiyai ‘Aisiki’ iyamna ‘vinama.’.’ 4 Ma mara 8 ikovi na God ina sisiya bagibagina ikivini da natuna kwimata bekana ituviviratawei. 5 Tomowa kikei itupuwa na ina mamai kana madegha na 100.
6 Ma Sera ivona bo, “God nuwabiibai ivereku ma iberai da ainama. Wawaya peyarisi sisiyiku ini yanei na yavata kani nama patapata.” 7 Ma ku tepana ivona bo, “Rorova wawaya ita pisi kawaku ita vonei da taku mani natuku ati susui na kata nota kavakavai. Ma kegha, kawaku moramorapina ma natuna tomowina avi tuwei da weni.”
8 Ma vaghina, Aisiki imagura ma vikaratawena kubiine na Abraham kamporagha ghamana iberai.
Heiga da Ismayel ivonatawesi inae.
9 Egypt wavine Heiga na Abraham natuna Ismayel ivi tuwei ma muriyai Aisiki itupuwa. Ma Ismayel ivi karei da Aisiki ivivi namei ma ikitakitaoruwei. Mara sago Sera ikitisi 10 na inae da Abraham ivonei bo, “Buderi kuna rereghi na Ismayel nevanevana ke ina viiya, kudubina na natuku Aisiki ini rapenei. Tuna kubiine nani sleiv wavinena natuna yavata kekwavinisi ina nae.”
11 Weni sisiyina kubiine Abraham nuwanuwana ipoya kirakiiyei, iyamna Ismayel na bade natuna. 12 Ma God, Abraham ivonei bo, “Tomowa kikei ma ami bigabiga wavinena na ke kuni nuwapoyesi. Aviyavisina Sera evonavonem na kevi yanei. Aisiki gwabinai tupurereghim ina rakata da am wawaya na dam ghamana, ke Ismayel gwabinai. 13 Ma bigabiga wavinena natuna na bade natum, tuna kubiine ani biibiini da tupurereghina ina rakata da dam sago.”
14 Mara itom ma mara boiboi nakiyai Abraham ivomiiri ma vavai da ‘okowa diudeuna’† ‘okowa diudeuna’ Hibru damsi i diudeu na ke paka, ti na ghamoghamo bekasiyai iyamona. iviiya da Heiga kana keta tamiina. Ku katagheyana iterei ma natuna yavata ivonatawesi inae. Ivi ruwa inae da ku dobu makiiwapana (Dobuna kamonai gawara sago kana vava Beyaseba). Ma nani dobunai ibababa yawara.
15 Okowa kudubina diudeu kamonai iumai ikovi na tomowa kikei kiikiiruku rogunai iterekuyowei. 16 Ibaba inae gisina ma ivi kiimakiiyei. Inotai da natuna ita rabobo tuna kubiine ke ina kayowana da ita kitai. Nani dobunai imakamakai da tou ivi karei.
17 God ivi yanei da tomowa kikei itutou na ina aneya kunumai ivi kwatu Heiga kurina, ivonei bo, “Heiga, aviyavisina ibero? Ke kuna yabumana. God ivi yanei da tomowa kikei ekenakena ma etutou. 18 Kevomiri, kenae da imana kuna viiya ma kuna tinavomiirini. Ke ina rabobo ma ana berai da tupurereghina ina peyari.”
19 Vaghina ma God iberai da Heiga matana itamotatagha ma ikita da dogo sago ikitai. Inae da diudeu ivui ma tomowa kikei iverei da iuma.
20 Ma vaghina, Ismayel imagumagura na God na gwabinai. Dobu makiiwapasiyai imakamakai ma tuna na dosiyo wawayina. 21 Warere kana vava Paran na nani dobunai imakamakai na ina maduwa inae da Egypt wavine sago irutini da natuna kawana.
Abraham da Abimaleki vivaghina iberai.
22 Nani maranai Abimaleki ma ina iyo damsi i bada ghamana Pikol na inae Abraham kurina ma ivonei bo, “Akitai da aviyavisina kudubina keberaberai na God gwabimuwai. 23 Tuna kubiine ainowi da God ku matana kuna vonakiiyapa kuriku da ke meyani kuni beroberowekai, natunatuku ma tupurereghiku yavata. Weni dobunai tam na dobu viruwa wawayim ma kevi debe meyem da ikikava aku nuwaviina avereverem na nakanani bade kuna vereku.”
24 Abraham ivona bo, “Vaghina, avonavonakiiyapa kurim.”
25 Muriyai nuwapoya sago ivi dughuwei. Abraham dogo sago rapenai ivi yarani ma Abimaleki ina bigabiga iviiya, tuna kubiine Abraham, Abimaleki kurina ivi gheviravira. 26 Ma Abimaleki ivona bo, “Ke atakovi da iyavo kava weni berana iberai. Ke kuta voneku, tuna kubiine wekarakava sisiyina avi yanei.”
27 Tuna kubiine Abraham sipu da kau irutinapiyei da Abimaleki ipuyoi ma ivi ruwa vivaghina iberai. 28 Ma Abimaleki ikitai da Abraham ina sipu yavona kamonai sipu wivinesi votuvotusi ivi 7 ivoviviri, 29 ma ivi tarakiiyanei bo, “Weni sipusi na avi kubiine?”
30 Ma ivonapotei bo, “Weni sipusi votuvotusi ivi 7 imakuwai kevopotei, ini matakira da weni dogona na taku mani ayabai.” 31 Ma vaghina, nani dobunai ivi ruwa vivaghina iberai, tuna kubiine dobuna ivi vavei Beyaseba‡ Hibru damsi gamosiyai na Beyaseba iyamna ruwa, sago na ‘vivaghina kana dogo,’ ma sago na ‘ivi 7’..
32 Vivaghina iberai ikovi na Abimaleki ma ina iyo damsi i bada ghamana Pikol na ivovirame i ku kwanatu Pilisti dobuna kamonai. 33 Ma Abraham na kii kana vava tamarisk ivoni Beyaseba dobunai. Ma bade nani dobunai Bada makamakii nonowina ivokavakavari. 34 Ma vaghina, mara iguri kirakai Pilisti dobuna kamonai imakai.