1 Sera imakai da kana madegha 127, 2 vaghina ma kwanatu kana vava Kiriyati Aba na kamonai irabobo. Kiriyati Aba kana vava sago na Hibron, tuna Keinan dobuna kamonai. Ma nani dobunai Abraham itou ma isiyapa kawana Sera kubiine.

3 Vaghina ma, kawana tupuwina ivoterei ma ivomiiri inae Hiti damsi kurisi ma ivona bo, 4 “Taku dobu viruwa wawayiku, kaku vava na numataya ma kamomiyai amakamakai. Kade karawaga kubiine tano gisina weni dobunai ata gimari da kawaku tupuwina ata terei.”

5 Ma Hiti damsi ivonapotei bo, 6 “Bada, kevi yanekai, kamokiiyai tam na kiivavo ghamam. Nuwabiibiiyai kaivaghinei da am kayowanai akii karawaga sago biibiina kevinei da kawam tupuwina kuna terei.”

7 Ma Abraham nani dobuna damsi ivokaravesi da gayamina itereoruwei 8 ma ivona bo, “Kovi vaghinei da kawaku tupuwina ami dobuwai ana terei, tuna kubiine kade Soya natuna Eperon kurina koti nowi 9 da gwabinai buba kana vava Makipela ata gimaratawei, tuna bonaghina na Eperon ina parata ririnai. Kovonei da maghinomiyai buba kana miiya vaghata ina terei da kudubina ani miiyatawei da nani karawagina na taku ani rapenei.”

10 Abraham na Hiti damsi kurisi ivivi sisiya na peyarisi kwanatu matuketinai ivivi makiiyana da ivivi yana. Ma Eperon na yavata nani kamonai. Ma Abraham kurina ivona bo, 11 “Kegha, aku bada, kevi yaneku. Aku wawaya maghinosiyai nani bubana ma tanona na kudubina avereverem da nani dobunai kawam tupuwina kuna terei.”

12 Abraham na ivokaravesi da gayamina itereoruwe meyei 13 ma maghinosiyai ivi sisiya Eperon kurina da peyarisi iti yanei. Ivona bo, “Kegha, kevi yaneku. Tanona kudubina kana miiya vaghata kevoneku da ani miiyatawei. Kevi vaghinei da ani miiyem ma nani dobunai kawaku tupuwina ana terei.”

14 Ma ivonapotei bo, 15 “Aku bada, kevi yaneku. Tanona miiyiina na silva riririghisi ivi 400 ma tuna ke sago avai. Kegimari ma kawam tupuwina nani dobunai kuna terei.”

16 Abraham, Eperon ina sisiya ivi vaghinei ma Hiti damsi maghinosiyai silva riririghisi ivi 400 na ivi yavi da ruvana iviini ma iverei. Ma Abraham ina silva sago sago duma i vita ma vivigimara wawayisi nani kwanatuna kamonai i silva sago sago duma i vita na ivi yavayavatei.

17 Vaghina ma Eperon ina tano ivi damani Abraham kurina. Dobuna kana vava Makipela, tuna na Mamre ririnai. Ma nani kamonai vao, kii ma buba na kudubina Abraham iviiya, 18 da ivi rapenei. Weni berana na kwanatu matuketinai iberai da Hiti damsi peyarisi matasiyai ikitai.

19 Nani murinai Abraham kawana tupuwina ikavaraneyei da buba ku kamona iterei. Bubana na Mamre ririnai, Keinan dobuna kamonai, ma Mamre kana vava sago na Hibron. 20 Ma vaghina, nakanani itupuwa da Hiti damsi i tano ma bubana Abraham iviiya da ivi karawagei.