27
Aisiki, Jeikap ivi biibiini.
1 Aisiki imagura kirakai ma matana isowasowa da ke ruvaruvana ita kita. Mara sago natuna iyarokona Iso ikwatui ma ivonei bo, “Natuku.”
Ma ivonapotei bo, “Taku weni.”
2 Ivona bo, “Taku wekarakava na amagura kirakai ma gisina kava da ana rabobo. 3 Am yovu ma dosiyo kekavari ma kekiibau ku warere da siya sago kuna vowai kubiiku. 4 Kaku siya kekavarapiyei ma vavai yavata kevokuya monamonai da ana kam. Ana kam ina kovi na muriyai da ana rabobo na ani biibiinim.”
5 Aisiki nakanani ivivi sisiya Iso kurina na Rebeka ivivi yana. Iso ivomiiri ikiibau ku warere da siya sago ita vowai ma ita kavarapiyei, 6 na Rebeka natuna Jeikap kurina ivona bo, “Am mamai ivi sisiya Iso kurina ma avi yanei. 7 Ivona bo, ‘Siya sago kekavarapiyei ma vavai yavata kevokuya monamonai da ana kani. Ma muriyai da ana rabobo na Bada matanai ani biibiinim.’ ” 8 Muriyai Rebeka ivona bo, “Natuku, kevi yana bubuna da aviyavisina ana vonem na kuna berai. 9 Kenae da gote yavona kamonai na dodosi ivi ruwa kuna vinetawei ma kuna rutinapiyei da ana vokuya monamonai. Ikikava am mamai ekayokayowei na nakanani ani tavi. 10 Ma kuna kavaraneyei am mamai kurina da ina kani ma muriyai da ina rabobo na ini biibiinim.”
11 Ma Jeikap ina maduwa kurina ivona bo, “Aku tuwa Iso na ere inikorokorona ma taku na kegha. 12 Kade mamai ita votovoniku ma ita panani da aiberoberowei na vibiibiina ke ana viiya. Kegha, taku mani kaku imaga ana titinariyai.”
13 Ma ina maduwa ivonapotei bo, “Natuku, avi imagina ina tupuwa kurim na biwana taku ana viiya. Ma aviyavisina avonavonem na keberai. Kenae da gotesi kuna rutinapiyei wike.”
14 Vaghina ma, inae da irutinisi ipisi ina maduwa kurina. Ma ikikava ina mamai ikayokayowei na nakanani ina maduwa ivokuya monamonai. 15 Muriyai Rebeka inae da Iso kana gara biibii kirakiisi numiyai itura imakamakai na iyuna da natuna murimurina ivi kotei. 16 Ma bade gote bekasi iviiya da imana igerei ma bade ku iwana mumumuna itawanepai. 17 Vaghina ma, nani vavina ivokuya monamonai na iverei.
18 Jeikap inae ina mamai kurina ma ivonei bo, “Mamai.”
Ma Aisiki ivonapotei bo, “Avai natuku, tam iyai?”
19 Ma Jeikap ivi bero, ivonapotei bo, “Taku na natum iyarokoku ma aviyavisina kuvoneku na aberai, tuna kubiine kemakiivomiiri da kam siya kuna kani ma vibiibiina kuna vereku.”
20 Ma ivona bo, “Natuku, ikikava siya kupanani, iyaghiyaghina ghagha?”
Ivonapotei bo, “Am Bada God ivowaguku da avowai.”
21 Vaghina ma, ina mamai ivona bo, “Kepisi kuriku da ana votovonim. Anakovi da tam natuku Iso bo kegha.”
22 Jeikap inae ina mamai ku dogarina ma ina mamai ivororona da ivopitapitari ma ivona bo, “Gamom na nakanani ma Jeikap ma imam na nakanani ma Iso imana.” 23 Jeikap imana igerei da korokorona nakanani ma Iso imana, tuna kubiine Aisiki ke ita vogii tovoni. Tuna kubiine karakava, kam murinai na ivi biibiini.
24 Ma ivi tarakiiyaname, “Vonavaghata da tam natuku Iso bo?”
Ma Jeikap ivonapotei bo, “E, taku.”
25 Ma ivona bo, “Natuku, siya kuvowai na kepiyei ana kani ma muriyai na ani biibiinim.”
Vaghina ma, Jeikap siya ma vavai ikavaraneyei da ina mamai ikam ma bade wain yavata iverei da iuma. 26 Vaghina ma ina mamai ivona bo, “Natuku, kepisi kuriku da kuna yoniku.”
27 Inae kurina da iyoni na ina mamai na kana gara pughuna iyoni da weni nakanani ivi biibiini. Ivona bo,
“Natuku, pughum ibiibii kirakai. Tuna nakanani ma tano pughuna. Tano Bada ivi biibiini na pughuna ibiibii kirakai.
28 Ainowi God kurina da garewa kunumai ina verem ma am tano ini biibiini da am mura ina rakata. Ina berai da witi ma wain kana greipi kuna yuna kirakiiyei.
29 Ainowi da dobu ma dobu ina biga kubiim, ma dam ma dam ina runomem.
Ma titim yoghoyogho kuni badesi. Ma am maduwa tupurereghina na peyarisi ina runomem ma ina vokaravem.
Ainowi da iyavo kava inimagim na God inimagisi ma iyavo kava ini biibiinim na God ini biibiinisi.”
Iso ivi nowi Aisiki kurina da iti biibiini.
30 Ivi biibiini ikovi na Jeikap ivomiiri inae. Inenae na nani kamonai Iso iyebagha ikovi da inekiibau. 31 Iso bade vavai da siya ivi tava monamonai ma ikavara inae ina mamai kurina ma ivonei bo, “Mamai, kemakiivomiiri da weni siyana akavarapiyei na kuna kani ma kuni biibiiniku.”
32 Aisiki ivi tarakiiyana bo, “Tam iyai?”
Ma ivonapotei bo, “Taku Iso, natum iyarokoku.”
33 Vaghina ma, Aisiki ivi nuwapoya kirakai da kiroro ivi karei ma ivona bo, “Nakanani na iyai siya ivowai ma ikavarapiyei kuriku? Akani ikovi ma avi biibiini ma muriyai tam kunekiibau. Ma nani vibiibiinina namada averei ikovi da gwabinai ina makii nonowa.”
34 Ina mamai ina sisiya ivi yanei na Iso nuwanuwana ipoya kirakai da ere tutuna ivona bo, “Mamai, nakanani na taku bade kevi biibiiniku.”
35 Ma ivona bo, “Tim kikei ipisi ma ivi beroberoweku da am vibiibiina iviiyavui.”
36 Ma Iso ere nuwavisina ivona bo, “Wena mara kana viruwa ivi beroberoweku. Kovi vava bubuni da tuna na ‘Jeikap.’* Hibru gamonai ‘Jeikap’ iyamna ‘vibero wawayina.’ Kunona kaku gawara iviiya da ivi yaroko ma wekarakava na aku vibiibiina gwabimuwai iyapiya da ivi rapenei.” Muriyai ivi tarakiiyana bo, “Kade vibiibiina sago kuvi yapakei da kubiiku bo kegha?”
37 Ma ivonapotei bo, “Kegha. Tuna na namada rewapana gwabikuwai iviiya da ini badem ma ita rakaraka kudubisi aberisi da ti na ina bigabiga. Ma bade avi biibiini da vavai ma wain na mara nonowa gwabinai ina rakata. Natuku, wekarakava na kesago avai da ana berai kubiim.”
38 Ma Iso na ina mamai ivonei bo, “Kade vibiibiina sago kava kuvi yapakei kubiiku bo kegha? Aku mamai, taku bade kevi biibiiniku!” Ivi sisiya ikovi na itupagavovora da tou ivi karei.
39 Ma Aisiki ivonei bo,
“Kesago garewa kunumai inoru da tam kubiim,
Kesago tano biibiina da kuna wayowei.
40 Am yawasa kamonai na kuni tona da kuna makai.
Ma tim kikei kubiine kuna biga.
Ma mara sago koni kawapata kirakai,
Ma tuna maranai kuna kiibutawei da nani vitana kuna tatawei.”
Jeikap iverau Leiban kurina.
41 Jeikap, ina mamai ivi beroberowei da gwabinai vibiibiina iviiya, tuna kubiine ina tuwa Iso nuwanuwana ipughu kirakai. Iso ivona da i mamai na mara gisina kava da ina rabobo ma kasira ina kovi, nani murinai na Jeikap ina kiivunui.
42 Ma kegha, wawaya sago Iso ina sisiya ivi yanei ma inae da Rebeka ivonei. Ma tuna na Jeikap kana sisiya ivonatawei da ipisi, ma ivonei bo, “Kevi yana, am tuwa kana biwa ina viiya, ina kayowana da ina kiivunum. 43 Natuku, aviyavisina ana vonem na keberai. Tam na keverau! Yaghiyaghinai kuna nae ku Haran, novuku Leiban kurina. 44 Yavata kona makamakai da am tuwa ina nuwapughu ina kovi. 45 Karakava nuwanuwana ina nuba ma aviyavisina kurina kuberai na ini nuwawapei. Tuna maranai na kam sisiya ana vonatawei da kuna pisi. Ke vaghina da ami viruwa mara sago kava kamonai ani wapimi.”
46 Muriyai Rebeka inae Aisiki kurina ma ivonei bo, “Weni Hiti wivinesi natuta Iso iravaghisi na ke aku kayowana, weni makamakiina na ke ata vivivaghinei. Mikeda Jeikap bade weni dobuna kamonai Hiti wavine sago ina ravaghi na ibiibai da ata rabobotaweyana.”