46
Jeikap ivomiiri ku Egypt.
1 Vaghina ma Jeikap ina sawara kudubina iviiya ma ina rakaraka irutinisi da ivomiiri ku Egypt. Inenae da inekiibau ku Beyaseba na isuwara ma ivokavakavara ina mamai Aisiki ina God kurina.
2 Ma nani didibarinai na ina kena kamonai na God ivi sisiya kurina, ivona bo, “Jeikap, Jeikap!”
Ma ivonapotei bo, “Taku weni.”
3 Ma God ivona bo, “Taku na God, am mamai ina God. Ke kuna yabumana da kunoru ku Egypt, iyamna nani dobunai ana berim da tupurereghim ina rakata da dam ghamana ina tupuwa. 4 Taku na ke ana voterem, tam yavata toru patapata ku Egypt. Ma mara sago tupurereghim ana rutinisi da ina vovirame ku Keinan. Ma bade ana berai da am rabobo kana ku mara na Josepa na gwabimuwai.”
5 Jeikap natunatuna ivomiiri da i mamai na tano wakasi Pero ivi vonataweyana na ku tepana ivi gerui ma bade nakanani kakawasi ma natunatusi yavata ivi gerusi. Ma vaghina ivomiiri da Beyaseba dobuna ikiibutawei ioru ku Egypt. 6 Ma bade i ghamoghamo, i sawara gwabisiyai Keinan dobunai iviiviiya na yavata inae ku Egypt. Jeikap inenae na ina rakaraka kudubisi na yavata. 7 Natunatuna, tuputupuna, tomotomowisi ma wivinesi na kudubisi irutinisi da yavata ioru.
8 Jeikap ina rakaraka iyavo kava ioru ku Egypt, kii vava na weni.
Jeikap natuna iyarokona na Ruben. 9 Ma Ruben natunatuna tomotomowisi na Hanoki, Palu, Hesron ma Kami.
10 Simeyon natunatuna tomotomowisi na Jemuwel, Jamin, Oyadi, Jakin, Soya ma Saul, tuna na Keinan wavine natuna.
11 Levi natunatuna tomotomowisi na Geson, Koyati ma Merari.
12 Juda natunatuna tomotomowisi na Eru, Onan, Sela, Peres ma Sira (Eru da Onan na Keinan dobunai irabobo.)
Peres natunatuna tomotomowisi na Hesron da Hamul.
13 Isaka natunatuna tomotomowisi na Tola, Puwaya, Jasuba, ma Simron.
14 Sebulum natunatuna tomotomowisi na Seredi, Elon ma Jalil.
15 Ma vaghina, weni damsi tavi yavi ikovi na Jeikap kawana Liya yavata Padan Aram* ‘Padan Aram’ kana vava sago na ‘Northwest Mesopotemiya.’ dobunai imakamakai na ivi tuwesi da natunatuna ma tuputupuna na ivi 33 ma ku tepana na novusi Daina.
16 Gedi natunatuna tomotomowisi na Sepon, Hagi, Suni, Esbon, Eri, Arodi ma Areli.
17 Asera natunatuna tomotomowisi na Imna, Isva, Isvi, Beriya ma novusi na Seraya. Beriya natunatuna tomotomowisi na Heberu ma Malkiyel.
18 Ma vaghina, weni tomotomowisi ivi 16 na Jeikap da Silpa tupurereghisi. Kunona Silpa na Leiban ina bigabiga ma natuna Liya iverei da ina bigabiga wavinena.
19 Jeikap kawana Risera ivi tuwa da natunatuna tomotomowisi na ivi ruwa kava, Josepa da Benjamin. 20 Ma Egypt dobunai Josepa ivi tuwa da natunatuna tomotomowa ivi ruwa, Manase da Eperaim ma i maduwa na Asenati. Ma Asenati ina mamai na Potipera ma tuna na god vibero ina vokavara ivi badei ‘On’† ‘On’ kana vava sago na ‘Heliyopolis.’ kwanatunai.
21 Benjamin natunatuna tomotomowisi na Bela, Bekeru, Asbel, Gera, Naman, Eiyi, Rosi, Mupim, Hupim ma Adi.
22 Ma vaghina, weni tomotomowisi ivi 14 tavi yavi ikovi ti na Jeikap da Risera tupurereghisi.
23 Dan natuna tomowina sago kava na Husim.
24 Napitali natunatuna tomotomowisi na Jasiyel, Guni, Jeseru ma Silem.
25 Ma vaghina, weni tomotomowisi ivi 7 na Jeikap da Biliya tupurereghisi. Biliya na Leiban ina bigabiga ma natuna Risera iverei da ina bigabiga wavinena.
26 Jeikap tupurereghina vaghata ioru ku Egypt na ivi 66 ma nani kamonai na rawarawana wivinesi na ke kati yavisi. 27 Ma ku tepana na Josepa, ma natunatuna ruwa na Egypt kamonai itupuwa. Peyarisi tisagosi na Jeikap tupurereghina yavata ivi 70.
Jeikap inekiibau ku Egypt.
28 Jeikap inenekiibau ku Egypt na Juda ivonatawei ivi nao Josepa kurina da keta ita tupavibeyesi da ita nae ku Gosen dobuna. 29 Inekiibau ku Gosen na Josepa yaghiyaghinai ina serioti ivovunagha ma igeru inae da ina mamai ita verupotei. Josepa inekiibau na ina mamai itaraghavui ma ituwei da kana guri.
30 Ma Jeikap, natuna Josepa ivonei bo, “Taku mani matakuwai akitim da tam patana da yawayawam kemakamakai. Wekarakava ata rabobo na nuwabiibiiyai ata nae.”
31 Vaghina ma Josepa ivi sisiya ina mamai ma varevaresina ma ina rakaraka kudubisi kurisi, ivonesi bo, “Ana nae kiivavo Pero kurina ma ana vonei da varevaresiku ma aku mamai ina rakaraka Keinan dobunai ivivi makiiyana na ipisi kuriku. 32 Ma ana vonei da tami na sipu kii koyakoyagha ma bade ghamoghamo viya yavata kokoyakoyaghisi. Ma kopisi na ami ghamoghamo yavoyavosi ma ami sawara kudubina yavata koviiya ma kopisi.” 33 Vaghina ma Josepa ina rakaraka ivonesi bo, “Ma Pero ina kwatumi kona rui na ini tupaviremi da weni marana gurigurina komakamakai na avi bigasi kava koberaberai. 34 Ma tami na weni nakanani kovonei, ‘Tokai am bigabiga na gisigisikiiyai ghamoghamo vikam kavi karei. Nakanani akii mami mau da doboro mau ivivi kam.’ Nakanani kona vonapotei na ini vaghinei da Gosen dobunai kona makai, iyamna Egypt damsi na sipu kii koyakoyagha ke ita kayokayowesi.”