49
Jeikap natunatuna ivi biibiinisi.
1 Vaghina ma Jeikap natunatuna ikwaturiyariyesi ma ivonesi bo, “Komiirigwagwariku ma ana vonemi da mara karakava epipisi na aviyavisina ina tupuwa kurimi.
2 Natunatuku, taku ami mamai Jeikap.
Kopisi wike ma kovi yana.
Kaku vava sago na Israel.
Koriyemi da aku sisiya koni yanei.
3 Ruben, natuku iyarokom, tam na aku rewapana.
Kutupuwa na ivi matakira da taku na avi tomowa.
Tam na kayotatam ma rewapana kirakiim natunatuku peyarisi kamosiyai.
4 Tam na kayoghakighakim ma kara ke kuni wawayaghama, iyamna kawaku yavata bera berona koberai da aku kepana gawarina kuvi dadabui.
5 Simiyon da Livai
Tami na ami seri na kapiya kubiine, ami kayowana vighaviya.
6 Ami ogatara gavugavusi ke ati vaghinei,
Ma ami ku dughu kamosi ke ana rui.
Nuwanuwami ipughupughu na wawaya kovi kiivunuwana,
Ma bade ghamoghamo korugwarigwarisi da kaesi kovi sidarisi,
Iyamna ami kayowana ghamana da ina vokwarakwara.
7 Ami nuwapughu ma ami kayoghakighaki na iberoberowana kirakai,
Tuna kubiine God inimagimi.
Ma Israel dobunai tupurereghimi ina kiivigerisi
Ina berisi da Jeikap tupurereghina kamosiyai ini bogebogesi.
8 Juda, tam na varevaresim ini gheghenim,
Ma imamuwai kam ghavighaviya kuna ghegavovorisi.
Am tuwa mau ma titim yoghoyogho ina runomem.
9 O Juda, tam na laiyon natuna.
Kuvokiira, kukam ma kuvovira am ku bonagha.
Tam nakanani ma laiyon wavinena iti kwerukweru da ita kenakena,
Ke sago iyai da ini tataghani.
10 Tupurereghim mara nonowa ini bada,
Ti na kiivavo ina diwona ina voviteteyanei.
Ke kovokovoghina ini damani dam sago kurisi.
Ina nenae da wawayina vaghata ina nekiibau.
Ina nekiibau ma dam ma dam ina pisi da ina suwari ma ina vokaravei.
11 Ina mura ina rakata da ina donki ku greipi kunukununa ina warimi.
Ku greipi uravina ina kune da ruguruguna ina kamkam.
Ma kana gara na wain kamonai ina kowai.
Kana tarasovo na greipi muina tarataranai ina vokutuvi.
12 Matana na ina yebari da wain nakanani.
Ma okena na ina poi kirakiiyei da mereki nakanani.
13 Sebulun, tam na kikira baranai kuna makai
Ma tam gwabimuwai na waka ina viviwotawotei,
Am parata ina nae da ku Sidon.
14 Isaka, tam na nakanani ma donki,
Vita kana kavakavara.
15 Kuna kitai da am viyakam gawarina na ibiibii kirakai
ma am tano na biibiina kavakava,
Ma kegha da kuna tupe meyem da biga vitana kuna berai,
ma bade wawaya ina darum da kuna vobagibagi kirakai.
16 Dan na tam kuni dam sago Israel kamonai
Ma nota maninina tepanai am wawaya kuni tupaviresi ma kuni badesi.
17 Tam na mota sago keta baranai,
Tam nakanani ma mota berona keta ekenakenapotai da hosi kaegidugiduna ina tonai,
Hosi ina tonai na ini kapoka ma geru wawayina murimuriyai ina peku.”
18 Muriyai da Jeikap ina sisiya ita kwapanatini, ivona bo, “O Bada, akoyakoyaghim da kuni yawasiku.”
Vaghina ma, ivona bo,
19 “Gedi, tam kurim na keta bababasi yapiyapisi ina kayaya,
ma kegha da kuna miiritavire da kuna kwavinisi.
20 Asera, tam na am tano na mumurina
ma kiikiivavo kii vavai ina yamona da vaviisi na biibiisi ma magimagisi.
21 Ma Napitali, tam na nakanani ma diya wavinena, tuna na vovotawena da ina kayowanai ina baba,
ma ituwa da natunatuna na kiikiimatanisi.
22 Ma Josepa, tam na nakanani ma greipi ere amamena
da vusira baranai emiimiiri.
Ma ragharaghana ituwa ikiibu kirakai da ku gari kupuna.
23 Dosiyo wawayisi ere nuwapughupughusi ina kayaya kurim
da iti tonem ma kegha.
24 Taku Jeikap aku God Rewapana Kirakiina ina vowagum,
Tuna na sipu kii koyakoyagha nakanani, tota Israel kata wakima rewapanina
Tuna kubiine am yovu kuna vokikini da bagibagina,
ma imam na rewapana makamakiina, ke ina mitamita.
25 Iyamna am mamai ina God ini vitem,
God Rewapana Kirakiina* Hibru gamonai God Rewapana Kirakiina na ‘El Sadai.’ ini biibiinim.
Kunuma da dobu kana vibiibiina ina verem
ma tupurereghim ini biibiinisi da ini tuwa ma ini susu bubuna.
26 Taku am mamai aku vibiibiina avereverem na ighe kirakai,
da koya vovosi ighekuyowesi,
irakata da koya katakatamanisi irogusi.
Weni vibiibiinisi peyarina na tam Josepa avereverem,
ku tepam atereterei,
ma varevaresina kamosiyai tam na kiivavo.
27 Ma Benjamin, tam na nakanani ma kukou dipa kayakayayina.
Ikikava mara boiboiyai kukou kana siya ina vowai ma ina kam yavui na nakanani,
kam ghavighaviya kuna vowa kirakiiyesi.
Ma raviyai sawara gwabisiyai kuneboi na kuna vorereghi am wawaya kurisi.”
28 Ma vaghina, Jeikap nakanani ivi sisiya natunatuna kurisi, sago sago duma i bera nununai ivi biibiinisi. Ma natunatuna, ti na Israel kana dam ivi 12 i kaekiki mau.
Jeikap irabobo.
29 Jeikap natunatuna weni nakanani ivi varavarisi, “Gisina kava ma ana rabobo. Ana rabobo na tupuwiku koviiya kona nae da imapatana aku mamai da aku doboro buba kamonai idogosi na nani dobunai kona dogoku. Kunona nani bubana na Hiti wawaya rapenai, tomowina kana vava na Eperon. 30 Bubana na dobu kana vava Makipela kamonai, tuna na Mamre ririnai, Keinan dobunai. Abraham nani tanona Hiti wawaya kana vava Eperon gwabinai igimari da nevanevana na ivi karawagei. 31 Ma nani dobunai na Abraham kawana Sera yavata idogosi ma bade Aisiki kawana Rebeka yavata idogosi. Ma bade nani dobunai kawaku Liya adogoi. 32 Ma nani tanona da bubana na Hiti damsi gwabisiyai igimari da rapetiyai.”
33 Ma natunatuna tomotomowisi ivi varavarisi ikovi na kaena itawanepai ina ku kenakena gawarina, yana itapurai ma irabobo.