7
God ina wawaya 144 tausan.
1 Weni berasi ikovi ma akita na dobu matatupina ruwamaruwa ma tepasiyai na aneya ruwamaruwa akitisi ivivi miiriyana. Ti na yanunu ruwamaruwa ivovopotepotesi da ke ita verau da dobu bo yegai bo kii sago ita tapi tovoni.*Jer 49:36; Dan 7:2; Zech 6:5 2 Muriyai akita na bade aneya sago maramatanai igheghae akitai. Ma matakira sawarina ikavari, tuna sawarina ina biga da iyavo kava God yawayawana rapenai na maghitepasi ita kiruma. Ma ikiirara aneya ruwamaruwa kurisi, ti na rewapana iviiya da dobu ma yegai iti beroi, tuna kubiine na ivonesi bo, 3 “Dobu ma yegai ma kii kudubina ke koni beroi, kovi koyakoyagha da kunona God ina matakira ina bigabiga wawayisi maghitepasiyai kana kiruma.”*Ezek 9:4, 6 4 Muriyai sisiya avi yanei da iyavo kava ikirumisi na peyarina ivi 144 tausan. Ma kudubisi na Israel kii dam kamosiyai.
5 Juda kana dam kamonai na 12 tausan ikirumisi,
ma Ruben kana dam kamonai na bade 12 tausan ikirumisi,
ma Ged kana dam kamonai na bade 12 tausan ikirumisi.
6 Ma Asera kana dam kamonai na 12 tausan ikirumisi,
ma Napitali kana dam kamonai na 12 tausan ikirumisi,
ma Manase kana dam kamonai na bade 12 tausan ikirumisi.
7 Ma Simiyon kana dam kamonai na 12 tausan ikirumisi,
ma Livai kana dam kamonai na 12 tausan ikirumisi,
ma Isaka kana dam kamonai na bade 12 tausan ikirumisi.
8 Ma Zebulun kana dam kamonai na 12 tausan ikirumisi,
ma Josepa kana dam kamonai na 12 tausan ikirumisi,
ma Benjamin kana dam kamonai na bade 12 tausan ikirumisi.
Koroto ghamana kii gara poipoisi.
9 Ma weni berasi murinai akita ku maghinoku na koroto ghamana akitisi, ke kovokovoghina da ati yavisi. Kamosiyai na dam ma dam kudubisi i wawaya emakamakai, i dobu ma gamosi bogii ma bogiiyai na nani vikiivavo gawarina ma Sipu Gegeyina maghinosiyai imiimiiri. Kudubisi na gara poipoisi ivi kote ma imasiyai na yapi rugurugusi ivovotana.
10 Ma ikarayogosi bo,
“Ita God na vikiivavo gawarina tepanai emakamakai
ma Sipu Gegeyina yavata.
Ivi yawasita, tuna kubiine tavovokavakavarisi.”
11 Ma ghamoghamo yawayawasi ruwamaruwa ma magumagura avatetesi ivi 24 vikiivavo gawarina imiiriviviri. Ma murisiyai na aneya kudubisi bade imiirivivirisi ma vikiivavo gawarina maghinonai ivi tuwaporeruruwana ma itawotesi da maghitepasi dowa ikiitovoni ma God ivovokavakavari. Ma ivonavona bo,
12 “E, vonavaghata da
kadara, nuwagiura ma rewapana
na ita God rapenai.
Kana vava irakata.
Vokavakavara, vikiikiiwa ma vigheghena tavere nonowei.
Amen.”
13 Ma nani magumagurisi kamosiyai sago ivi tarakiiyaneku bo, “Weni damsi gara poipoisi ivi kote na iyavo ma mimei ivi piyana?”
14 Avonapotei bo, “Bada, ke atakovi ma tuna na tam kuakovi.”*Dan 12:1; Mat 24:21; Mak 13:19
Ma ivoneku bo, “Weni damsi na mara berona, vitupaketowana ma vikayotirana kamonai imiirikikina da ku damona na kii gara na Sipu Gegeyina taranai ikowa da ipoini. 15 Tuna kubiine na,
‘Kii gawara na God ina vikiivavo gawarina maghinonai
da mariyai ma didibarai evovokavakavari ina taparoro numana kamonai.
Ma God rogunai ina makai da ina koyagha bubunisi,
16 da vitonara ke meyani ina kara tovonisi,
ma kaiyosi ke meyani ina kanakana tovona.
Ma bade madegha puna muyana ke ina karagavovorisi,*Isa 49:10
17 iyamna kii koyakoyagha na Sipu Gegeyina, tuna vikiivavo gawarinai imakamakai.
Tuna ini nowesi da ku okowa yawayawana meni dobunai evusivusira nake.
Ma matadogasi kudubina na God ina kiipupunatawei.’ ”*Psa 23:1; Ezek 34:23; Psa 23:2; Isa 49:10, 25:8