3 Yowane
Yowane yona leta hehaiyonana
Buka ta hededehemasalahana
Leta ta taukulina meta Yowane, iya apostolo yo Yesu yona hekahekatao wa hesau. Huyakulina nuwana gonogonowana doha yona leta bagubagunana yo helabuina wa, bolimai 85 yo 95 ad luwadiyena.
Teina leta ta unai Yowane ekalesiya tamowaina hesau hesana Gaiyasi ye lautokiyei, matawuwuna taulauguguya hekadiyo ye yogaisinidi na ye saguidi yodi kadau udiyedi. Na kabo ye hededehebayao kabitaumana laulauna ta unai.
Hinage Yowane ekalesiya badana hesau hesana Diyotelepesi yona laulau yababadi ye hededehemasalahadi (lausoisoi 9-10).
Tamowai hesau hinage ye katai ede Dimitiliyasi (lausoisoi 12), iya ye hededehemasalaha ede iya ekalesiya namwanamwana. Nuwana iya tauwasaduwai hesau (lausoisoi 5-8) yo iya leta ta taubaheina.
Buka ta hedehededena lakilakidi
• Lautoki 1-4
• Taba taulauguguya ta saguidi 5-12
• Hedehedede gehegehedi 13-15
1
Lautoki
1 Leta ta tauwoyawoya ye kuli ye lau Gaiyasi unai, kowa ede yogu gadosisi mamohoina tamowaina.
2 Kagu kaha, ya tapwalolo meta kabo yom kamna se namwa yo ginauli maudoidi se dudulai kalimyena, gonogonowana doha yaluwam unai ku namwanamwa.
3 Ya gwauyalakalili huyana kada kahao hekadi se laoma na yogu se hedehedede meta hedehedede mamohoina unai ku tolobayao yo huya maudoina ede unai ku miyamiya. 4 Yogu gwauyala saesaekalilina ede wasa ya lapui meta natuguwao hedehedede mamohoina se miyamiyawatani.
Taba taulauguguya ta saguidi
5 Kagu kaha, huya maudoina yom paisowa unai ku miyakesegai na ekalesiya ku sagusaguidi, na siya meta laolaoma nige kabidi ku kata. 6 Dubu unai yom gadosisi se hedehededei. Ya kaibwadaigo taba kada kahao ta yodi kadau unai ku saguidi na se lau, na yom kabikabidi ne taba Yaubada ye launamwanamwaei. 7 Yodi kadau ne meta Keliso wasana debanaena se kadauyei, na nige sagu hesau se hai nige taukawamamohoi wa udiyedi. 8 Unai ye dudulai mo taba ta yogaisinidi yoda numaena. Kabikabi ta unai kabo yoda teha ta ginauli yodi paisowa unai na ta paisowagogoi hedehedede mamohoina wasaduwaiyeina unai.
9 Leta kubwakubwana ya kuli ye lau dubu udiyedi, na Diyotelepesi, iya ye henuwa bena yodi tauwoyawoya, meta nige ye henuwa ye lapulau yogu hedehedede wa unai. 10 Ena ya laowa kabo ginauli saha ye ginaginaulidi ne ya hededehemasalahadi, meta ye monumonunu yo ye hededeheyaheyababagai. Nige tenem se bom mo, na kada kahao yodi kadauyena nige ye henuwa ye hailobaidi yo hinage kaiteyadi se henuwa bena se saguidi meta ye hekaiyawasidi na dubu wa unai ye hepesadi.
11 Kagu kaha, tabu laulau yabayababadi ne ku laulauwatanidi, na laulau namwanamwadi mo ku laulauwatanidi. Ena tamowai hesau yona laulau se namwa, meta iya Yaubada natuna. Na kaiteya tamowai yababa ye ginaginauli, meta iya nige Yaubada kabina ye kata.
12 Dimitiliyasi** Dimitiliyasi iya kana kao nige kabina ta kata. Tausonoga hekadi se hedede iya leta ta taubaheina, na hekadi se wane iya tamowai hesau Yowane ye henuwa bena Gaiyasi iya kabina ye kata. meta ekalesiya bodana maudoidi se hedede iya tamowai namwanamwana. Yona miyamiya se namwakalili, kaniyona ede hedehedede mamohoina ye miyamiyawatani. Kai hinage iya ka kitahenamwa, yo kabimai ku kata meta ka hededemamohoi.
Hedehedede gehegehedi
13 Ginauli se bado bena yom ya hedehedede, na nige ya henuwa bena pepwa kulikulina ta unai. 14 Na yogu nuwatu ede nige huyalohaloha kabo ya kitago, kabo yoda labui ta hedehedede.
15 Nuwadaumwali ye laowa kalimyena! Kada kahao inai taumiya yodi lautoki se hetamalidiwa. Na kada kahao kesega kesega metai bena yoma lautoki ku moseidi.
**1:12: Dimitiliyasi iya kana kao nige kabina ta kata. Tausonoga hekadi se hedede iya leta ta taubaheina, na hekadi se wane iya tamowai hesau Yowane ye henuwa bena Gaiyasi iya kabina ye kata.