4
Yesu yona laukita
(Mataiyo 4:1-11, Maleko 1:12-13)
1 Yesu Yaluwa Tabuna ye hemwayau, na Yolidani sagasagana ye laugabaei na Yaluwa Tabuna iya ye woyalaei balabalagaibuyena. 2 Na temenai mayadai 40 luwadiyena diyabolo Yesu ye laukita. Mayadaidi ne udiyedi meta nige saha hesau ye kai, na mulina ne unai ye hasali.
3 Na diyabolo ye hededelau Yesu unai ye wane, “Ena kowa Yaubada Natuna, ku hededelau weku ta unai bena ye hemala pwalawa.”
4 Na Yesu ye hededebui ye wane, “Buka tabuna unai se kuliyako meta tamowai nige gonowana pwalawa mo unai ye maumauli.”
5 Na kabo diyabolo Yesu ye woyasaei kuduli hesau unai na mahana kubwakubwa unai tanoubu ta yona basileiya maudoidi ye hekita. 6 Na ye hededelau unai ye wane, “Yau kabo wasawasa gigibwalina yo didigana ya lediwa kalimyena na basileiya maudoidi ta ku kitahetetedi. Matawuwuna ginauli maudoidi ta Yaubada ye ledimako yau yogu, na gonowana ya mosegabaedi yogu kaisunuwa tamowaina unai. 7 Ena ku tabaꞌohu kaliguwai, kabo ginauli maudoidi ta kowa yom.”
8 Yesu ye hededebui ye wane, “Buka tabuna unai se kuliyako meta, ‘Guiyau yom Yaubada ye bom mo ku hekasisiyei, yo iya ye bom mo unai ku tabaꞌohu.’ ” **Guiyau … ku hekasisiyei, yo … unai ku tabaꞌohu: Luka kalina Giliki unai ye kuli, na kalinadiyena hedehedede hekasisiyeikaniyona bagubagunana meta tulibono, iya ede hekasisi kabikabina. Yo yoda hedehedede tabaꞌohu meta hedehededena kalina Giliki unai kaniyona mamohoina. Dimdimyena se kuli, “serve”, na ena hedehedede ta Yaubada unai ta hepaisowa, kabo kaniyona lakilakina ede tabaꞌohu.
9 Na kabo diyabolo Yesu ye woyalaei Yelusalema. Na Numa Tabuna isuna saesaekalilina unai ye hetolo na ye hededelau unai ye wane, “Ena kowa Yaubada Natuna, kabo inai ku kamposidobi. 10 Matawuwuna Buka Tabuna unai se kuli se wane,
‘Yaubada kabo ye hededelau yona anelu udiyedi
na se kitahetetego.
11 Kabo nimadiyena se kabisinigo,
na nige gonowana kaem ku koiyedi weku udiyedi.’ ” (Same 91:11-12)
12 Na Yesu ye hededebui ye wane, “Buka Tabuna ye wane, ‘Tabu Guiyau yom Yaubada ku lautonogi.’ ” (Dutelonomi 6:16)
13 Diyabolo laukita maudoidi ta ye hegehedi ede Yesu ye laugabaei na huya namwanamwana hesau ye nayanayai.
Yesu yona paisowa ye hetubu Galili unai
(Mataiyo 4:12-17, Maleko 1:14-15)
14 Yaluwa Tabuna yona gigibwali Yesu ye hemwayau na ye uyo Galili. Na Yesu wasana magai maudoina wa ye hetakikili. 15 Na ye lau yodi sunago udiyedi ye lauhekata na boda maudoina iya se hededetausaei.
Nasaleta unai Yesu se subu
(Mataiyo 13:53-58, Maleko 6:1-6)
16 Yesu ye lau yona kabatubusae magaina Nasaleta na yona kabikabi unai Sabatiyena ye lusae sunago unai na ye tolo bena Buka Tabuna ye hasili. 17 Na peloweta Aisaiya yona buka**Peloweta Aisaiya yona buka, iya ede pepwa lohalohana se nokunoku, nige doha huya ta bukadiyao. se mosei na ye soke ede kulikuli ta ye lobai:
18 “Guiyau yaluwana, iya ede yau kaliguyena,
matawuwuna iya [ye kaisunuwaigau yo] ye heyausigau
bena wasa namwanamwana ya hededehemasalaha taudehadeha udiyedi.
Ye hetamaligau bena yailihai hedehededena ya hedehededei kaukau tamowaidiyao udiyedi,
yo taumatagibugibu yodi ya hedehedede meta matadi bena se lala,
yo tamowai se kabihenayaidi bena ya gilihaidi,
19 yo bena ya hededehemasalaha meta Guiyau yona katekamkamna bolimaina ede ye lageko.**Guiyau yona katekamkamna bolimaina, iya ede laugagayo unai Yaubada ye hedede wa, meta bolimai hehaligigi-labuidi (7th) udiyedi Isalaela tamowaidi kadi hagahaga maudoidi se boligabaedi (Dutelonomi 15:1-3) yo ena yodi hali Isalaela kadi hagahaga debadiwai se haidi se hemala yodi heyayai tauhaidi, kabo se kabigabaedi (Lewitikasi 25:39-55).” (Aisaiya 61:1-2)
20 Yesu buka wa ye noku na ye moseꞌuyoi sunago taukitahetetena wa unai na ye tuli. Sunago wa unai tamowai maudoidi matadiyao meta se tolekesegaidi iya unai. 21 Na Yesu ye hededelau udiyedi ye wane, “Kulikuli ya hasili kwa lapui wa meta mayadai ta unai ye masalaha matamiuyena.”
22 Maudoidi wa iya se hededehenamwa yo yona hedehedede namwanamwadi wa udiyedi meta se siliyata yo se nokokalili na se henahenamaiꞌuyoidi se wane, “Iya Yosepa natuna o nige?”
23 Na Yesu ye hededelau udiyedi ye wane, “Ya nuwatui kabo hededesonoga kwa hedede kaliguwai kwa wane, ‘Doketa, ku henamwanamwaꞌuyoigo!’ Kabo hinage kwa hededelaoma laulau saha ya ginaulidi wasadi kwa lapuidi Kapelenauma unai wa, bena hinage ya ginaulidi teina yogu magai mamohoina ta unai.”
24 Na Yesu ye wane, “Ya hededemamohoi kalimiuyena: Peloweta yona magai mamohoina unai nige gonowana se hailobai. 25 Mamohoi, peloweta Eliya yona huya unai meta kwabukwabuli se badokalili Isalaela unai. Tenem huyana ne unai meta nige nabu ye talu bolimai haiyona yo tehana, na Isalaela maudoina hasalilakilaki se hekalo. 26 Na iyamo Yaubada nige Eliya ye hetamali ye lau Isalaela yodi kwabuli hesau unai, na ye lau dagela waihiuna hesau kwabukwabulina unai, iya teha Sidona magaina Salepata unai ye miyamiya. 27 Yo hinage peloweta Elisa yona huyaena meta Isalaela unai taulepelepela se bado, iyamo nige hesau ye henamwanamwa, na Naman iya teha Siliya tamowaina ye bom mo.”
28 Huyana sunago unai na tamowai maudoidi hedehedede wa se lapui meta se koipilikalili. 29 Se tolo ede Yesu magai wa unai se hepesa na se woyalae kuduli padipadina unai bena se gabadobiyei. 30 Na iya meta boda wa luwadiyena ye solahai ede ye laugabaeidi na ye lau.
Yesu yaluwa bikibikina ye hededehepesa
(Maleko 1:21-28)
31 Na kabo ye dobi Galili magaina hesau hesana Kapelenauma. Na Sabatiyena [ye lau sunago unai na] tamowai ye hekatadi. 32 Yona lauhekata wa unai meta se nokokalili, matawuwuna yona gigibwali unai ye hedehedede.
33 Sunago wa luwana ne unai meta tamowai hesau, yaluwa bikibikina iya ye luwui, na kalina lakilakina unai ye yogahi ye wane, 34 “Aiyoi! Saha ku henuwa kalimaiyena, Yesu Nasaleta tamowaina? Ku laoma bena ku heyababagai? Kabim ya kata kowa kaiteya: Kowa Tabuna, Yaubada unai ku laoma.”
35 Na Yesu ye hededebayao yaluwa bikibikina wa unai ye wane, “Ku mwanou na tamowai me ku pesagabaei!” Ede yaluwa bikibikina tamowai wa ye tuudobiyei boda wa luwadiyena na ye pesagabaei, na nige ye hekamkamna.
36 Tamowai maudoidi wa se noko na se bom yodi se hedehedede se wane, “Teina hedehedede ta kaniyona ede saha? Yona gigibwali yo yona bayao unai ye hededelau yaluwa bikibikidi udiyedi, ede se pesa.” 37 Na Yesu wasana meta magai maudoina wa ye tauhetakikili.
Kapelenauma unai Yesu boda ye henamwanamwadi
(Mataiyo 8:14-17, Maleko 1:29-34)
38 Yesu sunago wa ye laugabaei na ye lau Simona yona numa unai. Na Simona bwasiyana sinebada ye kasiyebwakalili, tauna meta se gwagwama. Na Yesu se kaibwadai bena ye henamwanamwa. 39 Ede ye lau kalinawai na ye dunedobi na ye hedede meta gwagwama wa ye pesagabaei, na kasiyebwa wa ye gehe. Na mahanana ne unai ye tolo ede ye haitalaidi.
40 Mahana wa ye dui na mulina ne unai tamowai maudoidi kehadiyao kasiyebwa udoiꞌudoi tauhaidi se woyaidima Yesu unai. Na Yesu nimana ye tolesaedi kesega kesega kewana ne unai na maudoidi wa ye henamwanamwadi. 41 Yo hinage tamowai se bado udiyedi yaluwa yabayababadi se pesapesa na se yogayogahi se wane, “Kowa Yaubada Natuna.” Na Yesu ye dilaidi na ye hededehekaiyawasidi tabu se hedehedede, matawuwuna kabina se kata iya meta Keliso.
42 Malatomtomyena Yesu magai wa ye laugabaei na ye lau balabala hesau unai. Na boda wa se hetubu se loyai. Huyana se lobai meta se hededelau unai bena tabu ye laulaugabaeidi. 43 Na Yesu ye hededelau udiyedi ye wane, “Taba hinage Yaubada yona basileiya wasana namwanamwana ta ya lauguguyaei magai hekadi udiyedi, matawuwuna Yaubada ye hetamaligau ne kaniyona ede.” 44 Ede Galili ye laugabae na ye lau Yudeya unai yodi sunago udiyedi ye lauguguyatakikili.
**4:8: Guiyau … ku hekasisiyei, yo … unai ku tabaꞌohu: Luka kalina Giliki unai ye kuli, na kalinadiyena hedehedede hekasisiyeikaniyona bagubagunana meta tulibono, iya ede hekasisi kabikabina. Yo yoda hedehedede tabaꞌohu meta hedehededena kalina Giliki unai kaniyona mamohoina. Dimdimyena se kuli, “serve”, na ena hedehedede ta Yaubada unai ta hepaisowa, kabo kaniyona lakilakina ede tabaꞌohu.
**4:17: Peloweta Aisaiya yona buka, iya ede pepwa lohalohana se nokunoku, nige doha huya ta bukadiyao.
**4:19: Guiyau yona katekamkamna bolimaina, iya ede laugagayo unai Yaubada ye hedede wa, meta bolimai hehaligigi-labuidi (7th) udiyedi Isalaela tamowaidi kadi hagahaga maudoidi se boligabaedi (Dutelonomi 15:1-3) yo ena yodi hali Isalaela kadi hagahaga debadiwai se haidi se hemala yodi heyayai tauhaidi, kabo se kabigabaedi (Lewitikasi 25:39-55).