4
Abelahama yona sunuma debanaena Yaubada ye kitahedudulai
1 Kita Dius kada mumuga Abelahama sola ta nuwatui, ginauli saha ye lobai teina hekasa ta unai? 2 Ena taba mamohoina meta Abelahama saha ye ginaulidi wa debadiyena ede ye dudulai, kabo iya gonowana ye hededesaesae. Iyamo Yaubada matanaena meta nige gonowana. 3 Na kulikuli tabuna wa saha ye kulihemasalaha? Ye wane,
“Abelahama Yaubada ye kawamamohoiyei, na debanaena ede Yaubada ye hedede meta ye dudulai.” (Genese 15:6)
4 Tamowai ye paisowa na saha ye ginauli ne maisana se mosei meta nige yona kainauya, na yona paisowa ne maisana. 5 Na tamowai nige ye paisowa na yona sunuma ye tole Yaubada unai, yona sunuma ne debanaena ede Yaubada ye hedede meta ye dudulai. Kaniyona ede Yaubada iya yababa tauginaginaulidi tautolehedudulaidi.
6 Na Dawida hinage nuwanuwatu kesekesegana ta unai ye hedehedede meta kaiteyadi Yaubada ye tolehedudulaidi [yona kabinamwa unai na] nige bena yodi paisowa debadiyena, siya gonowana se gwauyala. Ede ye wane,
7 “Kaiteyadi laugagayo se utusi na yodi baꞌaya wa Yaubada ye nuwatugabaeidi,
yo yodi yababa taba nige ye nuwatuꞌuyoidi,
meta gonowana se gwauyala.
8 Na kaiteyadi Guiyau nige ye hegiludi yodi yababa debadiyena,
meta gonowana se gwauyala.” (Same 32:1-2)
9 Kabagwauyala ta, iya bena pelitome tauhaina mo yodi, o hinage nige pelitome tauhaina yodi? Ta hededeyako meta Abelahama yona sunuma debanaena ede Yaubada tolehedudulai ye mosei kalinawai. 10 Huya saha unai na tolehedudulai ye mosei kalinawai? Huyana pelitome ye haiyako wa unai o sola nige ye hai na unai? Nige bena ye haiyako ne unai, na sola nige ye hai wa unai na ye mosei kalinawai. 11 Huyana sola nige pelitome ye hai na Yaubada ye tolehedudulaiyako yona sunuma debanaena, na muliyena kabo pelitome ye hai ye hemala tolehedudulai ne hekihekinoina yo dedelina. Unai ede tausunuma maudoidi siya nige pelitome tauhaina meta tamadi ede iya, na bena Yaubada kabo tolehedudulai ye mosei kalidiyena. 12 Yo iya hinage pelitome tauhaina tamadi, na nige bena pelitome ne ye bom debanaena, na siya kaiteyadi tamada Abelahama huyana sola nige ye pelitome na yona sunuma kabikabina wa se miyawatani ne, meta siya tamadi.
13 Abelahama yo kana isimulitao Yaubada ye hededehesunumadi meta iya kabo tanoubu maudoina ye hai,** Abelahama … kabo tanoubu maudoina ye hai: Paulo yona hedehedede ta yona kabalaoma meta Genese 22:17-18, ye wane, “tanoubu kabo siya yodi”. Yaubada yona hededehesunuma hekadiyo ede ye wane kabo Abelahama unai tamowai maudoidi hededehenamwa se lobai (Genese 12:2-3), yo Isalaela tanona kabo siya yodi (Genese 12:7 yo 17:8), yo kana isimulitao kabo se badokalili doha kipwala yo nagali (Genese 15), yo Abelahama kabo boda se bado tamadi (Genese 17:4-6), yo kana isimulitao kabo se hemala basileiya lakilakina yo bayabayaona (Genese 18:18). iyamo nige bena laugagayo yona miyawatanina debanaena. Na yona sunuma debanaena ede Yaubada ye tolehedudulai na hededehesunuma wa ye mosei. 14 Ena taba laugagayo taumiyawatanidi ne siya hededehesunuma ne tauhaina, meta kabo sunuma ne nige yona namwanamwa hesau, na hededehesunuma wa nige kaniyona hesau. 15 Matawuwuna laugagayo meta hekilaino mo ye haiyama, [kaniyona ede nige gonowana ta miyawataninamwanamwaei]. Na haedi nige laugagayo meta menai nige laugagayo utuꞌutusina hesau.
16 Unai Abelahama hededehesunumana ne meta sunuma debanaena ye hai, kaniyona ede bena Yaubada yona kabinamwa unai ye hai. Hededehesunumana ne kabo ye masalahalau Abelahama natunao maudoidi udiyedi, nige bena siya kaiteyadi laugagayo loguloguna unai taumiya se bom, na ye lau hinage siya kaiteyadi Abelahama yona sunuma tauhemuliwatanina ne kalidiyena. Iya meta maudoida tamada. 17 Doha Yaubada yona hedehedede wa se kuliyako,
“Ya kaisunuwaigo kowa tamowai gwaudi tamadi, siya teha udoiꞌudoi tamowaidiyao.” (Genese 17:5).
Abelahama yona sunuma ye tole Yaubada unai na Yaubada matanaena ye hemala tamada. Yaubadana ne, iya ede tauboiboita tauhetoloꞌuyoidi yo ginauli saha sola nige se masalaha meta ye hetaladi doha se tubuko ne.
18 Abelahama yona nuwanuwatu meta iya kana siga ede, iyamo yona midi maudoina ye tole Yaubada unai, na debanaena ede ye hemala tamowai gwaudi tamadi. Iya ede doha Yaubada yona hedehedede kalinawai wa, ye wane,
“Kam isimulitao badodi kabo doha kipwala.” (Genese 15:5)
19 Abelahama yona bolimai meta handele kesega (100) ye hanahanawui na yona nuwanuwatu meta ye tautaubadakaliliko nige gonowana natunao. Yo Sala meta ye sinesinebadako nige gonowana ye labalaba. Iyamo yona sunuma Yaubada unai nige ye basabasa. 20 Nige ye nuwalabulabui Yaubada yona hededehesunuma ne udiyedi. Yona sunuma wa Yaubada ye hebayao ye lau na Yaubada ye hededetausaei. 21 Abelahama nuwana ye bayao meta Yaubada yona gigibwali gonowana yona hededehesunuma wa kabo ye ginauli. 22 Teina sunuma ta debanaena ede “Yaubada ye hedede meta ye dudulai.” 23 Teina hedehedede ta meta nige Abelahama ye bom kana hedehedede, na se kulidobiyei bena 24 hinage kita kada hedehedede. Yaubada kabo ye hedede meta kita ta dudulai matawuwuna yoda sunuma ta tole iya unai, iya ede yoda Guiyau Yesu boita unai ye hetoloꞌuyoi. 25 Yaubada Yesu ye talamgabaei na ye boita yoda yababa hesabadi, na ye hetoloꞌuyoi tolehedudulaida hesabana.
**4:13: Abelahama … kabo tanoubu maudoina ye hai: Paulo yona hedehedede ta yona kabalaoma meta Genese 22:17-18, ye wane, “tanoubu kabo siya yodi”. Yaubada yona hededehesunuma hekadiyo ede ye wane kabo Abelahama unai tamowai maudoidi hededehenamwa se lobai (Genese 12:2-3), yo Isalaela tanona kabo siya yodi (Genese 12:7 yo 17:8), yo kana isimulitao kabo se badokalili doha kipwala yo nagali (Genese 15), yo Abelahama kabo boda se bado tamadi (Genese 17:4-6), yo kana isimulitao kabo se hemala basileiya lakilakina yo bayabayaona (Genese 18:18).