9
Yaubada yona tamowai ye kaisunuwaidi
1 Keliso matanaena ya hededemamohoi, na Yaluwa Tabuna nuwagu ta unai ye hemamohoiyei meta nige ya laulupolupo: 2 Yogu tamowai ne hesabadi na nuwagu ta ye yababakalili yo ya nuwanuwatukalili. 3 Ya henuwakalili bena kehaguwao Dius tamowaidi taba gilihai se lobai. Ena taba gonowana unai sagu se lobai, meta ye namwa mo taba hesabadi na Yaubada ye kawagulaiyeigau yo Keliso unai ye boligabaeigau. Iyamo nige gonowana.
4 Siya meta Isalaela tamowaidi. Yaubada ye hegigibasiyeidi. Yona didiga ye hemasalaha udiyedi. Yona talam ye ginaulidi kalidiyena yo laugagayo yo Numa Tabuna unai tabaꞌohuina kabikabina yo yona hededehesunuma ye moseidi. 5 Abelahama, Isako, yo Yakobo meta siya kadi mumugao, na kalidiyena meta Keliso hinage buluma unai ye tubuma, iya ede Yaubada na ginauli maudoidi kadi tanuwaga. Hedebasae ye sae kalinaena nige kana siga. Mamohoi.
6 Nige gonowana ta hedede meta Yaubada yona hededehesunuma kalidiyena wa ye kabihebekudi, matawuwuna Isalaela kana isimulitao ne meta nige maudoidi siya Isalaela tamowaidiyao mamohoidi. 7 Yo hinage Abelahama kana isimulitao ne meta nige maudoidi iya natunao mamohoidi. Doha kulikuli tabuna unai se kuliyako,
“Kam isimulitao mamohoidi kabo Isako unai se tubuma.” (Genese 21:12)
8 Hedehedede ta kaniyona ede Abelahama natunao bulumaena se tubuma wa meta nige maudoidi Yaubada natunao, na yona hededehesunuma wawayadiyao Yaubada ye kataidi siya Abelahama kana isimulitao. 9 Kaniyona ede hededehesunuma wa ye wane,
“Bolimai hesauna kabo Sala natuna loheya ye labasi.” (Genese 18:10,14)
10 Nige Sala ye bom mo [Yaubada yona hededehesunuma debanaena na natuna ye labasi], na Lebeka hinage. Natunao godegode tamadi meta tamada Isako. 11-13 (11a) Huyana sola nige godegode wa ye labasidi o ginauli namwanamwana o yababana hesau se ginauli meta (12) Yaubada wasa ye mosei Lebeka unai ye wane, “Natum taubaguna kabo kana taumulita yona heyayai tauhaina.” (Genese 25:23) (13) Doha ede se kuliyako, “Yakobo ya gadosisiyei, na Iso ya subu.” (Malakai 1:2-3) (11b) Teina unai Yaubada yona kaisunuwa wa unai yona nuwatu ye hemamohoiyei, doha ye wane, Yaubada tamowai ye kaisunuwaidi meta nige tamowai yodi paisowa debadiyena, na iya ye bom yona nuwatu unai.
14 Unai kabo saha ta hedede? Bena Yaubada yona kaisunuwa ne nige se dudulai? Nige! Se dudulai! 15 Matawuwuna ye hededelau Mose unai ye wane,
“Kaiteya yogu katekamkamna unai meta iya kabo ya katekamkamnaei,
yo kaiteya yogu sagu unai, iya kabo ya sagusagui.” (Esodo 33:19)
16 Unai Yaubada yona kaisunuwa meta nige tamowai yodi henuhenuwa yo yodi kaikaipate debadiyena na iya ye bom yona katekamkamna debanaena. 17 Doha kulikuli tabuna unai Yaubada ye hededelau Palao unai ye wane,
“Ya hetologo Aikupito yodi wasawasa, kaniyona ede bena kowa kalimwai yogu gigibwali ya hemasalaha na hesagu se hewasa tanoubu maudoina unai.” (Esodo 9:16)
18 Unai, Yaubada kaiteya ye henuwa meta iya ye katekamkamnaei, na yona hekasa unai tamowai hekadi nuwadi ye hekwailolodi.
Yaubada iya tauhekasa
19 Nuwana kabo ku henamaiyeigau ku wane, “Unai kabo idohagi to Yaubada sola ye hegiluda? Nige gonowana hesau Yaubada yona nuwatu ye gudui!” 20 Na bena kowa kaiteya to ku kawabui Yaubada unai? “Gonowana ginauli hesau ye hededelau tauginaulina wa unai ye wane, ‘Idohagi to doha teina ku ginauligau?’ ” (Aisaiya 29:16) 21 Gulewa tauginaulina yona dudulai meta gonowana bwatano gwauna kesega unai gulewa udoiꞌudoi ye ginaulidi, hekadi paisowa namwanamwadi hesabadi na hekadi mosomoso kabaꞌusaꞌusa. 22 Gonogonowana doha, Yaubada yona dudulai ede bena yona kouyalayala yo yona gigibwali ye hemasalahadi. Tamowai hekadi Yaubada ye kouyalayalaidi na se laulau kadi heyababa hesabana. Iyamo ye nayatautaubigakalili kalidiyena. 23 Hinage ye henuwakalili bena yona didiga saesaena ye hemasalaha, na yona didiga kabakitalobaina ede yona katekamkamna tamowai udiyedi, siya ede ye kabinonohaidi yona didiga hesabana. 24 Kita hinage Yaubada yona yoga tamowaidiyao ne luwadiyena, nige bena Dius se bom mo, na Dagela tamowaidi hinage. 25 Doha Hoseya yona kulikuli unai Yaubada ye hededeyako ye wane,
“Kaiteyadi siya nige yogu tamowai kabo ya kataidi ede yogu tamowai,
yo tamowai nige ya gadosisiyeidi wa meta kabo ya gadosisiyeidi.” (Hoseya 2:23)
26 Hinage ye wane,
“Beyabeyana Yaubada ye hededelau udiyedi ye wane,
‘Komiu nige yogu tamowai!’,
iyamo kabakulihemasalaha kesekesegana ne unai kabo se kataidi
siya Yaubada maumaulina natunao.” (Hoseya 1:10)
27 Aisaiya kalinana lakilakina unai na Isalaela hedehedededi ye hedehedede ye wane,
“Bwagana Isalaela tamowaidi se badokalili doha salagomgom nagalina,
iyamo hisahisadi mo Yaubada kabo ye gilihaidi.
28 Matawuwuna Guiyau kabo tanoubu ta tamowaidi ye hekilainodi
ma sagenana yo nige hededebuibuina hesau.” (Aisaiya 10:22-23)
29 Ede doha Aisaiya ye hededeyako wa ye wane,
“Ena taba Guiyau Gigibwali Saesaekalilina kada isimulitao tamowaidiyao hekadi nige ye kabitoledi
meta kita kabo gonogonowana doha magai Sodoma yo Gomola.” (Aisaiya 1:9)
Tolehedudulai tauhaina
30 Unai kabo saha ta hedede? Dagela tamowaidi siya nige se modekalili bena taba laulau dudulaidi se miyawatanidi, iyamo yodi sunuma debanaena ede Yaubada ye tolehedudulaidi iya kalinawai. 31 Na Isalaela tamowaidi siya laugagayo ne se kaipate bena se miyawatawatani, iyamo tolehedudulai ne meta nige se hai. 32 Idohagi to nige se hai? Matawuwuna ede nige yodi sunuma unai na tolehedudulai se wasewasenei, na siya yodi laulau mo udiyedi se kaipate bena se hai. Ede kabakalabesibesi wekuna unai se kalabesibesi, 33 doha kulikuli tabuna unai ye wane,
“Kwa kita ne, Saiyona unai weku hesau ya tole
iya tamowai tauhekalabesibesidi
yo iya kabo tamowai ye kosohebekudi.
Iyamo kaiteya iya ye sunumaei meta taba nige ye hemwadine.” (Aisaiya 8:14 yo 28:16)