18
Babilon ákte sák má!
1 Má namur iau mákái kesi angelo bul a sosih tilami bát. Angelo erei a mon i kán rakrakai a pakta, má talas a kauli má a atalsai naul bim. 2 Ais 13:21, 34:11-14; Ier 50:39; Apa 14:8Má angelo erei a bin mai lala kaungán mák parai ngoromin,
“Ákte pur! Ákte pur má!
Babilon er a tuan rakrakai ákte mosrah no!
Onin ákte nián kis má káián tan sápkin tanián,
má tan sápkin tanián dikte longoi kándi tan rum on.
Tan wokwok dikte páhiuh on,
má tan kosor dik lu ser namnam iatung on.
3 Kán tan sápkin a long sáksáknai tan mát no on á naul bim.
Ákte tari kán suir wain án araturán sáksák si di
má dik ngin on.
Tan kabisit tili naul bim
dikte lu bop tiklik mai,
má tan tám sirsira on á naul matmatngan pokon
ding konom mai tan táit a sák er a gong kári á wák er.”
4 Ais 48:20; Ier 50:8, 51:6, 45; 2Ko 6:17Má namur iau longrai kaungán kes sang tilami bát má a parai ngo,
“U, kak matananu, gama aptur alari bimán rum er
suri gama káp longoi tan sápkin tatalen ngorer a lu longoi ái,
má suri gama káp áslai rangrangas erei ái sang na áslai!
5 Tgk 18:20-21; Ier 51:9Kán tan sápkin tatalen ákte longoi,
wa tilik lala boh taladeng sang urami bát.
Mái Káláu kápate balantahni kán tan sápkin, kápte.
Wa a hol páptai sang.
6 Sak 137:8; Ier 50:15, 29; 2Te 1:6Á gam erei gama long sáksákna Babilon,
gama kosoi tan sápkin ákte longoi uri narsán kak matananu.
Má gama paptauni kán arul nák pakta
uri supni suri tan táit er a sák ákte longoi.
Ákte toroi kinleh wain a rakai
má ák tari si gam.
Ki ngorer gama tar kalengnai mai kinleh wain a lala rakrakai singin
má nák ngin on.
7 Ais 47:7-9Ákte tubán apakta pasi sang
mákte lala gong kári sápkin tatalen.
Ki ngorer gama tari rangrangas má tinang bul singin
nák arwat mai lala boh sápkin er a longoi.
Wák er a balbal parai ami kán hol ngo,
‘Á iau á tasim sang á inái!
Kápte kesi táit a artálár suri na asáksáknai kak liu.
Káp ina te mokos, má káp ina tini sum!’
8 Apa 17:16Má kabin a parai ngorer i wák er,
ki i kesá bung sang,
ái Káláu, Konom Tám Rakrakai,
na nagogon on mai arabilbiling nák sák.
Na áslai toltolom sasam má taul matpám má tilik tinang,
má kámnah na málsi nák bam.”
9 Ese 26:17, 27:30-35Má tan kabisit tili naul bim, ái rung er dikte lu bop tiklik mai má dikte gong kári sápkin tiklik mai, da mákái sauh a kaptur tili kámnah er a konmi bimán rum á Babilon. Da mákái ngorer, ki erár da bálsa pasi bimán rum er má dák lu tangsi. 10 Da lu sámtur tili tepák kabin di matai ngo di mul da áslai rangrangas erei, má dák parai ngo,
“A tuan sák! A tuan sák taladeng!
U, tilik bimán rum á Babilon,
i án mudán pákánbung sár má, má ukte ekesi sák má!”
11 Ese 27:36Má tan tám sirsira di mul di lala tangsi má dik sum suri, a kabin ngo kápte kes alatung na huli kándi tan táit di lu sirai. Áá, kápte kes sang na huli 12 Ese 27:12-13, 22kándi gol má siliwa má tan hat a tuan malilis má a lala mátán. Má kápte kes na huli si di á tan lalain sepen sulu sang a kás má a mirik má matngan erei a tuan alal. Má kápdate huli mul i tan kubau a tuan lain tomtom má tan táit di longoi mai mátán kelel má aen má hat. 13 Má kápte kes mul alatung na huli tan kabang má wel má bultán kubau a tuan lain tomtom má tan táit uri akuluknai namnam. Má kápte kes na huli tan lain namnam ngorer i suir wain ngo wel tili lowo ngo palawa má wit. Má kápdate huli tan bulumakau má sipsip má hos má tan karis mul. Má kápte kes na huli si di á kálámul uri kán toptop. Tan tám sirsira di lu sirai tan táit erei tungu, ái sár onin kápte kesi kálámul na lu huhul mul si di.
14 Má tan tám sirsira da parai singin wák er ngoromin, “Tan lalain táit er u kon suri, ákte bokoh má! U ngoi ngo una tasim sang, má na marán i kam táit má kam mermer na tuan alal, ái sár ákte rah má, má káp una te lu mákái mul.”
15 Ese 27:31, 36Má tan tám sirsira tungu di lu huhul má dik lu sirsira iatung i bimán rum er má ding konom, da lu sámtur til tepák kabin di matai ngo di mul da áslai rangrangas erei. Da lu tangsi má dák lu sum suri 16 Apa 17:4má da lu parai ngo, “A tuan sák! A tuan sák taladeng uri tilik bimán rum erei! Tungu a lu oboi tan lalain sepen sulu sang a kás má a mirik má matngan erei a tuan alal, mák lu mermer mai tan táit a gol má tan lain hat a lala mátán má mai mátán kelel! 17 Ais 23:14; Ese 27:27-29Má onin, i án mudán pákánbung sár, ákte bokoh no á kam tan minsik!”
Má tan tám ololoh i mon mái rung di lu him on má tan asir di kis i mon mul má di no di lu him mai tan táit a rut tangrai lontas, di sámtur til tepák 18 Ese 27:32má di mákái sauh a kaptur tili kámnah er a konmi bimán rum erei, má dik lu binbin ngoromin, “Kápte kesá bimán rum a pakta i ngisán sorliwi tilik bimán rum erei!” 19 Má dik lu mákái táit erei mák tinang i bál di má dik tang, má dik lu raut pasi rah tiladi bim má dik sáprai ami lul di, má dik lu parai ngo, “A tuan sák! A tuan sák taladeng uri bimán rum minái! Ái á bimán rum di lu han ur ái ái rung di lu him mai tan táit a rut tangrai lontas, má dik lu kipi marán táit uratung suri sirai, pasi ding konom mai! Má onin, i án mudán pákánbung sár, ákte mosrah má mai kán tan minsik no!”
20 Nag 32:43; Ais 44:23; Ier 51:48Mái koner kán tu worwor a sopasun kán wor mák parai ngo, “Á gam gam lu kis imi naul bát, gama laes kabin Babilon ákte sák! Á gam tan tám ruruna má gam tan apostolo má gam tan tám worwor tus, gama laes kabin ái Káláu ákte oboi nagogon ur on suri na sák! Ngorer á kán arul suri kosoi sápkin a longoi uri narsá gam.”
21 Ier 51:63-64; Ese 26:21Má namur kesi angelo a tikai mingin a long pasi kesi tilik lala hat mák durki mák buswai uradi lontas, má a parai ngo,
“Ngoromin iau longoi mai hat minái, na ngorer uri iáu á bimán rum á Babilon. Da amosrah i iáu unák sák má, má káp una te aptur mul, una ekesi bokoh má! 22 Ais 24:8; Ese 26:13Tungu di lu longrai kaungán gita má tulal má dik lu husi taur, má matananu dik lu saksak iatung i katbán i iáu, Babilon. Ái sár ákte rah má! Kápte te lain kaungán saksak da longrai mul i iáu! Tungu marán á tám him di lu him i katbán i iáu er di longoi tan lain táit má kip talmi balbal. Ái sár ákte rah má! Kápte te him da longoi mul i iáu, Babilon! 23 Ier 7:34, 16:9, 25:10Una tu pokon mau sár. Kápte te lam da oskoi mul i iáu, má kaungán rung di han suri kila má dik mil má dik laes, ái na bokoh tili iáu ekes pala! Ái rung di lu huhul má di lu sirsira i iáu tungu, di tan kálámul pakta sang singin tan kálámul no on á naul bim, má iáu ukte agur pasi tan mát no mai kam iniat má ngorer uk lam di uri sápkin! 24 Ier 51:49; Apa 17:6Má iatung i iáu, dárán á tan tám ruruna má tan tám worwor tus ákte sal turán dár di mul ái rung dikte up bing di on á naul bim!”
18:2: Ais 13:21, 34:11-14; Ier 50:39; Apa 14:8
18:4: Ais 48:20; Ier 50:8, 51:6, 45; 2Ko 6:17
18:5: Tgk 18:20-21; Ier 51:9
18:6: Sak 137:8; Ier 50:15, 29; 2Te 1:6
18:7: Ais 47:7-9
18:8: Apa 17:16
18:9: Ese 26:17, 27:30-35
18:11: Ese 27:36
18:12: Ese 27:12-13, 22
18:15: Ese 27:31, 36
18:16: Apa 17:4
18:17: Ais 23:14; Ese 27:27-29
18:18: Ese 27:32
18:20: Nag 32:43; Ais 44:23; Ier 51:48
18:21: Ier 51:63-64; Ese 26:21
18:22: Ais 24:8; Ese 26:13
18:23: Ier 7:34, 16:9, 25:10
18:24: Ier 51:49; Apa 17:6