Xoiteupo Kuna Pl 2

Sini kireni xosikikemu purinuku asinaku kapia kireu apimi xosa kakepu

1 Kristusue tinipo xotikikemu sokisokirounare? Nue tini xiri xouwetikirouna xati paie kakati tinipo xotikikemu yoro purinare? Tini Xoiteupo Supo Youyapu ekeoma minika xosa purinukure? Tini kireu apimi xosa xotikisua xati xotikisuarei xotikienikirounukure? 2 Panumu xatia, paina tini asinaku asinaku kapia kakari, yeu nimariri paie xiri koxepina. Tini xokupae kireni nanunanuni kutu tinari kireu apimi xotikiewopi kapia kireni taiwa. Kakinari kireni xotikikemuni kutu pura. 3 Tini kakixanari takireni nanunanunari, takipo wenitiki xourorepi saina kireni taku. Xuwe. Tini takipo kapia ororinari, kireu apimi nikau kapiae sinipo kapia emeserinaxi nanuwa. 4 Tini takipo xuru kireni yakuwaku. Xuwe. Tini kireni kirenie takipo kireu xuiapu nikau xuru yakunari tianikari ati puropineri.

Kristusue nukou wenumu ororati, Xoiteue nu xouroretai

5 Kristusu Yesusu nukoe tipuroyai nanunanu sieni tini panumu nanunanuni kutu tipura. 6 Nu Xoiteuni kutu purotaina pana, nu Xoiteu sie puropure pa kapia soki tepure nanuwotaixe. Xuwe. 7 Nu pa kapia wetina nu aipu saina apu sie sayetai. Nu apu sie putauna, 8 apuni kutu purati apimie xekoteneai. Kakina nukoini nuko ororina Xoiteupo kuna taipa xouna xumotai yause xetai, iyo, kakipa xouna na nikitoto xosa xumotai. 9 Pa xotaparei sore Xoiteue Yesusu xourorina xiri xouroni kutu iyarati purina. Kakina Xoiteue kireu kireu weniniki emeserinikina kire wenumu xouroni kutu tuwotai. 10 Nue pa wenumu Yesusu tuwotai xati, xokupa sapie mena xouro puroto ouro puroto ou minika puroto woteneai sapi xeikae Yesusu xekero xonikitapa urukurouneri nu irue puropineri. 11 Kakati nini xokupae ipaki kunauneria, “Yesusu Kristusu nu Kokaipa,” xepineri. Pa kapiarei Xoiteu Emisiki kokaipa wenumu tuwopineri.

Sini memeremu sie xuiapu xopuro puropu

12 Paina, yeu xatai xura ye tinire xoi xumuna, tinie yeu kuna sipesi tairounuku xati, ximine rania panumu kaka. Ye tini xeika puritia pa yause xosa kireni kuna taiwaku. Xuwe. Ximine ye xetauro purinena, tini atinarini kutu kuna taiwa. Xoiteue tini xiyeri titiketai xati, muaiya tini urewoto ximiketeunari pa xotiki iwopure xetai sapini kutu takuaire sokisoki saina ta. 13 Siko sipa, Xoiteu nukoe tinipo xotikiro saina tirouna. Nukoini xouwewotai kapia tinie kakakuaire tinipo xotikikemu sarirouna.

14 Tini xokupa kapia kakinaria, tini peuni purinari kaka. Tini kakixanari xekepi kunaunari kuna tuwataxaku. 15-16 Tini Xoiteupo nonoe panumu kakinaria, tini ati purinari xoxixoxi kapia xuweu xu xuweu purakuai. Kakinari ekeoma tuku kuna soki tinaria, mua ouropu xuiapu xopu memeremu sie purakuai. Pa xuiapu kinie asinaku kapiani kutu wetineri xoxixoxi kapia kaketeneai. Pa xati Kristusue xiyeri kopina yause xosa yei tinipo kapiaure xiri nimaririwopine. Kakine sipauneia, yei tini xopu irereiyai saina paiya, ye aini kakepu xuwexi sipawopine.

17 Tinipo xotikisu paiya tini Xoiteu xouieunuku. Ye panumu sipaunei xisae xoniki irouneri sie yeu yawi xeika tinie Xoiteu xouikiriai kapia xeika kusaworia ye paire nimaririwopine. Ye tini xeika nimaririwopine. 18 Panumu sie tini rania nimaririwakuai. Tini ye xeika xiri nimaririwakuai.

Polue Pilipai Timoti xesawopure kunawotai

19 Kokaipa Yesusupo nanunanu xatia, tini xosa Timoti xesawopure xenenewopixe. Nue xiyeri kouna tinire kayatia, ye xiri xoi meruxepine. 20 Timoti sie apua kire yue ye xeika puratixana xuwe. Nu sipesi ye xeika lixina tini tianitikepure nanunanuna ime xirekirouna. 21 Xokupa kireu apimie nikou xurureni eiyo xineri, Yesusu Kristusupo saina pani tipa xowopi nini xiraxirouneri. 22 Pana Timotipo asinaku kapia tini sipa. Tini sipa, nonoe omo tianurouna sie nue asinaku kunapu saina tianiyeyai. 23 Pa xati ye xosai amu kapiarau yaraxepinana ye xayaka xayaka yakune siparineye, xurise tini xosa xesautia sapauni utopina. 24 Kokaipae ime taiyepinaxi xoisunena, iko rania xayaxayaka xurise kouneia xeketikepine.

Polue Epaprotitusi Pilipai xesawopure kunawotai

25 Tini xosa Epaprotitusi xesautia utopinaureni kutu ye nanune. Nu sikou xatasiki, nu pa xoma xosaupo saina emei nu liemei, nu takie xesawari ye tianiyepinaure koyai. 26 Nu tinire xiri eiyoxina xeketikepurexina. Nu supa tuku kuna tinie iyesari, paire nu siparina xoukemu tatauna. 27 Suwau, ekime xoia supa tina xiri xumopure xetai. Pana Xoiteue nure xousuawati ekemiri kusawetai. Xoiteue nure kireni xousuaxepu xuwe. Yeure rania xousuaxetai, pa amure, kokaipa xuni kutu ye xoroyepi xirarina kaketai. 28 Pa xati nu xiyeri xekerinari nimaririwakuaire, nu xesautia utopina. Kakineia iko rania ere xoikemu tatauwopuwatixe. 29 Pa xati tinie Kokaipapu wenumurei Epaprotitusi sowopure xiri nimaririwa. Tini panumu apimi xosa kokaipa weniniki tinika. 30 Nue Kristusupo saina tina xiri xumopurexetai. Nu nuko asinaku puropinaure nanuwotaixe. Xuwe. Ye tianiyepina saina takie tukiriai xosa kireni nanunanuna, kakina nupo supa sokau porouna pani saina tina.

2:3 2.3 Ro 12.10;Ka 5.26;Ep 5.21;Pl 1.15-16;Ye 3.14

2:4 2.4 1 Ko 10.24; 10.33; 13.5

2:5 2.5 Mt 11.29;Yo 13.15;1 Pi 2.21;1 Yo 2.6

2:6 2.6 Yo 1.1-2; 5.18; 10.33; 17.5;2 Ko 4.4;Kl 1.15;Ip 1.3

2:7 2.7 Yo 1.14;2 Ko 8.9;Ka 4.4;Ip 2.14; 2.17

2:8 2.8 Mt 26.39; 26.42;Yo 10.17-18;Ro 8.3;Ip 5.8; 12.2

2:9 2.9 Yo 17.1-5;YT 2.33;Ep 1.20-21;Ip 1.3-4

2:10 2.10 Mt 28.18;Ro 14.11;XKY 5.13

2:10 2.10-11 Ais 45.23

2:11 2.11 Yo 13.13;YT 2.36;Ro 10.9;1 Ko 8.6

2:12 2.12 Siri 2.11;Ep 6.5;Pl 1.5;1 Pi 1.17

2:13 2.13 Yo 15.5;1 Ko 12.6; 15.10;2 Ko 3.5;1 Ts 2.13;Ip 13.21

2:14 2.14 Ro 14.1;1 Ko 10.10;1 Pi 4.9

2:15-16 2.15-16 Tu 32.5;Ais 49.4;Tan 12.3;Mt 5.14-16; 5.45; 10.16;Ka 2.2;Ep 5.1; 5.8;Pl 1.10;1 Ts 2.19; 3.5;1 Pi 2.12

2:17 2.17 Ro 15.16;2 Ti 4.6

2:18 2.18 Pl 3.1; 4.4

2:21 2.21 1 Ko 10.24; 10.33; 13.5;2 Ti 4.10; 4.16

2:22 2.22 1 Ko 4.17;1 Ti 1.2;2 Ti 1.2

2:25 2.25 Pl 4.18

2:29 2.29 1 Ko 16.16-18;1 Ti 5.17

2:30 2.30 1 Ko 16.17;Pl 4.10