IOANE ḠENA TORETORE VAḠA-RUARUANA
2 Ioane vaḡa-foforina guruḡari
Ioane na mai fefa tu Barau na eḡabi-viriḡiato ekalesia vavinena ma natuna ḡeri etoreato, moḡa tu betaḡu rubu ta ma ekalesiari ekiraḡirini.
Mai fefa tu laḡani 85 ma 100 fakari nuḡanai ta Ioane na etoreato, mo tu Iesu maki emaseto murinai vau.
Mai fefa nuḡanai siri baregori tu siri 9 beiaḡo 11.
Ioane na mai fefa etoreato ḡena ura tu, 1) mo ekalesia Keriso ḡena vevaḡa-ribai beḡene ruḡatari-gigitari ema vanaḡivanaḡi moḡeri vevaḡa-riba guruḡari loriri ai beḡene raka; 2) ḡofaḡofa tarimari, dia Keriso Iaukana na eḡori-iaḡomarini tarimari, beḡene ḡitari, beḡe ḡofa-darererini garina; 3) mo ḡofaḡofa tarimari ḡeiaḡomani nai tu, asiḡina ḡinavaḡi beḡene ḡabi-raḡeri etorito.
Ioane na mai fefa tu maiḡesi eboioḡaiato:
1. Vevaḡa-riba moḡonina lorina na moḡo ema veuravini ai beḡene raka - siri 1-6
2. Veiḡa kerereri asi beḡene veiri - siri 7-13
1
Au, ekalesia ḡorikauna taugu, na mai fefa Barau na eḡabi-viriḡimito vavinemu ma natumu ḡesi atore-vinimini. Ḡomi tu nuḡagu mabarana ḡesi aura-vinimini, dia au na moḡo aura-vinimini, senaḡi guruḡa moḡonina ḡeribaiato tarimari mabarari na maki ḡomi ḡeura-vinimini. Korana guruḡa moḡonina ḡita nuḡarai etanuni ema ḡita ḡesi betanu-vanaḡi vanaḡini.
Tamara Barau ema Iesu Keriso, Tamara Natuna, ḡerina varevare-bara, vevetuḡaḡwa, ema maino ḡemi ai bene tanu, moḡoni ai e veuravini ai.
Guruḡa moḡonina ema veuravini
Au tu averere-baregoni, korana ḡoi natumu tari adoḡaririto guruḡa moḡoninai ḡetanuni nai, ḡita Tamara na ekirarato ilailanai. Vavine, maitoma ḡoi anoḡimuni tu, ḡita tata bisini veura-vevini. Dia taravatu variḡuna atore-vinimuni, senaḡi mo tu tovotovona na veḡata taḡabiato dagarana. Veuravini tu maiḡesi: Barau ḡena taravatu guruḡari ilailari ai bitana raka. Tovotovona na veḡata ḡoseḡaḡiato kavana, ḡia ḡena taravatu guruḡana tu veuravini ai boḡono raka.
Ḡofaḡofa tarimari tu ḡutuma tanobarai ḡerakao-rakaoni. Iesu Keriso tu tarimarimai eiaḡoto tu asi ḡevaḡa-moḡoniani e asi ḡekiraḡiani. Moḡesi tarimari tu ḡofaḡofa tarimari, ema Keriso ḡevetari-viniani tarimari. Moḡesina nai, lorimi boḡono vetore, ḡemi vekwaraḡi ai kara ḡoḡoitaḡorito dagarari ḡomi ḡemina beḡe veḡitani garina. Namona tu ḡomi voimi mabarana boḡono ḡabi-ḡosiri. Deikara na Keriso ḡena vevaḡa-riba guruḡari beraga-kwanerini, vevaḡa-riba tari beḡabi-raḡerini tarimana, ḡia ḡenai Barau asi etanuni. A deikara Keriso ḡena vevaḡa-riba guruḡari bekorana-iaḡirini tarimana tu, Tamana e Natuna tauri ruarua eḡabirito. 10  Bema tarima ta beiaḡosini, vevaḡa-riba guruḡari irauri bekiraḡirini tu, asi boḡono ḡabi-raḡea ḡemi numai, ema asi boḡono vaḡa-namoa maki. 11  Korana tu bevaḡa-namoani tarimana tu mo tarima ḡena vei-rakava beḡabiani, benamo ḡia maki vei-rakava tarimanai beiaḡoni.
Guruḡa magona
12  Au aurani guruḡa ḡutuma bara tore-vinimi, senaḡi asi aurani fefai bana toreri. Ḡegu ura tu bana iaḡosi ema ḡomi ḡesi bitana guruḡa-guruḡa, be ḡera verere bene barego-lelevaḡi.
13  Ḡoi tarikakamu vavinena, Barau na eḡabi-toreato vavinena, ḡia natuna na ḡeri vevaḡa-namo ḡetuḡuani ḡoi ḡemu.