8
Iesu tu ḡita ḡera Rubu Veaḡa verena baregona
1 Ḡai na kara ḡakiraḡiani tu maiḡa. Ḡita tu ma ḡera Rubu Veaḡa verena baregona. Ḡia tu gubai Iaru-korokoro Barauna ḡena terona aroribanai etanu-tarito. 2 Barau ḡena veaḡa gabuna nuḡanai eḡauveini. Mo tu farai rubuna korikori Vereḡauka na eragaiato, dia tarimarima na ḡeragaiato.
3 Rubu Veaḡa vereri baregori mabarari tu ḡevaḡa-ruḡarito, varevare dagarari ema boromakau, mamoe, manu beḡene vini ḡana. Moḡa lorinai mai Rubu Veaḡa verena baregona, Keriso, maki ma ḡena dagara tari, bene vini ḡana. 4 Bema ḡia tanobarai bere tanu tu, Rubu Veaḡa verenai asi bere iaḡo, korana tu maiḡa, Rubu Veaḡa vereri tu varau ḡetorerito maiḡeri, varevare dagarari ḡevini-tanuni, Iuda ḡeri taravatu ekiraḡiato ilailanai. 5 Ḡia varevare dagarari mainai veaḡa lelevaḡi daiḡutunai ḡevinini tu, gubai mo veaḡa lelevaḡi daiḡutuna kavana e vetoḡana moḡo. Moḡesina nai Barau na Mose toma-rakariḡo ḡana farai rubuna bene ragaia ḡana, naima ekira-toreḡauato, ekirato, “Bono ḡitaia, dagara mabarari boveirini nai tu, ḡoro ai avaḡa-ḡitamuto ilailanai moḡo bono veiri.” 6 Senaḡina toma Iesu na ginitaḡo varevareri vini-toreḡau veiḡana guinenai Rubu Veaḡa vereri ḡeri ḡauvei evanaḡiato. Korana Barau ḡena kiraḡitore variḡunai Iesu tu Barau e tarimarima vekaravari ai eruḡani, ginitaḡo variḡuna bene vaḡa-seḡukaia ḡana, ma mai ginitaḡo na mo ginitaḡo guinena seḡukana evanaḡiani. Ema Barau ḡena kiraḡitore variḡuna na mo ginitaḡo guinena kiraḡitorena maki evanaḡiato. 7 Bema mo ginitaḡo guinena asi ḡena rakava tu, Barau na ginitaḡo variḡuna ta asi ma bere kiraḡia. 8 Senaḡina Barau na tarimarima ḡeri ai rakava eḡoitaḡoto naima ekirato,
“Vereḡauka eguruḡa-foforini,
‘Boḡono seḡaḡi, ḡaro ta mani eiaḡomani,
au na ginitaḡo variḡuna ta ma baveiani,
Isaraela besena e Iuda besena ḡeri.
9 1 Mai ginitaḡo tu dia guinenai ḡia seneri ḡeri aveiato moḡa kavana.
Dia mo ḡaro ai ḡimari ai aḡabito,
benamo Aigupito na aḡori-rosirito ginitaḡona kavana.
Korana ḡia tu au ḡegu ginitaḡo ḡenai
asi ḡevetuḡamaḡikauni naima,
au na araga-kwanerito,’
Vereḡauka tu moḡesina eguruḡani.
10 Vereḡauka ma ekirani,
‘Ḡoira ḡarori ai au na mai ginitaḡo Isaraela besena ḡeri ma baveiani:
Au ḡegu taravatu ḡia debari ai batore-toḡarini ema ḡia nuḡari ai batorerini.
Au tu ḡia ḡeri Barau ai baiaḡoni ema ḡia maki au ḡegu tarimarimai beḡe iaḡoni.
11 Tarima ta na sevinai etanuni tarimana asi ma bevaḡa-ribaiani,
ema tarima ta tarikakana asi bekiraiani,
‘Vereḡauka noribaia!’
Korana mabarari na beḡe ribaguni,
misina na beiaḡoni mo baregona.
12 Ḡeri kira-sirivaḡi batuḡamaḡi-fitoḡarini,
ema ḡeri rakava mabarari asi ma batuḡamaḡirini.’ ”
13 Barau na mai ginitaḡo maiḡa ekiraḡiani, “ginitaḡo variḡuna” etoni nai tu, ḡia na mo ginitaḡo tovotovonai moḡa tu guinena na ekiraḡiani. Ma kara eguinenani e erakavani tu asikauna berekwarekwani.