IAKOBO (O IAMES) ḠENA TORETORE
Iakobo (o Iames) vaḡa-foforina guruḡari
Mai fefa tu Iakobo (o Iames), Iesu tarina, na etoreato. Ḡia tu Ierusalema ekalesia ḡorikauna tarimana ta. Mai fefa etoreato laḡanina tu 45 ma 49 fakari nuḡanai ta, mo tu Iesu emaseto murinai.
Mai fefa etoreato korana tu, 1) Heberu ekalesiari veribaḡani ema meto baregori ḡeḡoitaḡoto-ḡoi nai, nuḡari bene vaḡa-gwaḡiḡiri etato; 2) Heberu ekalesiari vefakari ai tu veiḡa ema maḡuri asi roroḡotori tari ḡeḡorato-ḡoi, naima moḡeri bene vei-roroḡotori ḡana uranai; 3) Heberu ekalesiari bene kira-varari, veḡabidadama korikorina tu veiḡa namori na bevaḡa-foforiani.
Iakobo na mai fefa tu maiḡesi eboioḡaiato:
1. Veḡabidadama veribaḡani na betovo-naḡiani ema bevaḡa-foforiani - karoa 1:1-18
2. Veḡabidadama ḡera ḡauvei e veiḡa na bevaḡa-foforiani - karoa 1:19-2:26
3. Veḡabidadama ḡera guruḡa na bevaḡa-foforiani - karoa 3
4. Veḡabidadama Barau korana-iaḡina maḡurina korikorina na bevaḡa-foforiani - karoa 4-5
1
1 Au Iakobo (o Iames), Barau e Vereḡauka Iesu Keriso ḡeri vetuḡunaḡi tarimagu, ḡeguna mai fefa eiaḡosini, ḡomi Isaraela doḡoromi gabanana ruarua (12) tanobara boruri ai ḡotanu-lausilausini ḡemi ai. Avaḡa-namomini.
Veribaḡani ḡenana veḡabidadama bekokoreni
2 Tarikakagu mabarami, veribaḡani irauirau boḡo ḡoitaḡorini nai, boḡono iaku-iaḡiri moḡo. 3 Korana ḡomi ribami, veribaḡani na ḡemi veḡabidadama etovo-naḡirini nai, kokore ema vevaḡa-gwaḡiḡi evaḡa-ḡorarini. 4 Benamo kokore ema vevaḡa-gwaḡiḡi ḡemi ai bene barego-korikori, be ḡemi ai maki kerere ta asi bene tanu e vetoukau ta maki asiḡina, ema dagara tai asi boḡono rabu.
5 Senaḡi bema ḡomi fakami ai ta asi iaunegana nai tu, Barau bene noḡia, ḡia na beviniani, korana Barau tu nuḡana mabarana ema nuḡana ma iakuna ḡesi ḡia ḡenoḡiani tarimari mabarari evinirini. 6 Senaḡi enoḡini nai tu veḡabidadamai moḡo bene noḡi, nuḡana asi bene daradara. Korana eiauvo-iauvoni tarimana tu davara ureurena iavara na ekwari-iaḡo kwari-iaḡomaiani kavana. 7 Moḡesi tarimana tu bene riba, ḡia Vereḡauka ḡenana dagara ta tu asi bedoḡariani. 8 Etuḡamaḡi-ruaruani tarimana tu ḡena ḡauvei mabarari ai asi eruḡa-gigitarini.
Asi ḡena-ḡana tarimana ema ma ḡena-ḡana tarimana
9 Tarikaka ta asi ḡena e asi ḡana tu bene iaku, korana Barau ḡenai ḡia tu barego. 10 Ema ma ḡena ma ḡana tarimana maki bene iaku, Barau na betore-variḡoani neganai. Korana berekwa-rekwani boḡa veraverari kavana. 11 Ḡaro emaraḡeni nai, ekirini gugurana na ḡauḡa etunu-maraiani, benamo veraverana eketo-vaḡini, ḡitaḡitana marevana ekorini. Ḡena-ḡana vovoka tarimana maki moḡesina kavana berekwa-rekwani ḡena taḡa ḡauveiri iaḡoviniri nuḡanai.
Vetovonaḡi ema veribaḡani ainana eiaḡomani
12 Veribaḡani nuḡari ai evevaḡa-gwaḡiḡini tarimana tu bene iaku, korana mo vetovonaḡi bekorini nai, roḡo beruḡa-taḡoni tu maḡuri koronana beḡabiani. Mo maḡuri tu Barau na ekiraḡi-toreato ḡia ḡeura-viniani tarimari ḡeri. 13 Bema tarima ta veribaḡani edoḡariani nai, asi bene kira, “Mai veribaḡani tu Barau ḡenana eiaḡomani.” Korana Barau tu veiḡa rakavari na asi beḡe tovo-naḡiani riba, ema ḡia na tarima ta maki asi eriba-ḡaniani. 14 Senaḡi tarimarima veribaḡani edoḡariani tu bema ḡia eveḡwa-veḡitani, benamo tuḡamaḡi rakavari na nuḡana ḡeḡaniani, ḡeḡofaiani. 15 Ḡena ura rakavari na nuḡana ḡevaḡa-vonuani, benamo rakava ḡevaḡa-ḡoraiani. Ema rakava etubu-baregoni nai tu mase evaḡa-ḡoraiani.
16 Tarikakagu namomi, ta na asi bene ḡofami. 17 Vevaḡa-ḡauna dagarari namori mabarari ema varevare roroḡotori dagarari mabarari tu tuḡuna na ḡeiaḡomani, Mama Tamana, guba mamana eveiato Barauna, ḡenana ḡemariḡoni. Guba mamana eirauni, senaḡi ḡia tu asi eirauni o mukuna na maki asi eḡabiani. 18 Ḡia tauḡena ḡena urai moḡo ḡena guruḡa moḡonina ḡenana evaḡa-maḡurirato, korana tarimarima ema ḡemaḡurini dagarari tari ḡimana na eveirito dagarari mabarari fakari ai bitana guine ḡana.
Seḡaḡi e veiḡa
19 Tarikakagu namomi, maiḡa tu boḡono ribaia: Ḡomi tata guruḡa seḡaḡi-seḡaḡiri ai boḡono ḡarimoḡi, senaḡi guruḡai boḡono veḡabitari, ema asi boḡono baru-ḡariḡari. 20 Korana tarimarima ḡeri baru ḡerina Barau ḡena veiḡa roroḡotori asi beḡe foforini. 21 Moḡa lorinai maḡuri rakavari ema veiḡa mirori mabarari boḡono fitoḡari. Barau na nuḡami ai evaroato guruḡana boḡono ḡabi-raḡea ma manaumi ḡesi. Korana mani guruḡa na bevaḡa-maḡurimini riba.
22 Ḡena guruḡa tu asi boḡono seḡaḡiri moḡo, senaḡi ḡoseḡaḡirini guruḡari tu ḡemi veiḡai boḡono vaḡa-foforia, tauḡemi boḡo veḡofani garina. 23 Deikara Barau ḡena guruḡa eseḡaḡiani moḡo, senaḡi veiḡana tu asi eveiani tu veḡia ai tauḡena ḡoirana eḡitaiani kavana. 24 Tauḡena veḡiai eveḡitani, benamo eraka-veḡitani nai tu ma evetuḡa-rekwani ḡia vetoḡana tu aiḡesina. 25 Senaḡi deikara taravatu namo vedaureana, tarimarima ḡeri rakava eruḡa-vaḡirini taravatuna, eḡita-ginikauani, eseḡaḡi-vanaḡi vanaḡiani ema asi eseḡaḡi-taḡuini, senaḡi ḡena veiḡai evaḡa-foforiani, ḡia tu Barau na ḡena ḡauvei mabarari nuḡari ai bevaḡa-namoani.
26 Bema tarima ta tauḡena evekiraḡini tu Barau ekorana-iaḡiani etoni, senaḡi meana tu asi enariani, mani tarima tu tauḡena moḡo eveḡofaḡofa-iaḡini ema Barau korana-iaḡina veiḡana maki asi tauna. 27 Ḡita Tamara Barau na ekalesia tarimana namo vedaureana e moḡonina maiḡesi etuḡamaḡiani: Gara e vabu ḡeri taḡitaḡi ai eḡita-ḡaurini ema tauḡena evenarini tanobara mirona na bevemironi garina.