17
Elaia maraapore segalepia umanawa wade
1 Peroweta ebowa Elaia* Elaia ebowa ipawaida ipa Iawe me ipa God. Giled bolawa bedewe Tisibiwa wanwanlala warere Eiab mampe alene wanase, “Ulaipaida, Israelwa Godiu wanwankasalala ita ne ipa me nolawa dewalala ebowe wadina, unu mai wapi ita do ena ema ieia bedewe mai nirurulepi ideita ne wapo rua unu wapi.”✡ Iems 5.17
Elaia dima wana ruaida segalen. Walama daumawa unu mai wapona ita nana dialen.
Obu bola Sarepatiwa wanwanla
8 Tane Iawe God Elaia diene wanase, 9 “E aie Sarepatiwa wanempa bola debama Saidon tampe. Sape ne obu diana nana sauepio naa.”✡ Luk 4.25,26
10 Sa baiwa Elaia Sarepatiwa alene bola gonaawa moape wisene i ia nolaleidio ewen. Ita me diene wanase, “Rua ba dia, esa utee neawo napa?” 11 I ene esa utepia baiwa aleidio me apa mampe wanase, “Rua ba dia, bured do wade wine nea?”
12 I me sipoasane wanase, “Ulaipa e Goda wanwankasalala ebowe wadina, ne mainawo mai bured da wineipona, dia. Ne parawa didiwaida ita mena kerauda mainawo winede. Tauma ne ia nolantedina duwa anteape neba otona nata baimba laulantapo nate aupe no di wainente omana bowantata.”
13-14 Tane Elaia me diene wanase, “Mai inguguraitaa! Iawe Israelwa Godiu wadiase,
‘Parawa onta bedewe ita do mena dugi bedewe wineia mai diantopu, dia, ideita Iawe God walama ituna osowe unu wapie irai butamopio inintopu!’ Sa baiwa ne dima waana rua duwa aite dewasaa ita ne baina bauta parawa kerauda nuite wade winea. Ita moawa winompa nuitaa e otoa nata baila.’ ”
15 Me alene Elaia wana rua dewasan. Ita ema aupe, walama uduudu Elaia ita obu otopa nata baibu nana winedio os waimoie. 16 Iawe God sauawa Elaia bedewesano wana parawa onta bedewe ita mena dugi bedewe mai diantopona.
17 Tane walama isiwa diantono obu ema meba duwa bedewe wandie otopa kero debama wadaidasano ita bolen. 18 Sa baiwa me Elaia diene wanase, “E ipa God perowetawa, e dima baiwa dewa ema dewasaana ne mainawo? E mape wiena ne kadina euwanee ita do otona bosaa baiwa, ba?”
19 Elaia sipoasane wanase, “Otoa wadee nea.” Me oto inawa mampe wadene awanene me wandiawo du iwa osowe odene alen. Ita me ituleidia bolawe wadenaisie itun. 20 Ita me Iawe God mampe rauparilene wanase, “Iawe ne Godna, dima baiwa e sai debama obu ema osowe ituana? Me wano ne duwa bedewe wainedina tane dima baiwa e dewasaano me otopa bolen?”
21 Ita me walama natadea oto osowelene danawa tonbodene osowe itulene Iawe God mampe mukalene wanase, “Iawe ne Godna, ne menanede e oto ema ina leusae wanaa!” 22 Iawe God Elaia raupariwa etene ita oto ina waneno inalene wain. 23 Ita Elaia oto wadenposie awanene neke asiasi iene alen. Ita du atowea wanwan bola debama bedewe inawa wanene wanase, “Ewee, otoa inawaa!”
24 Tane oto inawa Elaia mampe wanase, “Tauma ne atenten e God perowetawa, ita Iawe God aiawa e moawo nosedia ipa ulaipa.”